ប្រធានាធិបតីអាមេរិកជិតផុតអាណត្តិ បានបញ្ជាក់ថា លោកស្វាគមន៍ការរះត្រដែតឡើងរបស់មហាយក្សចិនដែលអាចនាំមកនូវសន្តិសុខ ស្ថិរភាព និងវិបុលភាពក្នុងតំបន់ ក្នុងនាមជាមហាអំណាចមួយដែលមានទំនួលខុសត្រូវ។ ហើយលោករំពឹងថា ប្រទេសផ្សេងទៀតនឹងទទួលបានប្រយោជន៍ពីការកើនឡើងនៃឥទ្ធិពលរបស់ចិននេះដែរ។
ស្របពេលដែលបណ្តាសម្ព័ន្ធមិត្តអាមេរិកនិងប្រទេសមួយចំនួនទៀតនៅអាស៊ីប៉ាហ្វិកបារម្ភពីការកើនឥទ្ធិពលរបស់ចិន មេដឹកនាំអាមេរិកបានព្យាយាមសម្រាលស្ថានការណ៍និងអះអាងឲ្យគ្រប់គ្នាទុកចិត្តថា ការរះត្រដែតឡើងរបស់ចិនមិនបង្កបញ្ហាទេ។
១.ឥទ្ធិពលចិនកើនឡើងល្អទេ?
ថ្លែងសុន្ទរកថានៅនាទីក្រុងវៀងចន្ទន៍ថ្ងៃ ៦ កញ្ញា លោក អូបាម៉ា បានលើកឡើងថា សហរដ្ឋអាមេរិកជឿជាក់ថា ការរះត្រដែតឡើងរបស់មហាយក្សចិន វានាំមកនូវសន្តិសុខ ស្ថិរភាព និងវិបុលភាពក្នុងតំបន់។ ហើយប្រទេសទាំងអស់លើពិភពលោកក៏អាចទាញប្រយោជន៍បានពីបញ្ហានេះដែរ។
«សហរដ្ឋអាមេរិកស្វាគមន៍ ការរះឡើងរបស់ចិនដែលមានសន្តិភាព, ស្ថិរភាព, និងមានវិបុលភាព ក៏ដូចជាក្លាយជាមហាអំណាចដែលមានទំនួលខុសត្រូវក្នុងការដោះស្រាយបញ្ហាអន្តរជាតិ។ នេះក៏ព្រោះថា យើងជឿជាក់ថា វានឹងផ្តល់ប្រយោជន៍ដល់យើងទាំងអស់គ្នា»។
លោក អូបាម៉ា បានពន្យល់ថា ទោះបីជាអាមេរិកនិងចិននៅបន្តមានការខ្វែងគំនិតគ្នាច្រើនជុំវិញបញ្ហាច្រើនក៏ដោយ សហរដ្ឋអាមេរិកនឹងនៅបន្តការកសាងសម្ព័ន្ធភាពជាមួយចិនដើម្បីប្រយោជន៍រួមគ្នា។ ប្រធានាធិបតីជិតផុតអាណត្តិរូបនេះបានលើកយកការសហការគ្នារវាងអាមេរិកនិងចិនក្នុងការដោះស្រាយបញ្ហាពិភពលោកជាច្រើនរួមទាំងបញ្ហានុយក្លេអ៊ែរអ៊ីរ៉ង់ផងដើម្បីធ្វើជាឧទាហរណ៍។
២.អាស៊ីនៅតែសំខាន់សម្រាប់អាមេរិក
យ៉ាងណាក៏ដោយសហរដ្ឋអាមេរិកកន្លងមកបានព្យាយាមបង្កើនទំនាក់ទំនងជាមួយបណ្តាប្រទេសក្នុងតំបន់អាស៊ីប៉ាស៊ី ក្នុងគោលបំណងទប់ទល់ការកើនឡើងនៃឥទ្ធិពលរបស់ក្រុងប៉េកាំង។ ក្នុងរយៈពេលជិត ៨ឆ្នាំមកនេះ គោលនយោបាយការបរទេសរបស់លោក បារ៉ាក់អូបាម៉ា គឺធ្វើយ៉ាងណាពង្រឹងឥទ្ធិពលរបស់អាមេរិកឡើងវិញតាមរយៈការពង្រឹងទំនាក់ទំនងនិងកិច្ចសហប្រតិបត្តិការជាមួយប្រទេសក្នុងតំបន់។ តួយ៉ាងការលើកស្ទួយភាពជាដៃគូជាមួយអាស៊ានទៅដៃគូយុទ្ធសាស្ត្រ និងការពង្រឹងចំណងយោធាជាមួយប្រទេសហ្វីលីពីន សិង្ហបុរី និងឥណ្ឌាផងដែរ។ ហើយរឿងដែលកត់សម្គាល់នោះ អាមេរិកក៏បានលូកដៃយ៉ាងជ្រៅក្នុងបញ្ហាសមុទ្រចិនខាងត្បូងថែមទៀត។
យ៉ាងណាមិញ ទាក់ទាក់បញ្ហាសមុទ្រចិនខាងត្បូង លោក បារ៉ាក់ អូបាម៉ា បានថ្លែងក្នុងឱកាសខាងលើផងដែរថា អាមេរិកនៅរក្សាគោលជំហររបស់ខ្លួនដែលចង់ឃើញភាគីពាក់ព័ន្ធដោះស្រាយបញ្ហាដោយសន្តិវិធីនិងគោរពច្បាប់អន្តរជាតិ។ អាមេរិកនៅបន្តហោះហើរ និងធ្វើនាវាចរណ៍នៅក្នុងតំបន់ទាំងឡាយណាដែលច្បាប់អន្តរជាតិដែលអនុញ្ញាតឲ្យ ហើយអាមេរិកក៏នៅបន្តគាំទ្រប្រទេសដទៃក្នុងការប្រើប្រាស់សេរីភាពនាវាចរណ៍និងហោះហើរដែរ៕