ពីនេះ ពីនោះ
តើពាក្យ«ស្ថានីយ»និងពាក្យ«ឋានីយ» មានអត្ថន័យខុសគ្នាបែបណា?
× ពាក្យថា«ស្ថានីយ»និងពាក្យ«ឋានីយ»គឺជាពាក្យពីរផ្សេងគ្នា ប៉ុន្តែបើតាមវចនានុក្រមខ្មែររបស់សម្ដេចព្រះសង្ឃរាជ ជួន ណាត ពាក្យទាំងពីរនេះមានអត្ថន័យដូចគ្នា។
ពាក្យ«ឋានីយ»មានថ្នាក់ពាក្យ ជានាម មានន័យថា ទីសម្រាប់សម្នាក់, ទីចត, ទីសំចត, ដំណាក់សម្រាប់ឈប់សម្រាក់, សម្រាប់ដាក់រទេះជាដើម។ល។ ឧទាហរណ៍ ឋានីយរថយន្ត, ឋានីយរទេះភ្លើង...។
ចំណែកពាក្យ«ស្ថានីយ» មានថ្នាក់ពាក្យជានាមដូចគ្នា ហើយក៏មានអត្ថន័យដូចពាក្យថា «ឋានីយ»ផងដែរ។ ប៉ុន្តែក្នុងចំណោមពាក្យទាំងពីរនេះ ភាគច្រើនគេសង្កេតឃើញថា ពាក្យ«ស្ថានីយ» ត្រូវបានគេសរសេរ និងប្រើប្រាស់ច្រើនជាង។
បញ្ជាក់ពាក្យថា៖ «សម្នាក់» មានថ្នាក់ពាក្យជាកិរិយាសព្ទ មានន័យថា ស្នាក់នៅ, ឈប់ស្នាក់នៅ, ឈរនៅអាស្រ័យមានកំណត់វេលាៈ ខ្ញុំមកសម្នាក់នៅផ្ទះសម្លាញ់។ ពាក្យនេះ គេសរសេរជា សំណាក់ ក៏បាន។ តែបើថ្នាក់ពាក្យជានាមវិញ មានន័យថា ទីជ្រកអាស្រ័យ,បន្ទុក, ការនៅដោយសារ។ រាជសម្នាក់ មានន័យថា លំនៅរបស់ព្រះរាជា,ព្រះរាជវាំង។ ប៉ុន្តែពាក្យ សម្នាក់ នេះគេកម្រឃើញសរសេរណាស់ ប៉ុន្តែភាគច្រើនឃើញសរសេរតែពាក្យ សំណាក់៕
ដកស្រង់ពីវចនានុក្រមខ្មែររបស់សម្ដេចព្រះសង្ឃរាជជួន ណាត
© រក្សាសិទ្ធិដោយ thmeythmey.com