តាមបណ្ដាញសង្គមហ្វេសប៊ុក និងភាសានិយាយរបស់យុវវ័យបច្ចុប្បន្ននេះ ពាក្យថា«ប៉ិក»ហាក់មានការពេញនិយមប្រើ ទាំងសរសេរ និងនិយាយ។ តើពាក្យនេះមានអត្ថន័យបែបណានៅក្នុងការប្រើប្រាស់របស់យុវវ័យ, មនុស្សចាស់, គូសង្សារ និងវចនានុក្រមខ្មែរ?
ពាក្យ«លើសហើយប៉ិ», «ប៉ិខ្ញុំឈឺហើយ», «ប៉ិខ្ញុំផឹកទៀតហើយ», «ល្មមៗហើយប៉ិ», «កុំយំប៉ិ», «កុំខឹងប៉ិ», «ទៅណាប៉ិ», «ស្រឡាញ់ប៉ិណាស់», «អាប៉ិឯងធ្វើអី»,...ជាដើមគឺជាពាក្យ ដែល យុវវ័យ កំពុងប្រើប្រាស់យ៉ាងពេញនិយម។
វចនានុក្រមខ្មែររបស់សម្ដេចព្រះសង្ឃរាជ ជួន ណាត ពាក្យថា«ប៉ិ» នេះគឺពុំមានសរសេរនៅក្នុងវចនានុក្រមខ្មែរនោះទេ។ ប៉ុន្តែ មានពាក្យមួយដែលមានសូរអានស្រដៀងពាក្យ«ប៉ិ»នេះ គឺពាក្យ «ប៉ិក» ដែលមានន័យថា សូរឮដោយគោះបន្ទះឫស្សីជាដើម។ សំឡេងសូរ ប៉ិៗ។
ប៉ុន្តែពាក្យថា«ប៉ិ»នេះបែរជាមានន័យផ្សេងៗគ្នា នៅក្នុងការប្រើប្រាស់ប្រចាំថ្ងៃរបស់ប្រជាពលរដ្ឋមួយចំនួន និងស្រទាប់យុវវ័យ។
ពាក្យថា«ប៉ិ»នេះ បើសម្រាប់យុវវ័យហ្វេសប៊ុកមួយចំនួន ប្រើក្នុងន័យដើម្បីបញ្ចាក់ពីភាពស្និទស្នាលរវាងមិត្តភក្តិ ឫអ្នកជុំវិញខ្លួន ដោយយកពាក្យ«ប៉ិ»នេះជំនួសនាមសព្ទ។ ឧទាហរណ៍ៈ «ល្មមៗហើយសម្បត្តិ» ប៉ុន្តែយុវវ័យប្រើជំនួសទៅជា«ល្មមៗហើយប៉ិ»ដោយយកពាក្យប៉ិនេះទៅជំនួសឈ្មោះ «សម្បត្តិ»ទៅវិញ ដែលឃ្លានេះស្ដាប់ទៅមានអារម្មណ៍ថាស្និតស្នាល។
ចំណែកគូសង្សារ គេប្រើពាក្យនេះដើម្បីបង្ហាញពីកម្រិតស្រឡាញ់របស់ខ្លួន និងក្នុងន័យជំនួសភាពអៀនខ្មាស់។ ឧទាហរណ៍ថា៖ «បងកុំធ្វើបាបចិត្តអូនណា!» ជំនួសទៅជា«ប៉ិកុំធ្វើបាបចិត្តអូនណា!»ជាដើម ដែលឃ្លានេះនិយាយទៅធ្វើឲ្យមិនសូវមានអារម្មណ៍អៀនខ្មាស់។
ប៉ុន្តែសម្រាប់ប្ដីប្រពន្ធតាមតំបន់និគម ជនបទ ក៏មានប្រើពាក្យនេះផងដែរ ក្នុងន័យជំនួសឲ្យការហៅឈ្មោះប្ដី ឬឈ្មោះប្រពន្ធរបស់ខ្លួន។ ឧទាហរណ៍ៈ «តាប៉ិញ្ចាស់», «យាយប៉ិ», «តាប៉ិ», «ប៉ិអើយ...»។ ពាក្យនេះ សម្រាប់មនុស្សចាស់លោកគិតថាប្រើសម្រាប់តែប្ដីប្រពន្ធនោះទេ តែបើឲ្យគាត់ដឹងថា យុវវ័យប្រើប្រហែលជាគាត់សើចជាមិនខាន។
ផ្ទុយមកវិញ សម្រាប់អ្នកជាប់សែស្រឡាយចិន ពាក្យថា«ប៉ិ»នេះ គឺមានន័យថា អ៊ុំ តែអ៊ុំ នោះគឺត្រូវជាបងប្រុសរបស់ឪពុក ទើបហៅ «ប៉ិ»បាន។
ជារួមមក ពាក្យនេះមានន័យបែបណា តាមបរិបទបែបណា ក្នុងលក្ខខណ្ឌប្រើប្រាស់បែបណា គឺជារឿងមួយ។ ប៉ុន្តែដោយសារពាក្យនេះស្ថិតក្នុងបរិបទថ្មី ការប្រើប្រាស់មានអត្ថន័យផ្សេងៗគ្នាច្រើន ដែលវចនានុក្រមក៏មិនបាន សរសេរ និងពន្យល់បកស្រាយ ហេតុនេះ វាក៏ជាការកត់សម្គាល់មួយដើម្បីពិចារណាថា តើពាក្យនេះ គួរបញ្ចូលក្នុងវចនានុក្រម ដោយពន្យល់តាមអត្ថន័យបច្ចុប្បន្ននេះឬក៏អត់? នោះគឺជាជំហានបន្ទាប់ដែលអ្នកជំនាញផ្នែកភាសាវិទ្យាជាអ្នកសម្រេច៕