ពីនេះ ពីនោះ
ព័ត៍មានសុខភាព
ញ៉ាំគ្រឿងស្រវឹងច្រើនពេក អាចសម្លាប់ជីវិតផ្លូវភេទអ្នកបាន
× កាលណាអ្នកញ៉ាំគ្រឿងស្រវឹងក្នុងកម្រិតមួយមានដែនកំណត់ត្រឹមត្រូវ វាពិតជាអាចបង្កើនចំណង់ផ្លូវភេទអ្នកបាន។ យ៉ាងណាមិញ មិនមានមនុស្សច្រើនទេដែលដឹងអំពីការពិតត្រង់ថា គ្រឿងស្រវឹងអាចនាំឲ្យមានបញ្ហាមួយចំនួនចំពោះជីវិតផ្លូវភេទទេបើសិនជាញ៉ាំច្រើនពេក។ ដូច្នេះហើយ ខាងក្រោមនេះគឺជាហេតុផលមួយចំនួនដែលបញ្ជាក់ថា ការញ៉ាំគ្រឿងស្រវឹងច្រើនពេកអាចផ្តល់គ្រោះថ្នាក់ដល់ជីវិតផ្លូវភេទអ្នកបាន។
ប៉ះពាល់ដល់ការផលិតអ័រម៉ូនភេទប្រុសតេស្តូស្តេរ៉ូន
បើសិនជាអ្នកញ៉ាំគ្រឿងស្រវឹងច្រើនៗ ឬញ៉ាំញឹកញាប់ នោះវានឹងប៉ះពាល់ដល់ការផលិតអ័រម៉ូនភេទប្រុសតេស្តូស្តេរ៉ូនជាមិនខាន។ គ្រឿងស្រវឹងក៏អាចបង្កជាប្រតិកម្មគីមីនៅក្នុងខួរក្បាល និងទប់ស្កាត់ការផលិតអ័រម៉ូននេះបានដែរ។
បង្កបញ្ហាច្រើនចំពោះការឡើងរឹងរបស់លិង្គ
ផលរំខានមួយដ៏ញឹកញាប់នៃការញ៉ាំគ្រឿងស្រវឹងច្រើនៗពេកគឺ លិង្គមិនអាចឡើងរឹងកើតតែម្តង។ រឿងនេះដោយសារតែការពុលស្រួចស្រាវ ឬរ៉ាំរ៉ៃនៃការញ៉ាំគ្រឿងស្រវឹងតែម្តង។ ចំពោះហេតុផលគឺថា គ្រៀងស្រវឹងអាចរំខានដល់ការផ្គត់ផ្គង់ឈាមដល់សរីរាង្គបន្តពូជ ដូច្នេះហើយវាកាន់តែពិបាកក្នុងការទទួលបានលិង្គឡើងរឹងនៅពេលមានសម្រើបផ្លូវភេទ។
ស្ងួតទ្វារមាស
ហេតុផលមួយដែលនាំឲ្យស្ត្រីមិនអាចរីករាយនឹងការរួមភេទគឺដោយសារតែការកង្វះទឹករំអិលក្នុងពេលរួមភេទតែម្តង។ ហើយការញ៉ាំគ្រឿងស្រវឹងច្រើនពេកត្រូវបានគេស្គាល់ថាអាចធ្វើឲ្យទ្វារមាសស្ងួតបានដោយសារតេគ្រឿងស្រវឹងធ្វើឲ្យខ្សោះជាតិក្នុងខ្លួន ពិបាកដល់ការរួមភេទ និងបង្កបញ្ហាជាច្រើនដល់ជីវិតផ្លូវភេទទៀត។
ខ្សោយចំណង់ផ្លូវភេទ
មិនមានមនុស្សច្រើនទេដែលដឹងថា គ្រឿងស្រវឹងគឺជាសារធាតុនាំឲ្យបាក់ទឹកចិត្តទេ ហើយការញ៉ាំកាន់តែច្រើនមិនត្រឹមតែធ្វើឲ្យអារម្មណ៍មិនល្អទេ តែថែមទាំងបន្ថយចំណង់ផ្លូវភេទទៀតផង។ ហើយការខ្សោះជាតិទឹកជាមួយគ្នានឹងអារម្មណ៍មិនល្អ ពិតជានាំឲ្យការរួមភេទកាន់តែមានផលប៉ះពាល់។
មានបញ្ហាក្នុងការឈានដល់ចំណុចកំពូល
គេមើលឃើញថា ទាំងបុរស និងស្ត្រីកំពុងតែប្រឈមនឹងភាពលំបាកក្នុងការឈានដល់ចំណុចកំពូលក្រោយពីពួកគេស្រវឹងខ្លាំង។ ការដែលបន្តញ៉ាំគ្រឿងច្រើនៗប្រហែលជានាំឲ្យពិបាកឈានដល់ចំណុចកំពូលក្នុងពេលរួមភេទ ព្រមទាំងលិង្គមិនអាចឡើងរឹងទៀត។
ការផលិតមេជីវិតឈ្មោល
តើអ្នកមានដឹងទេថា គ្រឿងស្រវឹងអាចរំខានដល់ការផលិតមេជីវិតឈ្មោលបាន ដែលជាហេតុនាំឲ្យមេជីវិតឈ្មោលមានចំនួនកាន់តែតិច។ កាលណារឿងនេះមានរយៈពេលយូរៗទៅ វាប្រហែលជាប្រឈមខ្លាំងនឹងបាត់បង់លទ្ធភាពនៃការមានកូន។ ដូច្នេះហើយ ចូរកាត់បន្ថយការញ៉ាំគ្រឿងស្រវឹងបើសិនជាចង់ឲ្យជីវិតផ្លូវភេទកាន់តែមានភាពសកម្ម៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com