ជាតិ
សង្គមជាតិ
អាជ្ញាធរផ្ដល់ទីតាំងថ្មីដល់ពលរដ្ឋ១៣គ្រួសារ ដើម្បីស្ដារព្រែកបារាំងក្នុងខណ្ឌច្បារអំពៅ
× ភ្នំពេញ៖ នៅថ្ងៃទី៣ខែកញ្ញា អាជ្ញាធររាជធានីភ្នំពេញ សម្រេចផ្ដល់ដីលើទីតាំងថ្មីជូនពលរដ្ឋទាំង ១៣គ្រួសារ ក្នុងសង្កាត់និរោធ ខណ្ឌច្បារអំពៅ ដែលរស់នៅជាប់ព្រែកបារាំង ដែលអាជ្ញាធរកំពុងធ្វើការអភិវឌ្ឍន៍នៅទីកន្លែងនោះ។
បន្ទាប់ពីសើ្នសុំអស់រយៈពេលជាច្រើនឆ្នាំរួចមក នៅថ្ងៃនេះ អាជ្ញាធររាជធានីភ្នំពេញបានផ្ដល់ទីតាំងថ្មីជូនពលរដ្ឋទាំង១៣គ្រួសារ។ ការស្នើរបស់ប្រជាពលរដ្ឋធ្វើឡើង ស្របពេលដែលអាជ្ញាធរខណ្ឌច្បារអំពៅ លើកគម្រោងស្ដារ និងពង្រីកព្រែកបារាំង ដែលមានលំនៅឋានប្រជាពលរដ្ឋនៅលើជាប់ព្រែកនោះ។ អ្នកស្រី ផុន សុផល ជាប្រជាពលរដ្ឋម្នាក់ ក្នុងចំណោមពលរដ្ឋទាំង១៣គ្រួសារនោះ ឲ្យដឹងថា ពលរដ្ឋ ដែលរងផលប៉ះពាល់ពីគម្រោងអភិវឌ្ឍន៍ព្រែកបារាំង បានស្នើរសុំជាបន្តបន្ទាប់ចាប់ពីឆ្នាំ២០១២ ដើម្បីផ្ដល់ដំណោះស្រាយសមស្របដល់ពួកគាត់។ ហើយជាលទ្ធផល នៅថ្ងៃនេះ អាជ្ញាធរបានផ្ដល់ទីតាំងថ្មី ចម្ងាយពីរគីឡូម៉ែត្រពីទីតាំងចាស់ ដោយមួយគ្រួសារទទួលបានដីទំហំក្បាល ៤,៥ម៉ែត្រ និងបណ្ដោយ ១៤ម៉ែត្រ។
បើតាមអ្នកស្រី សុផល ពលរដ្ឋស្នើឲ្យអាជ្ញាធររៀបចំប្រព័ន្ធទឹកភ្លើង និងហេដ្ឋារចនាសម្ព័ន្តផ្សេងទៀត ឲ្យបានសមស្រប ដើម្បីអាចឲ្យពួកគាត់រស់នៅបានសមរម្យ។ អ្នកស្រីប្រាប់ទៀតថា សូមអាជ្ញាធរទុកពេលដល់ខែប្រាំង ដើម្បីអាចពួកគាត់ អាចរុះរើទៅនៅទីតាំងថ្មី ដោយមិនមានបញ្ហាអ្វី។ អ្នកស្រីមានប្រសាសន៍ដូចនេះថា៖«ឥឡូវខែភ្លៀង បើចាំដល់ប្រាំងគឺល្អ។ ហើយបើរុះរើផ្ទះទៅកន្លែងថ្មី ត្រូវការលុយកាក់ យើងត្រូវការរកលុយពេលនេះ»។
លោក ណុប ថា អភិបាលរងខណ្ឌច្បារអំពៅ មានប្រសាសន៍ថា នៅព្រឹកថ្ងៃទី ៣ ខែកញ្ញា អាជ្ញាធរខណ្ឌបានរៀបចំឲ្យពលរដ្ឋទាំងនោះ ចាប់ឆ្នោតរើសក្បាលដីសម្រាប់គ្រួសារនីមួយៗ ហើយអាជ្ញាធរតម្រូវឲ្យគ្រួសារទាំងនេះ ប្ដូរទៅទីតាំងថ្មីក្នុងខែវស្សានេះ ដើម្បីពន្លឿនការអភិវឌ្ឍព្រែកបារាំងនេះ។ តែលោកបញ្ជាក់ដូច្នេះថា៖«អាជ្ញាធរគិតគូរពីពលរដ្ឋ មិនចេះតែដេញៗទេ យើងនឹងមានវិធីដោះស្រាយជាមួយពួកគាត់។ បើតាមលោអភិបាលរងខណ្ឌរូបនេះ អាជ្ញាធរកំពុងរៀបចំហេដ្ឋារចនាសម្ព័ន្តនៅទីតាំងថ្មីដើម្បីអាចឲ្យពលរដ្ឋចូលទៅរស់នៅបានឆាប់៕
© រក្សាសិទ្ធិដោយ thmeythmey.com