Tokyo Skytree អគារប៉មដែលខ្ពស់ជាងគេលើពិភពលោក

អន្តរជាតិ

Tokyo Skytree អគារប៉មដែលខ្ពស់ជាងគេលើពិភពលោក

15, Sep 2016 , 3:44 pm

រូបភាព

ដោយ: ថ្មីៗ

Tokyo Skytree គឺជាអគារប៉មខ្ពស់ជាងគេលើលោកដែលស្ថិតនៅក្នុងតំបន់ Sumida ក្រុងតូក្យូ ប្រទេសជប៉ុន។ អាគារកម្ពស់៦៣៤ម៉ែត្រនេះ ត្រូវបានបញ្ចូលឈ្មោះក្នុងសៀវភៅកំណត់ត្រាពិភពលោក «Guinness World Records» កាលពីឆ្នាំ២០១១ ក្នុងនាមជា «ប៉មដែលខ្ពស់ជាងគេលើពិភពលោក» (The Tallest Tower in The World) ជំនួស Canton Tower របស់ចិន។

រចនាដោយក្រុមហ៊ុនស្ថាបត្យកម្ម Nikken Sekkei អាគារ Tokyo Skytree ត្រូវបានចាប់ផ្តើមសាងសង់នៅឆ្នាំ២០០៨ ហើយបញ្ចប់ផ្លូវការនៅដើមឆ្នាំ២០១២ មុននឹងបើកឲ្យដំណើរការនៅថ្ងៃទី២២ ខែឧសភា ឆ្នាំ២០១២ ។ ក្រុមហ៊ុន Tobu Tower Skytree Co.,Ltd. បានប្រើទឹកប្រាក់លើការសាងសង់អស់ប្រមាណ៨០៦លានដុល្លារអាមេរិក។

បើគិតតែតួប៉ម Tokyo Skytree មានកម្ពស់ខ្ពស់ជាងគេលើលោក ប៉ុន្តែបើផ្អែកលើសំណង់ទូទៅ វាស្ថិតក្នុងចំណាត់ថ្នាក់ទីពីរ បន្ទាប់ពីអាគារ Burj Khalifa នៅក្នុងទីក្រុងឌូបៃ ដែលមានកម្ពស់៨២៩.៨ម៉ែត្រ។ កម្ពស់៦៣៤ម៉ែត្រមិនមែនជារឿងចៃដន្យនោះឡើយ ដោយលេខនេះ ទាក់ទងនឹងពាក្យ Musahi (Mu=៦, Sa=៣, Shi=៤)។ Musahi គឺឈ្មោះតំបន់ប្រវត្តិសាស្ត្រមួយនៅក្នុងប្រទេសជប៉ុន។

មានកម្ពស់២៩ជាន់ និងជញ្ជើយន្តចំនួន១៣ អាគារ Tokyo Skytree ជាបណ្តុំនៃស្ថានីយប្រព័ន្ធផ្សព្វផ្សាយ (វិទ្យុ និងទូរទស្សន៍) ទូរគមនាគមន៍ ទីផ្សារទំនិញ និងភោជនីយដ្ឋាន ជាដើម។ បន្ថែមពីលើនេះ គេមើលឃើញនូវទិដ្ឋភាពទាំងមូលនៅក្នុងទីក្រុងតូក្យូ ដែលចេញពី Tokyo Skytree ដោយមានមនុស្សរាប់ម៉ឺននាក់ចូលទស្សនាជារៀងរាល់ថ្ងៃ៕