ជាតិ
ក្រសួងអប់រំជ្រើសរើសនិស្សិត១៣០នាក់ ស្នាក់នៅបណ្ដោះអាសន្នក្នុងមជ្ឈមណ្ឌលអន្តេវាសិកនិស្សិតនារី
×
ក្រសួងអប់រំ បានជូនដំណឹងស្ដីពីការជ្រើសរើសនិស្សិតនារីមកស្នាក់នៅបណ្ដោះអាសន្ន នៅមជ្ឈមណ្ឌលអន្តេវាសិកនិស្សិតនារីក្នុងឆ្នាំសិក្សា២០១៦-២០១៧ ចំនួន ១៣០នាក់។ ការស្នាក់នៅនេះ ផ្ដល់សម្រាប់និស្សិតនារីដែលកំពុងសិក្សាទាំងអាហារូបករណ៍ និងបង់ថ្លៃសិក្សា នៅតាមគ្រឹះស្ថានឧត្តមសិក្សាសាធារណៈនានាទាំងអស់។
ផ្អែកតាមសេចក្ដីជូនដំណឹងរបស់ក្រសួងអប់រំ លក្ខខណ្ឌនៃការជ្រើសរើសនិស្សិតនារីចំនួន ១៣០នាក់ ផ្តោតទៅលើនិស្សិតអាហារូបករណ៍ ឬបង់ថ្លៃកំពុងសិក្សានៅតាមគ្រឹះស្ថានឧត្តមសិក្សាសាធារណៈនានាក្នុងរាជធានីភ្នំពេញ។ ជាពិសេស និស្សិតនារីក្រីក្រ និងនិស្សិតនារីពិការមកពីខេត្តនានា ហើយបេក្ខនារីទាំងអស់ ត្រូវនៅលីវ មានវិន័យ និងសីលធម៌ល្អ។
សម្រាប់បេក្ខនារីដែលមានចំណាប់អារម្មណ៍ អាចយកពាក្យសុំស្នាក់នៅ និងដាក់ពាក្យសុំស្នាក់នៅដោយផ្ទាល់ខ្លួននៅតាមគ្រឹះស្ថានឧត្តមសិក្សារបស់ខ្លួន ចាប់ពីថ្ងៃផ្សាយដំណឹងនេះតទៅ រហូតដល់ថ្ងៃទី២៥ ខែវិច្ឆិកា ឆ្នាំ២០១៦។ ដោយឡែកការប្រកាសលទ្ធផល និងបិទផ្សាយនៅមជ្ឈមណ្ឌលអន្តេវាសិកនិស្សិតនារី បន្ទាប់ពីការសម្រេចរបស់គណៈកម្មការជ្រើសរើសរបស់ក្រសួងអប់រំ នាថ្ងៃទី១០ ខែធ្នូ ឆ្នាំ២០១៦។
សូមបញ្ជាក់ថា មជ្ឈមណ្ឌលអន្តេវាសិកនិស្សិតនារីមានទីតាំងនៅវិទ្យាស្ថានបច្ចេកវិទ្យាកម្ពុជា ហើយផ្ដល់សម្រាប់និស្សិតនារីឆ្នាំទី១ ឲ្យចូលមកស្នាក់នៅចំនួន ១៣០នាក់។ សម្រាប់ព័ត៌មានបន្ថែមបេក្ខនារីអាចទាក់ទងតាមទូរសព្ទ័ ០១២ ៨៣៧ ៥០៤/ ០១១ ៧៤៥ ២៧៧៕
© រក្សាសិទ្ធិដោយ thmeythmey.com