អន្តរជាតិ
នយោបាយអន្តរជាតិ
កូរ៉េខាងត្បូង,ជប៉ុន ថ្កោលទោសការសាកល្បងនុយក្លេអ៊ែរផ្គើនសហគមន៍អន្តរជាតិរបស់កូរ៉េខាងជើង
×![]()
នាយករដ្ឋមន្ត្រីជប៉ុន ស៊ីនហ្សូអាបេ បានថ្កោលទោសការសាកល្បងក្បាលគ្រាប់នុយក្លេអ៊ែររបស់ក្រុងព្យុងយ៉ាងនៅថ្ងៃ សុក្រទី ៩ កញ្ញានេះ។ ចំណែកលោកស្រី ប៉ាក ហ្គឺនហេ បានថ្កោលទោសសកម្មភាពនេះ និងទូរសព្ទទៅលោក បារ៉ាក់ អូបាម៉ា ដើម្បីពិភាក្សាពីសកម្មភាពបង្ករឿងរបស់ក្រុងព្យុងយ៉ាងដែរ។
ក្រោយមានបាតុភូតរំញ័រនៅកូរ៉េខាងជើង ក្រុងព្យុងយ៉ាងបានប្រកាសទទួលស្គាល់ថាខ្លួនបានបាញ់សាកល្បងក្បាលគ្រាប់នុយក្លេអ៊ែរមែននៅថ្ងៃសុក្រនេះ។ យោងតាមទីភ្នាក់ងារព័ត៌មាន AFP ប្រធានាធិបតីកូរ៉េខាងត្បូង ប៉ាក ហ្គឺនហេ ក៏បានថ្កោលទោសការសាកល្បងក្បាលគ្រាប់នុយក្លេអ៊ែររបស់ក្រុងព្យុងយ៉ាងដែរ ហើយលោកស្រីបានថ្លែងថា កូរ៉េខាងជើងកំពុងធ្វើសកម្មភាពដែលបំផ្លាញខ្លួនឯង និងកាន់តែឯកោនៅលើឆាកអន្តរជាតិ។
ក្រៅពីថ្កោលទោស ការិយាល័យប្រធានាធិបតីកូរ៉េខាងត្បូងបានប្រកាសដែរថា លោកស្រី ប៉ាក ហ្គឺនហេ បានទូរសព្ទទៅពិភាក្សាជាមួយលោក បារ៉ាក់ អូបាម៉ា ដែរជុំវិញការសាកល្បងក្បាលគ្រាប់នុយក្លេអ៊ែរនេះ។
មេដឹកនាំទាំងពីរបានចំណាយពេល ៥០នាទីដើម្បីជជែកគ្នា។ ពេលពិភាក្សាគ្នាលោក អូបាម៉ាកំពុងស្ថិតនៅលើយន្តហោះ Air Force One ដែលហោះឆ្ពោះទៅសហរដ្ឋអាមេរិក ក្រោយបញ្ចប់កិច្ចប្រជុំនៅឡាវ។
ភ្លាមៗនោះដែរ ប្រមុខរដ្ឋាភិបាលជប៉ុនបានចេញសេចក្តីថ្លែងការណ៍ថ្កោលទោសការសាកល្បងក្បាលគ្រាប់នុយក្លេអ៊ែរនេះដែរ។ យោងតាមទីភ្នាក់ងារព័ត៌មាន AFP នាយករដ្ឋមន្ត្រីជប៉ុនបាននិយាយក្នុងសេចក្តីថ្លែងការណ៍របស់លោកថា៖«ការបាញ់សាកល្បងនុយក្លេអ៊ែររបស់កូរ៉េខាងជើងជារឿងមិនអាចទទួលយកបានឡើយសម្រាប់ជប៉ុន»។
សេចក្តីថ្លែងការណ៍ដដែលបានបន្តថា៖«ការអភិវឌ្ឍអាវុធនុយក្លេអ៊ែរកូរ៉េខាងជើងកំពុងក្លាយជាការគំរាមកំហែងយ៉ាងធំសម្រាប់សុវត្ថិភាពជប៉ុននិងបំផ្លាញសន្តិភាពនិងសន្តិសុខក្នុងតំបន់និងពិភពលោកទាំងមូល»។
តាមពិតទៅ ការសាកល្បងនុយក្លេអ៊ែរនេះ បើរាប់ទៅវាជាលើកទីប្រាំហើយ។ បើតាមទីភ្នាក់ងារព័ត៌មានកូរ៉េ Yonhap ក្រុងព្យុងយ៉ាងបានប្រកាសជាថ្មីថា ខ្លួននឹងនៅបន្តអភិវឌ្ឍកម្មវិធីនុយក្លេអ៊ែរបស់ខ្លូនទៀត។ កូរ៉េខាងជើងកំពុងព្យាយាមផ្គើនសហគមន៍អន្តរជាតិជាពិសេសប្រទេសជិតខាងដូចជាជប៉ុននិងកូរ៉េខាងត្បូង រួមទាំងសហរដ្ឋអាមេរិកផង។
សូមបញ្ជាក់ថា ការបាញ់សាកល្បងនុយក្លេអ៊ែររបស់ក្រុងព្យុយ៉ានេះកើតឡើងក្រោយពេលដែលបណ្តាសមាជិកកិច្ចប្រជុំកំពូលអាស៊ីបូព៌ាទាំង ១៨ បង្ហាញការបារម្ភខ្លាំងពីការបាញ់សាកល្បងអាវុធរបស់កូរ៉េខាងជើង។ ប្រទេសទាំងអស់បានទទូចឲ្យក្រុងព្យុងយ៉ាងរក្សាឲ្យបាននូវកាតព្វកិច្ចគោរពច្បាប់អន្តរជាតិនិងដំណោះស្រាយក្រុមប្រឹក្សាសន្តិសុខ៕
© រក្សាសិទ្ធិដោយ thmeythmey.com
