ជាតិ
Zaman ជឿជាក់ថា កម្ពុជាមិនបិទសាលាខ្លួនឡើយ
× ភ្នំពេញ៖ នាយកសាលាអន្ដរជាតិហ្សាម៉ាន់ថ្នាក់អនុវិទ្យាល័យ និងវិទ្យាល័យលោក Gurkan Cil ជឿជាក់ថា រដ្ឋាភិបាលកម្ពុជា នឹងពិចារណាច្បាស់លាស់ ដោយពុំយល់ព្រមតាមសំណើរដ្ឋាភិបាល តួកគី ឲ្យបិទសាលា Zaman ឡើយ។ រដ្ឋាភិបាលតួគី ស្នើរដ្ឋាភិបាកម្ពុជា បិទសាលា Zaman ដែលតួគីបានចោទថា ជាប់ពាក់ព័ន្ធនឹងបណ្តាញសមាជិកចលនាអន្តរជាតិរបស់លោក Fethullas Gulen ដែលរៀបចំធ្វើរដ្ឋប្រហារយោធានៅតួកគីកាលពីថ្ងៃទី ១៥ ខែកក្កដាកន្លងមក ។
លោក Gurkan Cil ចាត់ទុកការចោទប្រកាន់របស់រដ្ឋាភិបាលតួគី មកលើសាលាZaman ជាការចោទប្រកាន់ដោយគ្មានភស្តុតាងច្បាស់លាស់។ នាយកសាលាអន្ដរជាតិហ្សាម៉ាន់រូបនេះ មិនព្រួយបារម្ភពីការបិទសាលា Zaman នៅកម្ពុជានោះទេ ដោយលោក ជឿជាក់ថា រដ្ឋាភិបាលកម្ពុជា នឹងមានការវិនិច្ឆ័យច្បាស់លាស់ ហើយមិនបិទសាលា Zaman តាមសំណើរបស់រដ្ឋាភិបាលតួកគីឡើយ។
ថ្លែងក្នុងសន្និសីទសារព័ត៌មានស្តីពី ការបើកបវេសនកាលឆ្នាំសិក្សាថ្មី សាលាហ្សាម៉ាន់ (Zaman) នៅថ្ងៃទី១ កញ្ញានេះលោក Gurkan Cil បានបញ្ជាក់ដូច្នេះថា៖«Zaman នៅតែបណ្តុះបណ្តាលធនធានមនុស្សប្រកបដោយសមត្ថភាពជាធម្មតា។ យើងជឿជាក់រដ្ឋាភិបាលកម្ពុជា តាមរយៈក្រសួងអប់រំ យុវជន និងកីឡា មិនយល់ស្របដូចការចោទប្រកាន់របស់រដ្ឋាភិបាលតួកគីទេ»។
កាលពីថ្ងៃទី២២ ខែសីហា រដ្ឋាភិបាល លោក Ilhan Khemal Tug ឯកអគ្គរដ្ឋទូតតួកគីប្រចាំនៅកម្ពុជា បានស្នើជាផ្លូវការឲ្យរដ្ឋាភិបាលកម្ពុជាសម្រេចបិទសាលាអន្តរជាតិ ZAMAN នៅកម្ពុជាតែម្តងពីព្រោះរដ្ឋាភិបាលតួកគីយល់ថា សាលានេះ មានជាប់ពាក់ព័ន្ធនឹងចលនារដ្ឋប្រហារបរាជ័យកាលពីថ្ងៃទី ១៥ ខែកក្កដា កន្លងមក។
ត្រង់ចំណុចនេះនាយកសាលាអន្ដរជាតិហ្សាម៉ាន់លោក Gurkan Cil ក៏បានទាមទារឲ្យរដ្ឋាភិបាលតួកគីបង្ហាញភស្តុតាងសិន មុននឹងចោទប្រកាន់សាលា Zaman ជាប់ពាក់ព័ន្ធនឹងបណ្តាញសមាជិកចលនាអន្តរជាតិរបស់លោក Fethullas Gulen ដែលរៀបចំធ្វើរដ្ឋប្រហារយោធានៅតួកគីនេះ ។
កាលពីថ្ងៃទី ១៨ ខែកក្កដា លោក Ejder Klic ប្រធានក្រុមហ៊ុន ហ្សាម៉ាន់Co.,Ltd បានចេញសេចក្តីថ្លែងការណ៍ បដិសេធនឹងការចោទប្រកាន់របស់ឯកអគ្គរដ្ឋទូតតួគីប្រចាំនៅកម្ពុជា មកលើសាលាអន្តរជាតិZAMAN ហើយក្រុមហ៊ុនរបស់លោក ក៏ថ្កោលទោសអំពើរដ្ឋប្រហារនៅតួគីនោះដែរ។ បើតាមសេចក្តីថ្លែងការណ៍ដដែលនោះ លោក Ejder Klic ទទួលស្គាល់ថា ស្ថាបនិករបស់សាលាអន្តរជាតិហ្សាម៉ាន់ បានចាប់ផ្តើមស្ថាបនាដោយផ្អែកលើស្មារតី និងទស្សនៈវិស័យពីលោក ហ្វេធូឡា ហ្គូឡិន(Fethullas Gulen ) ពិតមែន។ ប៉ុន្តែលោក ហ្គូលិន មិនដែលបានចូលរួមក្នុងការងាររដ្ឋបាល ឬជាម្ចាស់ស្របច្បាប់ណាមួយរបស់សាលាហ្សាម៉ាន់ឡើយ។
ជុំវិញការចោទប្រកាន់គ្នារវាងរដ្ឋាភិបាលតួគី និងសាលា Zaman នេះ រដ្ឋាភិបាលកម្ពុជាមិនទាន់អាចបញ្ជាក់ពីជំហររបស់ខ្លួន បាននៅឡើយទេ។ អ្នកនាំពាក្យក្រសួងការបរទេសលោក ជុំ សុន្ទរី ធ្លាប់ប្រាប់អ្នកកាសែតកន្លងមកថា ក្រសួងនឹងធ្វើការពិនិត្យពិចារណានូវសំណើនេះ ជាមួយស្ថាប័នពាក់ព័ន្ធរបស់កម្ពុជា៕
Tag:
Zaman
តួកគី
អប់រំ
© រក្សាសិទ្ធិដោយ thmeythmey.com