ជាតិ
មេដឹកនាំអាស៊ាន និងប្រទេសដៃគូសន្ទនា នឹងជជែកគ្នាពីការអភិវឌ្ឍសេដ្ឋកិច្ច និងសន្តិសុខ hun_sen(រូបភាពពីហ្វេកប៊ុកសម្តេច ហ៊ុន សែន ពេលសម្តេចបំពេញបេសកកម្មនៅក្រៅប្រទេស កាលពីពេលកន្លងទៅ។)
×
កិច្ចប្រជុំកំពូលជាង១០ នឹងត្រូវរៀបចំឡើងនៅក្នុងក្រុងវៀងច័ន្ទន៍ ប្រទេសឡាវចាប់ពីថ្ងៃទី៦ ដល់ទី៨ ខែកញ្ញាខាងមុខនេះ។ ក្នុងអំឡុងពេលនៃកិច្ចប្រជុំទាំងនោះ ថ្នាក់ដឹកនាំអាស៊ាន និងថ្នាក់ដឹកនាំនៃបណ្តាប្រទេសដៃគូសន្ទនារបស់អាស៊ាន នឹងពិភាក្សាលើកិច្ចសហប្រតិបត្តិកាលើវិស័យដ៏ទូលំទូលាយ ក្នុងបំណងសម្រេចឲ្យបាននូវគោលដៅជាងមុនថែមទៀត នៃការអភិវឌ្ឍសេដ្ឋកិច្ច និងបញ្ហាពាក់ព័ន្ធនឹងវិស័យសន្តិសុខនៅក្នុង និងក្រៅតំបន់ ដូចជាសន្តិសុខលំហរសមុទ្រ ភេរវកម្ម ការប្រែប្រួលអាកាសធាតុ និងបញ្ហាផ្សេងទៀត។
មេដឹកនាំប្រទេសអាស៊ាន និងប្រទេសផ្សេងទៀតនៅលើពិភពលោក មានទាំងអាមេរិក ចិន ឥណ្ឌា ជប៉ុន កូរ៉េខាងត្បូង និងអូស្ត្រាលីជាដើម នឹងជួបជុំគ្នា នៅក្នុងកិច្ចប្រជុំកំពូលជាង១០ ដែលនឹងត្រូវរៀបចំ នៅក្នុងក្រុងវៀងច័ន្ទន៍ ប្រទេសឡាវ ចាប់ពីថ្ងៃទី៦ ដល់ទី៨ ខែកញ្ញា។ បើផ្អែកតាមសេចក្តីជូនព័ត៌មានរបស់ក្រសួងការបរទេស និងសហប្រតិបត្តិអន្តរជាតិនៅថ្ងៃទី១ ខែកញ្ញានេះ សម្តេចនាយករដ្ឋមន្ត្រី ហ៊ុន សែន ក៏នឹងដឹកនាំគណៈប្រតិភូទៅចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធទាំងនោះដែរ។
សេចក្តីជូនព័ត៌មានរបស់ក្រសួងការបរទេស បានឲ្យដឹងថា ថ្នាក់ដឹកនាំអាស៊ាន និងថ្នាក់ដឹកនាំនៃបណ្តាប្រទេសដៃគូសន្ទនារបស់អាស៊ាន នឹងពិភាក្សាលើកិច្ចសហប្រតិបត្តិកាលើវិស័យដ៏ទូលំទូលាយ ក្នុងបំណងសម្រេចឲ្យបាននូវគោលដៅ ជាងមុនថែមទៀត នៃការអភិវឌ្ឍសេដ្ឋកិច្ច ក៏ដូចជាបញ្ហាពាក់ព័ន្ធនឹងលើវិស័យសន្តិសុខ នៅក្នុង និងក្រៅតំបន់ ដូចជាសន្តិសុខលំហរសមុទ្រ ភេរវកម្ម ការប្រែប្រួលអាកាសធាតុ និងបញ្ហាផ្សេងទៀតដែលមានការយកចិត្តទុកដាក់ជារួម។
បើតាមសេចក្តីជូនព័ត៌មានដដែល កិច្ចប្រជុំទាំងនោះរួមមាន៖១. កិច្ចប្រជុំកំពូលអាស៊ានលើកទី២៨ និងទី២៩។ ២. កិច្ចប្រជុំកំពូលអាស៊ាន-អូស្ត្រាលី លើកទី២ និងកិច្ចប្រជុំកំពូលអាស៊ាន-អូស្ត្រាលីពីរឆ្នាំម្តងលើកទី១ ។ ៣. កិច្ចប្រជុំកំពូលអាស៊ាន-ចិន លើកទី១៩ ដើម្បីរំលឹកខួបអនុស្សាវរីយ៍លើកទី២៩ នៃទំនាក់ទំនងដៃគូសន្ទនាអាស៊ាន-ចិន។ ៤. កិច្ចប្រជុំកំពូលអាស៊ាន-ឥណ្ឌាលើកទី១៤ ។ ៥. កិច្ចប្រជុំកំពូលអាស៊ាន-ជប៉ុនលើកទី១៩ ។ ៦. កិច្ចប្រជុំកំពូលអាស៊ាន-សាធារណរដ្ឋកូរ៉េលើកទី១៨ ។ ៧. កិច្ចប្រជុំកំពូលអាស៊ាន-អង្គការសហប្រជាជាតិលើកទី៨ ។ ៨. កិច្ចប្រជុំកំពូលអាស៊ាន-សហរដ្ឋអាមេរិកលើកទី៤ ។ ៩. កិច្ចប្រជុំកំពូលអាស៊ានបូកបីលើកទី១៩ និងកិច្ចប្រជុំកំពូលអាស៊ីបូព៌ាលើកទី១១ ។
ក្រសួងការបរទេសកម្ពុជា បានបន្តឲ្យដឹងទៀតថា កិច្ចប្រជុំកំពូលអាស៊ានប្រចាំឆ្នាំ នឹងពិនិត្យឡើងវិញកិច្ចសហប្រតិបត្តិការលើគ្រប់វិស័យ នៃសរសរស្តម្ភទាំងបី គឺសហគមន៍នយោបាយ និងសន្តិសុខអាស៊ាន សហគមន៍សេដ្ឋកិច្ចអាស៊ាន និងសហគមន៍សង្គមវប្បធម៌អាស៊ាន។
ក្នុងអំឡុងពេលនៃកិច្ចប្រជុំកំពូលលើកទី២៨ និងទី២៩ និងកិច្ចប្រជុំកំពូលពាក់ព័ន្ធ សម្តេច ហ៊ុន សែន និងថ្នាក់ដឹកនាំអាស៊ានដទៃទៀត នឹងចុះហត្ថលេខាលើសេចក្តីថ្លែងការណ៍អាស៊ាន ស្តីពី«អាស៊ានមួយ ការឆ្លើយតបមួយ៖ការឆ្លើយតបរបស់អាស៊ានមួយ ទៅនឹងគ្រោះមហន្តរាយជាផ្នែកមួយនៅក្នុងតំបន់ និងក្រៅតំបន់»។ នេះបើតាមក្រសួងការបរទេសកម្ពុជា ដែលបន្តទៀតថា នាយករដ្ឋមន្ត្រីកម្ពុជា ក៏នឹងអញ្ជើញចូលរួមកិច្ចប្រជុំកំពូលចំនួន២ទៀត គឺកិច្ចប្រជុំកំពូលវិនិយោគ និងធុរកិច្ចអាស៊ានឆ្នាំ២០១៦ និងកិច្ចប្រជុំកំពូលមេគង្គ-ជប៉ុនលើកទី៨ ។ លើសពីនេះ ប្រមុខរដ្ឋាភិបាលកម្ពុជា នឹងជួបពិភាក្សាទ្វេភាគីជាមួយប្រធានាធិបតី នាយរដ្ឋមន្ត្រី និងប្រមុខគណៈប្រតិភូនៃប្រទេសមួយចំនួនផងដែរ៕
© រក្សាសិទ្ធិដោយ thmeythmey.com