ពីនេះ ពីនោះ
«ពាក្យរៀល» គឺជាក្បួនច្រៀងចួនរណ្តំរបស់ខ្មែរ ដែលមានលក្ខណៈដូច «Hip Hop»
× ភ្នំពេញ៖ ខ្មែរជាទូទៅ ទៅហើយដែលយល់ឃើញថា ចម្រៀង ហ៊ីបហប «Hip Hop» ដែលអ្នកចម្រៀងច្រៀងសព្វថ្ងៃ ថាជាប្រភេទបទចម្រៀង ដែលចម្លងពីបរទេស។ ប៉ុន្តែតាមពិតខ្មែរក៏មានក្បួនច្រៀង ចម្រៀងនេះដោយខ្លួនឯងផងដែរ ដែលអ្នកនិពន្ធជំនាន់ចាស់លោកហៅថា «ពាក្យរៀល»។
លោក វ៉ែន សុន ដែលជាកវីជើងចាស់ ចាប់តាំងពីទសវត្សរ៍ ឆ្នាំ១៩៦០ បានបញ្ជាក់ថា បទចម្រៀងប្រភេទនេះ ខ្មែរមានតាំងពីយូរយារណាស់មកហើយ ហើយចង្វាក់ដែលគេច្រៀងគឺមិនខុសនោះទេ។ ក្នុងបទសម្ភាសន៍ជាមួយអ្នកសារព័ត៌មានថ្មីៗ លោកបានបញ្ជាក់ថា សម្រាប់បរទេសគេហៅចម្រៀង«Hip Hop» ប៉ុន្តែនៅក្នុងក្បួនចម្រៀងខ្មែរ គេហៅថា «ពាក្យរៀល»។
វចនានុក្រមខ្មែររបស់សម្ដេចព្រះសង្ឃរាជ ជួន ណាត ក៏បានរៀបរាប់ផងដែរ អំពីអត្ថន័យនៃ«ពាក្យរៀល»នេះ។ ពាក្យរៀល ជាគុណនាម មានន័យថា ដែលមានចួនរណ្ដំពីមួយទៅមួយតៗគ្នារាល់ឃ្លា។ ឧទាហរណ៍៖ ចេះមិនឈ្នះចង់ ត្រង់មិនឈ្នះទាល់ កលមិនឈ្នះគិត ឫទ្ធិមិនឈ្នះរោគ លោកមិនឈ្នះលាញ ទាញមិនឈ្នះទៅ នៅមិនឈ្នះនាង រាងមិនឈ្នះរាគ លាកមិនឈ្នះលោភ ល្មោភមិនចេះល្មម ព្រមមិនឈ្នះព្រេង...ជាដើម។ (ពាក្យឧកញ៉ាសុត្តន្តប្រីជាអិន)។
បន្ថែមពីនេះ ស្មេរជើងចាស់រូបនេះ ក៏បានអះអាងផងដែរថា អ្នកដែលច្រៀង«Hip Hop» បច្ចុប្បន្នប្រហែលមិនស្គាល់ថាអ្វីទៅជា«ពាក្យរៀល»នោះទេ។ ប៉ុន្តែដោយសារមានឥទ្ធិពលមកពីខាងក្រៅ អ្នកចម្រៀងនាំគ្នាទទួលយកមកច្រៀង ហើយចាត់ទុកថាជាបទបរទេស ដោយព្យាយាមធ្វើឲ្យមានជាពណ៌សម្បុរខ្មែរ។
លោក វ៉ែន សុន បានបញ្ជាក់ដែរថា អ្នកចម្រៀង«Hip Hop» ខ្មែរបើយកតែ«ពាក្យរៀល» មកប្រើគឺមិនខុសនោះទេ ហើយមានចួនរណ្ដំត្រឹមត្រូវតាមក្បួនទៀតផង៕
© រក្សាសិទ្ធិដោយ thmeythmey.com