កីឡាជាតិ
ជាតិ
ក្នុងជំនួបជាមួយអូស្ត្រាលី U19 កម្ពុជាបង្ហាញភាពរឹងមាំ តែធ្លាយ២គ្រាប់ក្នុងចន្លោះពេល៣នាទី
× ក្រុមយុវជនជម្រើសជាតិអាយុក្រោម១៩ឆ្នាំកម្ពុជាបានចាញ់ក្រុមយុវជនជម្រើសជាតិអូស្ត្រាលី ២-០ ក្នុងថ្ងៃប្រកួតបើកឆាកពូលB នៃពានរង្វាន់ AFF U19 Championship 2016 កាលពីយប់មិញនៅទីក្រុងហាណូយប្រទេសវៀតណាម។ ចំណែក U19 ថៃបានយកឈ្នះ U19 ឡាវ ២-១ និង U19 មីយ៉ាន់ម៉ា យកឈ្នះ U19 ឥណ្ឌូនេស៊ី ៣-២។
នាជំនួបដ៏ស្វិតស្វាញរវាងក្រុមជម្រើសជាតិ U19 កម្ពុជា និងក្រុម U19 អូស្ត្រាលីនៅកីឡដ្ឋាន Vietnam Youth Training Centre ក្នុងក្រុងហូជីមិញកាលពីយប់មិញ។ ក្នុងតង់ទី១ក្រុមទាំងពីរបានធ្វើការប្រកួតវាយបកដាក់គ្នាទៅវិញទៅមកនិងបានបង្កើតឱកាសទម្លុះសំណាញ់ទីរៀងៗខ្លួន ប៉ុន្តែនៅតែមិនអាចរកគ្រាប់បាល់បានជូនក្រុម។
លុះដល់ទង់ទី២ដោយសារកម្ពស់ និងមាឌរបស់ U19 អូស្ត្រាលីបានធ្វើឲ្យក្រុម U19 កម្ពុជាហាក់ដូចជាមានការចាញ់ប្រៀបបានថមថយនូវកម្លាំង និងសន្ទុះនៃការវាយបក។ ការប្រកួតប្រព្រឹត្តទៅបានត្រឹមតែជាង១០នាទីកីឡាករ Blackwood បានសម្រេចគ្រាប់បាល់នាំមុខសម្រាប់អូស្ត្រាលីនៅនាទី៦៥។ ៣នាទីក្រោយមកកីឡាកររូបនេះបានសម្រេចគ្រាប់បាល់ទី២ ដើម្បីជួយឲ្យក្រុម U19 អូស្ត្រាលីនាំមុខ U19 កម្ពុជា ២-០ នៅនាទី៦៨។ ពីរគ្រាប់របស់ខ្សែប្រយុទ្ធរូបនេះបានជួយឲ្យក្រុម U19 អូស្ត្រាលីយកឈ្នះលើក្រុម U19 កម្ពុជាក្នុងលទ្ធផល ២-០។
មុនកម្ពុជាចាញ់អូស្ត្រាលី ២-០ ក្នុងពូលB ជាមួយគ្នានេះ ក្រុមយុវជនជម្រើសជាតិ U19 ថៃ បានយកឈ្នះលើក្រុមយុវជនជម្រើសជាតិ U19 ឡាវក្នុងលទ្ធផល ២-១។ ជ័យជម្នះរបស់ U19 ថៃ គឺសម្រេចដោយកីឡាករ Worachit Kanitsribampen មួយគ្រាប់នៅនាទី២៦ មុនកីឡាករ Supachai Jaided សម្រេចគ្រាប់ទី២នៅនាទី៦០។ ចំណែកមួយគ្រាប់របស់ឡាវ សម្រេចដោយកីឡាករ Maitee នៅនាទី៤២។
ជាមួយគ្នានេះ ក្រុមយុវជនជម្រើសជាតិ U19 មីយ៉ាន់ម៉ា បានយកឈ្នះក្រុមយុវជនជម្រើសជាតិ U19 ឥណ្ឌូនេស៊ី ក្នុងលទ្ធផល ៣-២។ ជ័យជម្នះរបស់មីយ៉ាន់ម៉ានេះសម្រេចដោយកីឡាករ Aung Kaung Mann, Zwee Thet Paing និងកីឡាករ Shwe Ko ម្នាក់១គ្រាប់នៅនាទី១១, ២៦ និង៥៥។ ចំណែក២គ្រាប់របស់ឥណ្ឌូនេស៊ីសម្រេចម្នាក់១គ្រាប់ដោយកីឡាករ Pandi Goal និងកីឡាករ Sandi Goal នៅនាទី១៦ និង៤២៕
Tag:
បាល់ទាត់
U19
AFF U19 Championship 2016
© រក្សាសិទ្ធិដោយ thmeythmey.com