អន្តរជាតិ
នយោបាយអន្តរជាតិ
ចិន ប្រាប់ហ្វីលីពីនកុំឲ្យបំភ្លៃស្ថានការណ៍សមុទ្រចិនខាងត្បូង
×
ប្រទេសចិន បានទាត់ចោលព័ត៌មានជុំវិញការសាងសង់កោះសិប្បនិម្មិតនៅសមុទ្រចិនខាងត្បូង (ហ្វីលីពីនហៅថាសមុទ្រហ្វីលីពីនខាងលិច) ដែលចេញផ្សាយដោយហ្វីលីពីន។ ជាមួយនឹងការបដិសេធព័ត៌មានខាងលើ ក្រុងប៉េកាំង ក៏ប្រាប់ទៅក្រុងម៉ានីល មិនត្រូវបំផ្លើសបំភ្លៃព័ត៌មាន ពាក់ព័ន្ធនឹងជម្លោះនៅសមុទ្រចិនខាងត្បូងនោះទេ ដ្បិតវាអាចនាំឲ្យស្ថានការណ៍កាន់តែតានតឹង។
ក្នុងការសង្ខេបព័តមានប្រចាំថ្ងៃ អ្នកនាំពាក្យក្រសួងការបរទេសចិន នៅថ្ងៃទី៥ ខែកញ្ញា បានបដិសេធរបាយការណ៍ថា ខ្លួនបានចាប់ផ្ដើមសាងសង់សំណង់រឹងមាំនៅសមុទ្រចិនខាងត្បូង ដែលមានជម្លោះជាមួយសមាជិកបួនរបស់អាស៊ាន។ ទន្ទឹមគ្នានោះ មន្ត្រីចិន ក៏ផ្ដាំហ្វីលីពីន ឲ្យត្រូវប្រយ័ត្នប្រយែងក្នុងការបញ្ចេញព័ត៌មានខុសឆ្គងណាមួយផងដែរ។
កាលពីថ្ងៃទី២ ខែកញ្ញា ប្រធានាធិបតីហ្វីលីពីន លោក Rodrigo Duterte និយាយថា លោកបានទទួលព័ត៌មានចារកម្មដែលមិនច្បាស់លាស់មួយបង្ហាញពីវត្តមានកប៉ាល់ដឹកទំនិញនៅម្ដុំថ្មប៉ប្រះទឹក Scarborough Shoal ហើយថែមទាំងបានចាប់ផ្ដើមដំណើរការសាងសង់ជាលើកដំបូង។ យោងតាមសារព័ត៌មាន Rappler លោក Duterte ទំនងសួរក្រុងប៉េកាំង លើបញ្ហានេះ ប្រសិនបើហ៊ានទាមទារតំបន់នេះ ផ្ទុយពីការសម្រេចរបស់តុលាការអន្តរជាតិ។
បន្ថែមពីលើការអះអាងរបស់ប្រធានាធិបតី លោក Delfin Lorenzana ជារដ្ឋមន្ត្រីការពារជាតិ ក៏អះអាងដែរថា កងកម្លាំងអាកាសហ្វីលីពីន បានប្រទះឃើញកប៉ាល់ឆ្មាំការពាររបស់ចិនចំនួនបួនគ្រឿង នាវាដឹកទំនិញពីរគ្រឿង ព្រមទាំងកប៉ាល់ដែលសង្ស័យថាជារបស់យោធា ចំនួនពីរគ្រឿងទៀត នៅថ្ងៃទី៣ ខែកញ្ញា។ នេះបើយោងតាមប្រភពព័ត៌មានដដែល។
ជាការឆ្លើយតបនឹងព័ត៌មានខាងលើ អ្នកនាំពាក្យក្រសួងការបរទេសចិន លោកស្រី Hua Chunying និយាយថា នាវាចិន តែងតែល្បាតនៅក្នុងដែនទឹកដែលជាប់ពាក់ព័ន្ធទាំងឡាយចំណែកការនេសាទត្រី ក៏ធ្វើឡើងជាធម្មតា នៅបរិវេណនោះដែរ ហើយស្ថានការណ៍នៅតំបន់នោះ ក៏មិនមានអ្វីប្រែប្រួលដែរ។ អ្នកនាំពាក្យដដែលបន្តថា ហ្វីលីពីន ក៏មិនត្រូវពន្លើសព័ត៌មាន ឬក៏ស្ថានការណ៍នៅសមុទ្រចិនខាងត្បូងនោះដែរ។
សូមបញ្ជាក់ថា ប្រជុំថ្មប៉ប្រះទឹក Scarborough Shoal គឺជាចំណុចក្ដៅនៃជម្លោះដែនដីរវាងចិន និងប្រទេសបួនទៀត។ តំបន់នេះមានចម្ងាយតែ២៣០គីឡូម៉ែតប៉ុណ្ណោះ ពីកោះ Luzonហើយកំពុងតែត្រូវបានគ្រប់គ្រងដោយចិន បន្ទាប់ពីការប៉ះទង្គិចក្នុងឆ្នាំ២០១២។ ដោយឡែកសាលក្រមតុលាការអន្តរជាតិ ថ្ងៃទី១២ ខែកក្កដា ក៏ទាត់ចោលការទាមទាររបស់ចិន ហើយការសាងសង់កោះសិប្បនិម្មិត គឺជារឿងខុសច្បាប់ ប៉ុន្តែក្រុងប៉េកាំងតែងតែប្រកាសថា ខ្លួនមិនទទួលស្គាលការសម្រេចនេះទេ៕
Tag:
ចិន
ហ្វីលីពីន
សមុទ្រចិនខាងត្បូង
© រក្សាសិទ្ធិដោយ thmeythmey.com