អន្តរជាតិ
ជប៉ុនទម្លាក់ជំនួយ ៤៤០លានដុល្លារដើម្បីប្រឆាំងភេរកម្មនៅអាស៊ី អនុរដ្ឋមន្ត្រីទទួលបន្ទុកគណរដ្ឋមន្ត្រីជប៉ុន Koichi Hagiuda
× ជប៉ុនបានប្រកាសផ្តល់ថវិកា ៤៤០លានដុល្លារសម្រាប់ជួយបណ្តាប្រទេសនៅអាស៊ីដើម្បីពង្រឹងសមត្ថភាពប្រឆាំងភេរវកម្មនាថ្ងៃពុធទី ៧ខែកញ្ញា។ គេមិនបានដឹងថា ជប៉ុនផ្តល់ជំនួយនេះដល់ប្រទេសអាស៊ីណាខ្លះឡើយ ប៉ុន្តែវាជាវិធានការដើម្បីទប់ស្កាត់ការគំរាមសន្តិសុខដែលបង្កដោយក្រុមភេរវជននៅអាស៊ី។
ការកើនឡើងនៃចលនាភេរវកម្មរួមទាំងការប៉ងបង្កើតសាខាថ្មីរបស់ក្រុមភេរវជនរដ្ឋឥស្លាមនៅអាស៊ីអាគ្នេយ៍ហាក់បីដូចជាបង្ហាញឲ្យឃើញច្បាស់ថា តំបន់អាស៊ីកំពុងរងគ្រោះថ្នាក់ខ្លាំង។ ហើយវានឹងអាចក្លាយជា សំបុកក្រុមភេរវជនផងបើសិនជាគ្មានចំណាត់ការត្រឹមត្រូវនិងទាន់ពេលវេលា។
ដោយសារបញ្ហានេះ នាយករដ្ឋមន្ត្រីជប៉ុនលោក ស៊ីនហ្សូ អាបេ បានប្រកាសផ្តល់ជំនួយដល់បណ្តាប្រទេសអាស៊ីចំនួន ៤៤០លានដុល្លារ ដើម្បីពង្រឹងសមត្ថភាពប្រឆាំងភេរវកម្ម ខណៈដែលលោកស្ថិតក្នុងកិច្ចប្រជុំជាមួយបណ្តាមេដឹកនាំអាស៊ាននាទីក្រុងវៀងចន្ទន៍ប្រទេសឡាវ។
យោងតាមទីភ្នាក់ងារព័ត៌មាន Reuters អនុរដ្ឋមន្ត្រីទទួលបន្ទុកគណរដ្ឋមន្ត្រីជប៉ុន Koichi Hagiuda បានស្រង់សម្តីលោក អាបេ ក្នុងពេលលោកជួបជាមួយមេដឹកនាំអាស៊ានថា៖« ជាពេលដំបូងបង្អស់ហើយដែលជប៉ុនគាំទ្រការប្រឆ្មាំងភេរវកម្មនិងប្រឆាំងរាល់ចលនាជ្រុលនិយមនៅអាស៊ី ជប៉ុននឹងរៀបចំកម្មវិធីជំនួយចំនួន ៣ដែលស្មើ៤៥ ពាន់លានយ៉េនក្នុងរយៈពេលបីឆ្នាំ»។
យ៉ាងណាក៏ដោយចុះ គេមិនទាន់អាចដឹងច្បាស់ថា តើជប៉ុនត្រៀមថវិកាដើម្បីផ្តល់ជំនួយដល់ប្រទេសណាខ្លះនៅតំបន់អាស៊ីដើម្បីប្រឆាំងភេរវកម្មឡើយ។ តែគម្រោងរបស់ក្រុងតូក្យួជួយប្រទេសអាស៊ានប្រឆាំងភេរវកម្មគឺផ្តោតសំខាន់លើការផ្តល់ជំនួយឧបករណ៍សំខាន់និងទំនើបៗដើម្បីរុករកគ្រឿងផ្ទុះ និងជំនួយបច្ចេកទេសសំខាន់ៗជាច្រើនផ្សេងទៀតដើម្បីជួយដល់ប្រទេសនៅអាស៊ី។
ដូចដែលបានបញ្ជាក់ខាងដើមស្រាប់ ចលនាភេររវកម្មកំពុងកើនឡើងនៅតំបន់អាស៊ី ហើយវាអាចនឹងកើតឡើងទ្រង់ទ្រាយធំដែរបើសិនជាមិនមានដំណោះស្រាយនិងវិធានការ។ ដូចឃើញហើយ គ្រាន់តែសប្តាហ៍មុន គេឃើញមានការវាយប្រហារដោយបំផ្ទុះគ្រាប់បែកនៅហ្វីលីពីន ដោយសម្លាប់មនុស្សអស់ ១៤ នាក់និងធ្វើឲ្យមនុស្សជាច្រើននាក់ផ្សេងទៀតរងរបួសផង។ក្រោយការវាយប្រហារ ក្រុមប្រដាប់អាវុធ Abu Sayyaf បានអះអាងថា ខ្លួននៅពីក្រោយចលនាវាយប្រហារនេះ។
ដោយសារបញ្ហានេះ លោក ស៊ីនហ្សូ អាបេ ក្នុងពេលជួបពិភាក្សាជាមួយប្រមុខរដ្ឋហ្វីលីពីនថ្មីលោក Duterte បានចូលរួមរម្លែកទុក្ខចំពោះការស្លាប់របស់ជនស៊ីវិលហ្វីលីពីននៅក្រុង Davao ដោយសារការបំផ្ទុះគ្រាប់បែក។ ហើយលោកក៏ថ្កោលទោសអំពើហិង្សាប្រដាប់អាវុធនេះដែរ៕
© រក្សាសិទ្ធិដោយ thmeythmey.com