អន្តរជាតិ
បងធំអាស៊ាន ឥណ្ឌូណេស៊ី ចង់ធ្វើតាមហ្វីលីពីនរឿងបង្ក្រាបឈ្មួញគ្រឿងញៀន
× បើទោះជារងការរិះគន់ក្ដី យុទ្ធនាការបង្ក្រាបគ្រឿងញៀនរបស់ប្រធានាធិបតីថ្មីហ្វីលីពីន លោក Rodrigo Duterte ទទួលការគាំទ្រយ៉ាងខ្លាំងពីសំណាក់ប្រជាជនហ្វីលីពីន ដែលរងគ្រោះខ្លាំងដោយសារគ្រឿងញៀន។ ដោយមើលឃើញពីប្រសិទ្ធភាពក្នុងការបោសសម្អាតគ្រឿងញៀននៅហ្វីលីពីន នៅឥណ្ឌូណេស៊ីវិញ ប្រមុខស្ថាប័នបង្ក្រាបគ្រឿងញៀនប្រទេសនេះ ក៏មានផែនការកម្ចាត់គ្រឿងញៀនស្រដៀងនឹងហ្វីលីពីនដែរ។
សមាជិកអាស៊ាន ឥណ្ឌូណេស៊ី បានបង្ហាញផែនការបង្កើនប្រតិបត្តិការបោសសម្អាតគ្រឿងញៀន ដែលមានលក្ខណៈស្រដឿងគ្នានឹងយុទ្ធនាការកណ្ដាប់ដៃដែកក្នុងការបោសសម្អាតឈ្មួញគ្រឿងញៀនរបស់ហ្វីលីពីន។ ប្រធានអង្គភាពប្រឆាំងគ្រឿងញៀនឥណ្ឌូណេស៊ី បានរឹតបន្តឹងការកម្ចាត់គ្រឿងញៀន តាមរយៈការបង្កើនចំនួនកម្លាំងប៉ូលិស និងចំនួនអាវុធយុទ្ធភណ្ឌ។
ទាំងឥណ្ឌូណេស៊ី និងហ្វីលីពីន បានប្រកាសសង្គ្រាមប្រឆាំងនឹងការជួញដូរថ្នាំញៀន ដែលប៉ះពាល់ខ្លាំងដល់ប្រជាជន។ នៅឥណ្ឌូណេស៊ី រដ្ឋាភិបាលលោកប្រធានាធិបតី ចូកូ វីដូដូ បានដាក់ទោសប្រហារជីវិតលើឧក្រិដ្ឋជនគ្រឿងញៀនយ៉ាងច្រើន។ ចំណែកយុទ្ធនាការនៅហ្វីលីពីនវិញ គឺសាហាវជាងនៅឥណ្ឌូណេស៊ីទៅទៀត ដោយលោក Rodrigo Duterte បានបញ្ជាឲ្យប៉ូលិសនិងពលរដ្ឋ បាញ់សម្លាប់ឧក្រិដ្ឋជនគ្រឿងញៀន ដែលមកទល់ពេលនេះ មានមនុស្សច្រើនជាងពីរពាន់នាក់ បាត់បង់ជីវិត។
លោក Budi Waseso ប្រមុខទីភ្នាក់ងារប្រឆាំងគ្រឿងញៀន (BNN) បាននិយាយនៅថ្ងៃទី៥ ខែកញ្ញា ថា អង្គភាព BNN កំពុងស្ថិតក្នុងដំណើរការផ្គត់ផ្គង់អាវុធ បន្ថែមអ្នកស៊ើបអង្កេត និងឆ្កែហិតខ្លិន ស្របពេលដែលឥណ្ឌូណេស៊ី កំពុងបង្កើនការខិតខំប្រឹងប្រែងប្រឆាំងគ្រឿងញៀន។ លោក Budi បន្ថែមថា ប្រតិបត្តិការនេះអាចដូចអ្វីដែលកើតឡើងនៅហ្វីលីពីន ព្រោះស្ថានភាពគ្រឿងញៀន អាក្រក់ដូចគ្នា។
យ៉ាងណាមិញ យោងតាមទីភ្នាក់ព័ត៌មាន Reuters អ្នកនាំពាក្យ BNN និយាយ សម្រាល វិញថា យុទ្ធនាការកម្ចាត់គ្រឿងញៀនរបស់ឥណ្ឌូណេស៊ី នឹងមិនសាហាវពេកឡើយ ហើយ ការបោសសម្អាតគ្រឿងញៀន នឹងធ្វើទៅតាមច្បាប់ជាតិ និងអន្តរជាតិ។ នេះ គឺខុសពី ហ្វីលីពីន ដែលលោក Duterte ចេញបញ្ជាបាញ់សម្លាប់តែម្ដង។
តាមពិតទៅ យុទ្ធនាការបោសសម្អាតឈ្មួញគ្រឿងញៀននៅឥណ្ឌូណេស៊ី ក៏រងការរិះគន់ដែរ ពីសំណាក់សហគមន៍អន្តរជាតិ។ រដ្ឋាភិបាលឥណ្ឌូណេស៊ី បានប្រហារជីវិតឈ្មួញគ្រឿងញៀនរាប់សិបនាក់មកហើយ ដែលភាគច្រើនជាជនបរទេស បើទោះមានការស្នើសុំលើកលែងទោសពីសំណាក់ប្រទេសនៃជនជាតិនោះក៏ដោយចុះ៕
Tag:
ឥណ្ឌូណេស៊ី
ហ្វីលីពីន
គ្រឿងញៀន
© រក្សាសិទ្ធិដោយ thmeythmey.com