ជាតិ
បទយកការណ៍ / បទសម្ភាសន៍
×![]()
ភ្នំពេញ៖ លោក ធា គីមហេង គឺជាបេក្ខជនអាហារូបករណ៍ Chevening របស់រដ្ឋាភិបាលចក្រភពអង់គ្លេស និងទទួលបានពិន្ទុ IELTS ៧.៥។ ក្រៅពីមានអាជីពជាអ្នកបកប្រែភាសាអង់គ្លេស លោក ក៏ជាគ្រូបង្រៀនភាសាអង់គ្លេស នៅសាកលវិទ្យាល័យបញ្ញាសាស្ត្រកម្ពុជា និងសាកលវិទ្យាល័យភូមិន្ទភ្នំពេញផងដែរ។ មុនឡើងយន្តហោះទៅជាន់ទឹកដីប្រទេសមហាអំណាច គីម ហេង បានប្រាប់គន្លឹះមួយចំនួន ក្នុងការសិក្សាភាសាអង់គ្លេស និងទទួលបានអាហារូបករណ៍បរទេស។ 
«និស្សិតខ្មែរយើងភាគច្រើន គឺមានភាពខ្មាសអៀនច្រើន។ តាមពិតពួកគេចេះ តែពួកគេមិនហ៊ាននិយាយជាមួយជនបរទេស»។ នេះជាការលើកឡើងរបស់ គីមហេង ចំពោះភាពអសកម្មរបស់និស្សិតខ្មែរ ដែលតែងតែខ្មាសអៀនក្នុងការនិយាយភាសាអង់គ្លេស។ លោកថា នេះជាចំណុចដ៏សំខាន់ ដែលជាឧបសគ្គរារាំងការអភិវឌ្ឍចំណេះដឹងភាសាអង់គ្លេស។ អតីតនិស្សិតជំនាញអប់រំ នៅវិទ្យាស្ថានភាសាបរទេស(IFL)រូបនេះ បានប្រាប់សារព័ត៌មានថ្មីៗថា ការស្រាវជ្រាវខ្លួនឯង ដូចជា ការអានសៀវភៅភាសាអង់គ្លេសឲ្យបានច្រើន ស្តាប់ចម្រៀង និងមើលភាពយន្តឯកសារជាភាសាអង់គ្លេស គឺជាគន្លឹះដ៏សំខាន់ក្នុងការអភិវឌ្ឍភាសាអង់គ្លេស។ បន្ថែមនេះ លោកថា ការស្រាវជ្រាវពាក្យថ្មីៗ ដើម្បីឲ្យនិយមន័យឲ្យបានច្បាស់លាស់ និងត្រឹមត្រូវ ក៏ជារឿងមិនគួរមើលរំលងឡើយ។
ក្រៅពីមានអាជីពជាគ្រូបង្រៀនភាសាអង់គ្លេស បច្ចុប្បន្ន លោក ធា គីមហេង បានទទួលអាហារូបករណ៍អនុបណ្ឌិតជំនាញ English Teaching នៅសាកលវិទ្យាល័យ Nottingham Trent របស់ចក្រភពអង់គ្លេស។ កំពុងចូលរួមពិធីអបអរសាទរនិស្សិតជ័យលាភីនៅស្ថានទូតចក្រភពអង់គ្លេសប្រចាំកម្ពុជា ដែលមាននិស្សិតជ័យលាភីចំនួន២០នាក់ ក្នុងនោះមានឪពុកម្តាយនិស្សិត ឯកអគ្គរាជទូតចក្រភពអង់គ្លេសប្រចាំកម្ពុជា និងមន្ត្រីជាន់ខ្ពស់ក្រសួងអប់រំចូលរួមផងដែរនោះ លោក គីមហេង បានប្រាប់សារព័ត៌មានថ្មីថា អាហារូបករណ៍ Chevening របស់ចក្រភពអង់គ្លេសនេះ គឺ មានការឧបត្ថម្ភ ដូចជា សំបុត្រយន្តហោះទៅមក ប្រាក់ប្រចាំខែ និងថ្លៃចំណាយផ្សេងៗ ដើម្បីផ្គត់ផ្គង់ការសិក្សារយៈពេលមួយឆ្នាំតែម្តង។
ពាក់អាវធំពណ៌ខ្មៅ ក្រោមពន្លឺភ្លើងពណ៌មាស អ្នកភ្នំពេញរូបនេះ បាននិយាយទាំងទឹកមុខរីករាយ និងសម្តីច្បាស់ៗ ថា នៅពេលបញ្ចប់ការសិក្សានៅចក្រភពអង់គ្លេស លោកនឹងវិលមកមាតុភូមិវិញ ដើម្បីធ្វើការងារផ្នែកអប់រំ នៅក្រសួងអប់រំ យុវជន និងកីឡា ដើម្បីរួមចំណែកក្នុងការអភិវឌ្ឍធនធានមនុស្សកម្ពុជា ឲ្យកាន់តែសម្បូរបែបបន្ថែមទៀត។
មុនឡើងយន្តហោះនៅបន្តការសិក្សានៅចក្រភពអង់គ្លេស បុរសវ័យ២៤ឆ្នាំរូបនេះ បានបង្ហើបថា ដើម្បីទទួលបានអាហារូបករណ៍ទៅបរទេស និស្សិតគួរស្វែងយល់ឲ្យបានច្បាស់ពីប្រភេទអាហារូបករណ៍ និងព្យាយាមបំពេញលក្ខខណ្ឌអាហារូបករណ៍ ឲ្យបានគ្រប់ តាមអ្វីដែលគេត្រូវការ។ មួយវិញទៀត ការស្វែងរកការងារស្ម័គ្រចិត្ត ឬការងារដែលទទួលបានប្រាក់បៀវត្សរយៈ២ឆ្នាំ ដើម្បីសន្សំបទពិសោធន៍ និងពង្រឹងសមត្ថភាព គឺជាលក្ខខណ្ឌសំខាន់របស់អាហារូបករណ៍ Chevening ។ បន្ថែមពីនេះ និស្សិតគួរស្វែងរកព័ត៌មានអាហារូបករណ៍នៅតាមគេហទំព័ររបស់ក្រសួងអប់រំ យុវជន និងកីឡា និងស្ថានទូតដែលខ្លួនចង់ទៅបន្តការសិក្សានៅប្រទេសទាំងនោះ។ ជាងនេះទៅទៀត ការតាំងចិត្ត និងការព្យាយាម ដោយមិនបាក់ទឹកចិត្តចំពោះភាពបរាជ័យ គឺជាគន្លឹះសំខាន់ជាងគេ ដើម្បីឈានជើង ឆ្ពោះទៅឈោងចាប់អាហារូបករណ៍បរទេស៕
Tag:
ធា គីមហេង
អាហារូបករណ៍
IELTS
© រក្សាសិទ្ធិដោយ thmeythmey.com
