ពីនេះ ពីនោះ
គួរប្រើពាក្យ«ស្ត្រី» ជំនួសពាក្យ«ស្រី»
× ជារឿយៗ គេតែងតែលឺមហាជនមួយចំនួនប្រើប្រាស់«ស្រី» ជំនួសពាក្យ«ស្ត្រី», អ្នកនាង, នារី ឬអ្នកស្រី។ល។ ពាក្យ«ស្រី» និង«ស្ត្រី» មានន័យ ជារួម ដូចគ្នា តែខ្លឹមសារ ដោយឡែក អាចខុសគ្នាបន្តិច។ កាលណា គេប្រើប្រាស់ពាក្យ«ស្រី» វាច្រើនបង្កប់អត្ថន័យមិនសូវល្អទេ។ ឧទាហរណ៍ថា «ស្រី»នេះ ខ្ជិលណាស់។ «ស្រី»នេះ ដើរយប់ច្រើនណាស់។ ជារួម ពាក្យ«ស្រី» ហាក់បីដូចជាបង្កប់នូវន័យមួយមិនល្អ។ តែប្រើប្រាស់ពាក្យ«អ្នក»បន្ថែម ឲ្យទៅជា«អ្នកស្រី» អត្ថន័យវាមិនអីទេ។
ពាក្យ«ស្ត្រី» វិញ គឺជាពាក្យហៅ ឬនិយាយទៅ ហាក់បីដូចជា លើកតម្លៃ«ស្ត្រី»ជារួម។ ឧទាហរណ៍ថា «ស្ត្រី» រូបនេះ មានរាងស្អាត និងសម្តីរួសរាយល្អណាស់។ «ស្ត្រី»មេផ្ទះរូបនេះ ចេះដាំស្លឆ្ងាញ់ណាស់។ល។
ដូច្នេះ ក្នុងនាមជាសុភាពបុរសខ្មែរគួរប្រើប្រាស់ពាក្យ«ស្ត្រី» ជំនួសពាក្យ«ស្រី»វិញ បើទោះបីជានារីខ្មែរមិនទាមទារឲ្យប្រើប្រាស់ពាក្យ«ស្ត្រី»ក៏ដោយ។ កាលណាបុរសខ្មែរប្រើប្រាស់ពាក្យ«ស្ត្រី» ពេលនោះ នារីក៏មានតម្លៃ ហើយអ្នកប្រើប្រាស់ពាក្យនោះ ក៏មានតម្លៃដែរ៕
© រក្សាសិទ្ធិដោយ thmeythmey.com