អន្តរជាតិ
សម្ព័ន្ធមិត្តមិនទុកចិត្តអាមេរិកដែលចាប់ដៃរុស្ស៊ី ដោះស្រាយបញ្ហាសង្គ្រាមស៊ីរី?
× ក្រុងវ៉ាស៊ីនតោន និងក្រុងមូស្គូបន្តចោទប្រកាន់គ្នាទៅវិញទៅមករឿងខ្វះឆន្ទៈអនុវត្តបទឈប់បាញ់នៅស៊ីរី។ ចាប់តាំងពីកិច្ចព្រមព្រៀងផ្អាកប្រយុទ្ធចូលជាធរមានតាំងពីថ្ងៃចន្ទ គូភាគីរំលោភបំពានកិច្ចព្រមព្រៀងជាច្រើនដង តែរុស្ស៊ីព្យាយាមទម្លាក់កំហុសលើអាមេរិកនិងក្រុមឧទ្ទាម។ បច្ចុប្បន្នអាមេរិកកំពុងរងសម្ពាធខ្លាំង ដោយសារសម្ព័ន្ធមិត្តអឺរ៉ុបដូចជាបារាំងមិនសូវទុកចិត្តអាមេរិក ហើយទាមទារឲ្យអាមេរិកបង្ហាញកិច្ចព្រមព្រៀងលម្អិតដែលខ្លួនឯកភាពជាមួយរុស្ស៊ីទៀត។ ហើយក្រុមឧទ្ទាមខ្លះបារម្ភដែរថា អាមេរិកកំពុងព្យាយាមដោះដៃចោលខ្លួនដែរ។
យន្តហោះចម្បាំងជាច្រើនគ្រឿងបានបន្តវាយប្រហារលើទីតាំងជនស៊ីវិលរស់នៅក្រុង Al-Mayadin ភាគខាងកើតខេត្ត Deir Ezzor ថ្ងៃព្រហស្បតិ៍ទី ១៥ កញ្ញា ទោះបីជាបទឈប់បាញ់ថ្មីបានចូលជាធរមានតាំងពីថ្ងៃចន្ទ ទី១២កញ្ញា ក៏ដោយចុះ។ មនុស្ស ២៣នាក់បានស្លាប់ក្នុងនោះមានកុមារ៩នាក់ផងផង។ តែក្រុមឃ្លាំមើលសិទ្ធិមនុស្សស៊ីរី បានបញ្ជាក់ថា ខ្លួនមិនបានដឹងច្បាស់ថា យន្តហោះចម្បាំងដែលចេញប្រតិបត្តិការនេះជារបស់ភាគីណាមួយឡើយ។
បើតាមទីភ្នាក់ងារព័ត៌មានរុស្ស៊ី TASS ក្រសួងការពារជាតិរុស្ស៊ីបានអះអាងថា បទឈប់បាញ់ដែលកំពុងស្ថិតនៅជាធរមានត្រូវបានគេបំពាន ៤៥ដងក្នុងរយៈពេល២៤ម៉ោងសោះ។ ក្រសួងនេះបានចោទប្រកាន់ក្រុមភេរវជន និងបណ្តាក្រុមឧទ្ទាមដែលអាមេរិកគាំទ្រថាបានបំពានកិច្ចព្រមព្រៀង។ ហើយរដ្ឋាភិបាលរុស្ស៊ីដែលជាសហស្ថាបនិកនៃបទឈប់បាញ់ស៊ីរី ក៏បានចោទប្រកាន់អាមេរិកពេញៗមាត់ដែរថា អាមេរិកមិនបានបំពេញកាតព្វកិច្ចរបស់ខ្លួនឲ្យបានត្រឹមត្រូវតាមការកំណត់ក្នុងកិច្ចព្រមព្រៀងព្រៀងឡើង។
យ៉ាងណាក៏ដោយចុះ រុស្ស៊ីបានអួតថា រដ្ឋាភិបាលស៊ីរី បានបំពេញកាតព្វកិច្ចត្រឹមត្រូវតាមការកំណត់ក្នុងកិច្ចព្រមព្រៀងរួចរាល់ហើយ នៅឡើយតែភាគីក្រុមឧទ្ទាមប៉ុណ្ណោះ។ ចំណែកក្រុងវ៉ាស៊ីនតោន មិនបាននិយាយអ្វីច្រើនឡើយ តែមហាអំណាចនេះទទួលស្គាល់ថា បទឈប់បាញ់ត្រូវបានគូភាគីទាំងសងខាងរំលោភបំពានមែន។ ប៉ុន្តែយ៉ាងហោចណាស់ អាមេរិកនិងរុស្ស៊ីប្តេជ្ញាថាខ្លួននឹងបន្តជ្រោមជ្រែង និងបន្ថែមពេលអនុវត្តកិច្ចព្រមព្រៀងនេះ ថ្វីបើវាផុយស្រួលបន្តិចមែន។
សូមទាញការចាប់អារម្មណ៍បន្តិចដែរថា ខ្លឹមសារភាគច្រើននៃបទឈប់បាញ់ថ្មីយោងតាមបទឈប់បាញ់ដែលអាមេរិកនិងរុស្ស៊ីបង្កើតកាលពីខែកុម្ភៈដែរ។ ហើយ ក្រោមអំណាចនៃបទឈប់បាញ់នេះ រាល់ភាគីទាំងអស់ត្រូវបញ្ចប់ឲ្យបាននូវការបាញ់បោះ លួចវាយឆ្មក់ ឬទម្លាក់គ្រាប់បែកជាដើម ក្នុងរយៈពេល ៧ថ្ងៃ ហើយភាគីពាក់ព័ន្ធចាប់ផ្តើមចែកចាយជំនួយមនុស្សធម៌ទៅដល់បណ្តាប្រជាជនស៊ីរីដែលរងគ្រោះជាពិសេសនៅក្រុង Aleppo ដែលមានប្រជាជន៣សែននាក់រស់នៅ ។ ចំណែក ក្រុមឧទ្ទាមដែលអាមេរិកគាំទ្រត្រូវផ្តាច់ទំនាក់ទំនងឲ្យអស់ជាមួយក្រុមភេរវកម្ម Jabhat al-Nusra ព្រោះពួកគេនឹងត្រូវចូលរួមក្នុងការចរចានិងពិភាក្សាស្វែងរកសន្តិភាពនៅពេលខាងមុខទៀត។
បើសិនគ្មានហិង្សាប្រដាប់អាវុធក្នុងពេល ៧ថ្ងៃ រដ្ឋាភិបាលរុស្ស៊ី និងអាមេរិកនឹងចាប់ផ្តើមបង្កើត«មជ្ឈមណ្ឌលអនុវត្តដំណោះស្រាយរួម» ដែលសំដៅលើក្រុមការងារបង្កើតការសហប្រតិបត្តិការយោធារវាងមហាអំណាចទាំងពីរក្នុងប្រយុទ្ធប្រឆាំងក្រុមជ្រុលនិយម Jabhat al-Nusra និងក្រុមភេរវជនរដ្ឋឥស្លាម។ ក្រោយមានការសហការគ្នាល្អប្រសើរកម្ចាត់ភេរវជនហើយ ភាគីជម្លោះ និងភាគីពាក់ព័ន្ធនឹងចាប់ផ្តើមពិភាក្សានិងចរចាគ្នាដំណោះស្រាយនយោបាយបន្តទៀត។ ប៉ុន្តែ ប្រមុខការទូតប្រទេសទាំងពីរមិនបញ្ចេញចំណុចសម្ងាត់ច្រើនទៀតដែលមានចែងក្នុងកិច្ចព្រមព្រៀងនេះអស់ឡើយ ក្រោមហេតុផលរក្សាទំនុកចិត្តរវាងភាគី។
១.អាមេរិកកំពុងផុងខ្លួន ចាញ់ប្រៀបរុស្ស៊ី?
ដោយឡែក ក្រៅពីរងការចោទប្រកាន់ពីសំណាក់រុស្ស៊ី អាមេរិកកំពុងប្រឈមបញ្ហាមួយទៀតគឺបាត់បង់ទំនុកចិត្តពីសំណាក់សម្ព័ន្ធមិត្តនិងក្រុមឧទ្ទាម។ អាមេរិកលបលួចទៅចរចាជាមួយរុស្ស៊ីស្ងាត់ៗដើម្បីបង្កើតកិច្ចព្រមព្រៀងមួយរួមគ្នា ដោយមិនឲ្យសម្ព័ន្ធមិត្តអាមេរិកនៅអឺរ៉ុប និងក្រុមឧទ្ទាមស៊ីរីដឹង ។ សម្ព័ន្ធមិត្តអាមេរិកនៅអឺរ៉ុបមានមន្ទិលសង្ស័យ ព្រោះពួកគេមិនបានដឹងច្បាស់ថា កិច្ចព្រមព្រៀងនេះមានអត្ថន័យលម្អិតបែបណា និងចែងពីអ្វីឲ្យច្បាស់លាស់ឡើយ។
ដូចឃើញស្រាប់ហើយ បារាំងបានស្នើឲ្យអាមេរិកបញ្ចេញកិច្ចព្រមព្រៀងលម្អិតដែលអាមេរិកនិងរុស្ស៊ីបង្កើតរួមគ្នានោះ ដើម្បីឲ្យខ្លួនបានដឹងផង។ នេះបញ្ជាក់ច្បាស់ថា សម្ព័ន្ធមិត្តក៏មិនសូវទុកចិត្តអាមេរិកដែរ ព្រោះអាមេរិកហាក់ផុងខ្លួនទៅកៀកស្និទ្ធជាមួយរុស្ស៊ីពេក។
ដោយឡែក ក្រុមឧទ្ទាមមួយចំនួនចាប់ផ្តើមមានអារម្មណ៍ថា អាមេរិកកំពុងក្បត់ខ្លួន ព្រោះកិច្ចព្រមព្រៀងអាមេរិកឯកភាពបង្កើតឡើងមកជាមួយរុស្ស៊ីនេះហាក់មិនជួយគាំពារពួកគេទេ។ ក្រុមខ្លះ យល់ថា អាមេរិកកំពុងដោះដៃចេញ ហើយឲ្យរុស្ស៊ីនិងរដ្ឋាភិបាលស៊ីរី បំផ្លាញខ្លួនថែមទៀតផង។ ជាក់ស្តែងក្រុមឧទ្ទាម Ahrar Al-Sham ដែលមានអារ៉ាប៊ីសាអូឌីតជាខ្នងបង្អែកនិងមានទំនាក់ទំនងល្អជាមួយក្រុមភេរវជន Jabhat al-Nusra បានទាត់ចោលបទឈប់បាញ់នេះ។មេដឹកនាំក្រុមឧទ្ទាមនេះបានប្រកាសថា កិច្ចព្រមព្រៀងអាមេរិកនិងរុស្ស៊ីផ្តួចផ្តើមបង្កើតឡើងមកនេះវាត្រឹមតែធ្វើឲ្យក្រុមឧទ្ទាមអន្តរាយ ហើយជួយពង្រឹងអំណាចរដ្ឋាភិបាលលោក បាសា អាល់អាសាដ ប៉ុណ្ណោះ។
អ្វីដែលគួរឲ្យចាប់អារម្មណ៍សូម្បី តែក្រសួងការពារជាតិអាមេរិកក៏មិនសូវទុកចិត្ត ក្រសួងការបរទេសអាមេរិកដែលឈានទៅបង្កើតកិច្ចសហប្រតិបត្តិការយោធាជាមួយរុស្ស៊ីដើម្បីប្រឆាំងក្រុមភេរវជននៅពេលខាងមុខ។ ដូចបានអះអាងខាងដើមស្រាប់ បើសិនជាភាគីអាចរក្សាការអនុវត្តកិច្ចព្រមព្រៀងបានខ្ជាប់ខ្ជួនក្នុងពេល ៧ថ្ងៃ កិច្ចសហប្រតិបត្តិការប្រឆាំងភេរវកម្មរវាងមហាអំណាចទាំងពីរនឹងលេចរូបរាងឡើយ។
២. U.N អំពាវនាវឲ្យភាគីពាក់ព័ន្ធជួយសម្រួលដល់ការចែកចាយជំនួយមនុស្សធម៌
យ៉ាងណាក៏ដោយចុះ អ្វីដែលគេត្រូវខ្វាយខ្វល់ពេលនេះគឺអាយុជីវិតប្រជាជនស៊ីរីដែលកំពុងស្ថិតក្នុងស្ថានភាពគ្រោះថ្នាក់។ ពួកគេកំពុងត្រូវការ ជំនួយស្បៀងអាហារ ក៏ដូចជាថ្នាំសង្កូវ ដើម្បីបន្តរស់រានទៅមុខទៀត។
បញ្ហាបច្ចុប្បន្នគឺ ជំនួយមនុស្សធម៌ដែលត្រូវគេបញ្ជូនទៅចែកចាយជូនប្រជាជនស៊ីរី នៅជាប់ទ្រឹងនៅត្រឹមព្រំដែនតួកគី-ស៊ីរី ព្រោះក្រុមដឹកជញ្ជូនមិនអាចទទួលបានការអនុញ្ញាតពីទាហានរដ្ឋាភិបាលស៊ីរី។ ប្រជាជនទាំងនោះកំពុងអត់បាយក្រហាយទឹក ព្រោះពួកគេបានទទួលជំនួយតាំងខែកក្កដាម្ល៉េះ ហើយមកទល់បច្ចុប្បន្នពួកគេមិនទាន់ទទួលបានជំនួយថ្មីឡើយ។ ទាក់ទងបញ្ហានេះ អង្គការសហប្រជាជាតិបានអំពានាវឲ្យភាគីពាក់ព័ន្ធប្រញាប់ប្រញាល់ដោះស្រាយបញ្ហានេះ ដើម្បីទប់ស្កាត់គ្រោះមហន្តរាយមនុស្សជាតិ។
យោងតាមទីភ្នាក់ងារព័ត៌មាន AFP អគ្គរដ្ឋទូតរុស្ស៊ីប្រចាំអង្គការសហប្រជាជាតិលោក Vitaly Churkin បានបញ្ជាក់ថា រុស្ស៊ីកំពុងបញ្ចុះបញ្ចូលឲ្យបណ្តាប្រទេសជាសមាជិកក្រុមប្រឹក្សាសន្តិសុខគាំទ្រកិច្ចព្រមព្រៀងសន្តិភាពស៊ីរីដែលកំពុងស្ថិតនៅជាធរមាន ដើម្បីជួយសម្រួលដល់ការផ្គត់ផ្គង់ជំនួយមនុស្សធម៌ដល់ប្រជាជនស៊ីរី។ ក្រុមប្រឹក្សាសន្តិសុខនឹងបើកកិច្ចប្រជុំមួយនៅថ្ងៃពុធសប្តាហ៍ក្រោយ ដើម្បីជជែកគ្នាពីបញ្ហាស៊ីរី ជាពិសេសផ្តោតលើការផ្តល់ជំនួយមនុស្សធម៌ដល់ប្រជាជនស៊ីរី៕
សង្គ្រាមបង្ហូរឈាមគ្នារយៈពេល ៥ឆ្នាំនៅស៊ីរីមិនអាចឈានដល់ទីបញ្ចប់ងាយៗឡើយ។ មហាអំណាចដូចជារុស្ស៊ី និងអាមេរិក ដែលលូកដៃជួយភាគីជម្លោះនិងមានគោលដៅរៀងខ្លួននោះ ជាអ្នកកំណត់ជោគវាសនាប្រទេសកម្សត់ដែលមានប្រជាជនជា២១លាននាក់នេះ។
Tag:
រុស្ស៊ី
អាមេរិក
បាសា អាល់ អាសាដ
© រក្សាសិទ្ធិដោយ thmeythmey.com