កីឡាជាតិ
ជាតិ
NOCC បើកវគ្គសិក្សាស្តីពីជំនាញសរសេរ និងការអត្ថាធិប្បាយកីឡា លោក វ៉ាត់ ចំរើន អគ្គលេខាធិការ NOCC
× គណៈកម្មាធិការជាតិអូឡាំពិកកម្ពុជា(NOCC) រៀបចំវគ្គបណ្តុះបណ្តាលរដ្ឋបាលកីឡាស្តីពី «សារព័ត៌មាន និងអត្ថាធិប្បាយកីឡា (MC)» ដើម្បីជំរុញឲ្យមន្រី្តកីឡា និងអ្នកសារព័ត៌មានចេះប្រើប្រាស់ពាក្យពេចន៍កីឡាឲ្យស្របតាមស្តង់ដារអន្តរជាតិ។ វគ្គបណ្តុះបណ្តាលនេះធ្វើឡើងនៅទីស្នាក់ NOCC រយៈពេល២ថ្ងៃចាប់ពីថ្ងៃទី១៩-២០ ខែកញ្ញា។
ដើម្បីឆ្លើយតបទៅនឹងផែនការមេស៊ីហ្គេមដែលរាជរដ្ឋាភិបាលកម្ពុជាបានកំណត់ គណៈកម្មាធិការជាតិអូឡាំពិកកម្ពុជាបានរៀបចំវគ្គបណ្តុះបណ្តាលរដ្ឋបាលកីឡាស្តីពី«សារព័ត៌មាន និង MC កីឡា» ដើម្បីជួយលើកស្ទួយវិស័យកីឡាកម្ពុជាឲ្យមានការរីកចម្រើន ជាពិសេសឲ្យស្របតាមគោលការណ៍អន្តរជាតិ និងនិយាមកីឡាពិភពលោក។
វគ្គបណ្តុះបណ្តលស្តីពីរបៀបប្រើប្រាស់ពាក្យពេចន៍បច្ចេកទេសកីឡាប្រកបដោយវិជ្ជាជីវសារព័ត៌មាននេះ ផ្តោតសំខាន់ទៅលើមន្ត្រីព័ន្ធមាន និង MC កីឡារបស់សហព័ន្ធកីឡាជាតិកម្ពុជា ព្រោះបច្ចុប្បន្នធនធាននេះនៅមានការខ្វះខាតនៅឡើយ។ លើសពីនេះ ក៏ផ្តោតសំខាន់ទៅលើអ្នកប្រកបអាជីពសារព័ន្ធ ក៏ដូចជាអត្ថាធិប្បាយកីឡាប្រចាំអង្គភាពសារព័ត៌មានផ្សេងៗផងដែរ។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានបញ្ជាក់ថា៖«វគ្គនេះយើងធ្វើឡើងក្នុងគោលបំណងឲ្យមន្ត្រីសហព័ន្ធកីឡាជាតិ ដែលគ្រោងនឹងរៀបចំការប្រកួតកីឡាជាតិ ឲ្យយល់ និងចេះប្រើប្រាស់ពាក្យពេចន៍ និងជំនាញកីឡាឲ្យបានសមរម្យ និងត្រឹមត្រូវទៅតាមគោលការណ៍កីឡាអន្តរជាតិ និងនិយាមនៃកីឡាពិភពលោក»។
លោកបានបន្ថែមទៀតថា វគ្គបណ្តុះបណ្តាលនេះមានសិក្ខាប្រមាណជា៧០នាក់ដែលមកពីតាមបណ្តាអង្គភាពសារព័ត៌មានដូចជា វិទ្យុ ទូរទស្សន៍ កាសែត និងព័ន្ធមានអនឡាញ ព្រមទាំងមន្ត្រីរបស់សហព័ន្ធកីឡាជាតិ។ ពួកគេទាំងនេះនឹងទទួលបានការណែនាំពីគ្រូឧទ្ទេសសំខាន់ៗដែលមានបទពិសោធន៍ផ្នែកសារព័ត៌មានប្រកបដោយវិជ្ជាជិវជាច្រើនរូប។
វគ្គបណ្តុះបណ្តាលដែលធ្វើឡើងរយៈពេល២ថ្ងៃនៅទីស្នាក់ការ NOCC ដោយថ្ងៃទី១លោក ស្តើង ជា ប្រធានគណៈកម្មការជំនាញវេជ្ជសាស្ត្រអមគណៈកម្មាធិការជាតិអូឡាំពិកកម្ពុជានិងធ្វើបទបង្ហាញពី «Doping» ឬឯអ្នកស្រី ប្រាក់ សម្ផស្ស ឧទ្ទេសនាមពី«MC»។
ចំណែក លោក វ៉ាត់ ចំរើន អគ្គលេខាធិការ NOCC បង្ហាញពីក្រមសីលធម៌ និង Fair Play។ លោកបណ្ឌិត ចាន់ សំណព្វ នឹងបង្ហាញពី«ការប្រើប្រាស់ពាក្យ និងសំណេរខ្មែរ» ខណៈលោក ជា ច័ន្ទបរិបូណ៍ រដ្ឋលេខាធិការក្រសួងព័ត៌មានបង្ហាញពី«តម្លាភាពនៃការអត្ថាធិប្បាយកីឡា»។ ទន្ទឹមនឹងនោះក៏មានការធ្វើបទបង្ហាញរបស់សហព័ន្ធកីឡាជាតិ និងការពិភាក្សាជាក្រុមដើម្បីអនុវត្តន៍នីតិវិធី MC ផងដែរ៕
Tag:
វ៉ាត់ ចំរើន
វគ្គបណ្តុះបណ្តាលសារព័ត៌មានកីឡា
© រក្សាសិទ្ធិដោយ thmeythmey.com