ពីនេះ ពីនោះ
×![]()
ដោយ: ថ្មីៗ
មនុស្សជាច្រើន មិនថានៅក្នុងប្រទេសកម្ពុជា ឬនៅបរទេសទេ តែងតែចង់បានឱកាស និងចង់ឲ្យខ្លួនឯងមានតម្លៃ មានន័យថា ចង់ឲ្យគេ ផ្តល់តម្លៃឲ្យខ្លួនឯង។ តើគេត្រូវធ្វើដូចម្តេចដើម្បីឲ្យខ្លួនឯងមានឱកាស និងមានតម្លៃ? 
នេះ គឺជាសំណួរដែលអ្នកខ្លះឆ្លើយយ៉ាងខ្លីថា ចូរកុំរង់ចាំឱកាសឲ្យសោះ ដើម្បីជោគជ័យ។ បុគ្គលម្នាក់ៗ ត្រូវចេះបង្កើតឱកាសដោយខ្លួនឯង មុននឹងអ្នកដទៃផ្តល់ឱកាសល្អឲ្យយើង។ ឧទាហរណ៍ថា បុគ្គល«ក»ចង់ទទួលបានការងារក្នុងជំនាញអ្វីមួយដែលល្អ បុគ្គល«ក»នោះ ពេលខ្លះ ត្រូវធ្វើការឲ្យនរណាម្នាក់ ក្នុងរយៈពេលណាមួយដោយមិនយកកម្រៃដើម្បីឲ្យអ្នកផ្សេងមើលឃើញពីសមត្ថភាពរបស់ខ្លួន។ នេះហើយ គឺជាការបង្កើតឱកាសដោយខ្លួនឯង។
ឧទាហរណ៍មួយទៀតទាក់ទងនឹងឱកាសដដែល ប្រសិនបើ បុគ្គល«ក»ដដែលចង់មានឱកាសក្នុងអាជីពទីផ្សារ និងលក់ឲ្យកាន់តែធំ លុះត្រាតែបុគ្គលនោះ រៀនជំនាញនេះឲ្យប្រាកដ និងចេះឲ្យលើសអ្នកដទៃ ទើបអ្នកដទៃសរសើរ និងអ្នកដទៃ(ថៅកែ)បើកឱកាសឲ្យបុគ្គល«ក»កាន់តែច្រើនបន្ថែមទៀត។
ទាក់ទងរឿងតម្លៃវិញ បុគ្គលដែលចង់បានតម្លៃ ឬចង់ឲ្យអ្នកដទៃផ្តល់តម្លៃឲ្យខ្លួន លុះត្រាតែបុគ្គលនោះ ចេះបង្កើតតម្លៃឲ្យខ្លួនឯងជាមុនសិន។ ឧទាហរណ៍ បុគ្គល «ខ» មិនអាចត្រូវបានគេសរសើរថាគាត់ពូកែភាសាអង់គ្លេសឡើយ ប្រសិនបើបុគ្គលនោះ មិនបានបង្កើតតម្លៃឲ្យខ្លួនឯង ដោយរៀនភាសាអង់គ្លេសឲ្យចេះផងនោះ។
សរុបសេចក្តីមក បុគ្គលដែលចង់មានឱកាស និងចង់មានតម្លៃ ត្រូវតែចេះបង្កើតឱកាស និងបង្កើតតម្លៃឲ្យខ្លួនឯង មុននឹងឲ្យអ្នកដទៃផ្តល់តម្លៃ និងផ្តល់ឱកាសឲ្យខ្លួនឯង៕
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
