ការប្រកាសចូលសភារបស់បក្សប្រឆាំង ត្រូវបានបក្សកាន់អំណាចសើចចំអក តែអ្នកវិភាគគាំទ្រ

ជាតិ

នយោបាយជាតិ

ការប្រកាសចូលសភារបស់បក្សប្រឆាំង ត្រូវបានបក្សកាន់អំណាចសើចចំអក តែអ្នកវិភាគគាំទ្រ

20, Sep 2016 , 9:39 pm

រូបភាព

លោក សុន ឆ័យ តំណាងរាស្ត្រគណបក្សសង្គ្រោះជាតិ

ដោយ: ម៉ៅ សុផា

ភ្នំពេញ៖ តំណាងរាស្ត្ររបស់គណបក្សសង្គ្រោះជាតិ អាចនឹងចូលរដ្ឋសភាវិញ ដើម្បីដោះស្រាយវិបត្តិនយោយបាយ និងបញ្ហាមួយចំនួនរបស់ប្រជាពលរដ្ឋ។ ការប្រកាសចួលសភារបស់ប្រឆាំងនាពេលនេះ មិនបានធ្វើឲ្យបក្សកាន់អំណាច ទទួលស្វាគមន៍ ឬកោតសរសើរអ្វីនោះទេ។ ប៉ុន្តែ អ្នកតាមដានស្ថានការណ៍នយោបាយនៅកម្ពុជា មើលឃើញពីចំណុចវិជ្ជមាននៃការចូលសភារបស់បក្សប្រឆាំង ហើយសង្ឃឹមថា កម្តៅនយោបាយ នឹងថមថយជាមិនខាន។

លោក សុន ឆ័យ តំណាងរាស្ត្រគណបក្សសង្គ្រោះជាតិ បានថ្លែងប្រាប់ក្រុមអ្នកសារព័ត៌មាននៅព្រឹកថ្ងៃអង្គារនេះ ថា គណបក្សសង្គ្រោះជាតិ កំពុងតែពិចារណាក្នុងការចូលប្រជុំសភា។ លោក សុន ឆ័យ លើក ហេតុផលថា ការពិចារណាក្នុងការចូលរដ្ឋសភានេះ គឺដើម្បីដោះស្រាយបញ្ហានយោបាយ រួមទាំងក្តីកង្វល់របស់ប្រជាពលរដ្ឋ ដែលកំពុងតែប្រឈម នាពេលបច្ចុប្បន្ន។ ការលើកឡើងរបស់លោក សុន ឆ័យ បែបនេះ ធ្វើឡើងបន្ទាប់ពីលោក បានចាកចេញពីការសួរសុខទុក្ខមន្ត្រីនិងសកម្មជនបក្សប្រឆាំងមួយចំនួន ដែលកំពុងជាប់ឃុំឃាំងក្នុងពន្ធនាគារព្រៃស។

បើទោះបីជាបក្សប្រឆាំង ព្យាយាមប្តូរឥរិយាបថតឹងរឹងក្នុងការធ្វើបាតុកម្ម មកការចូលសភាក៏ដោយ ក៏គណបក្សប្រជាជនកម្ពុជា ហាក់ដូចជាមិនសាទរដដែល។ លោក សុខ ឥសាន អ្នកនាំពាក្យបក្សកាន់អំណាច បានសើចចំអកឲ្យបក្សប្រឆាំងថា ប្រែក្រឡាស់ចុះឡើងៗ ដូចក្មេងបៀមដៃ ដោយមិនមានគោលជំហរច្បាស់លាស់។ លោក បានផ្ញើសារទៅកាន់បក្សប្រឆាំងបែបនេះថា៖«គាត់ (បក្សប្រឆាំង )មិនចង់ចូល (សភា) ក៏ស្រេចតែគាត់។ គាត់ចង់ចូល ក៏ចូលទៅ មាននរណាទៅហាមឃាត់គាត់។ រដ្ឋសភា នៅតែបើកទ្វារតើ មាននរណាបិទទ្វារមិនឲ្យគាត់ចូល»។

លោក សុខ ឥសាន មិនបានវាយតម្លៃចំៗថា ការប្រកាសចូលសភានាពេលខាងមុខ គឺដោយសារតែបក្សប្រឆាំង ចង់ចរចាជាមួយបក្សកាន់អំណាច ដើម្បីសុំឲ្យដោះលែង មន្ត្រីនិងសកម្មជនរបស់ខ្លួននោះទេ។ អ្នកនាំពាក្យបក្សកាន់អំណាចរូបនេះ គ្រាន់តែប៉ាន់ស្មានថា ការផ្លាស់ប្តូរឥរិយាបថបែបនេះ ទំនងជាបក្សប្រឆាំងមានគោលបំណងអ្វីមួយជាមិនខាន។

យ៉ាងណាក៏ដោយ លោក សុខ ឥសាន បានប្រកាសជាមុនថា បក្សកាន់អំណាច មិនអាចចរចា ក្នុងសំណុំរឿងរបស់មន្ត្រីនិងសកម្មជនបក្សប្រឆាំង ដែលកំពុងជាឃុំឃាំង ជាដាច់ខាត។

ផ្ទុយពីបក្សកាន់អំណាច លោក សូ ចន្ថា អ្នកវិភាគនយោបាយ គាំទ្រឥរិយបទទន់ភ្លន់របស់បក្សប្រឆាំង ដែលចង់ចូលរដ្ឋសភា។ លោក សូ ចន្ថា មើលឃើញថា គោលដៅរបស់បក្សប្រឆាំងក្នុងកាលៈទេសៈនេះ មានតែមួយគត់ គឺការស្វែងរកការចរចា ដើម្បីសុំឲ្យដោះលែងមន្ត្រីនិងសកម្មជនរបស់ខ្លួន។ លោក បញ្ជាក់ដូច្នេះថា៖ «ខ្ញុំគិត វាជារឿងល្អ បើបក្សប្រឆាំងប្តូរការធ្វើបាតុកម្ម មកចូលសភា»។

អ្នកវិភាគរូបនេះ សន្និដ្ឋានថា ការដែលបក្សកាន់អំណាច មិនបន្ទន់ឥរិយាបថ ដាក់បក្សប្រឆាំង គឺបក្សកាន់អំណាច មានបំណងចង់បង្ហាញបក្សប្រឆាំងថា ខ្លួនមានកម្លាំងប្រដាប់អាវុធ និងស្ថាប័នរដ្ឋ រួមទាំងប្រជាពលរដ្ឋ ដែលកំពុងគាំទ្រផងដែរ។ ម្យ៉ាងទៀត បក្សកាន់អំណាច ក៏ចង់បញ្ជាក់ពីចំណុចខ្សោយរបស់បក្សប្រឆាំង ដែលកំពុងសុំចរចាជាមួយខ្លួន។

យ៉ាងណាក៏ដោយ លោក សូ ចន្ថា នៅតែទទូចឲ្យបក្សមានអាសនៈក្នុងរដ្ឋសភាទាំងពីរ បន្ទន់ឥរិយាបថដាក់គ្នា ក្នុងការដោះស្រាយបញ្ហាប្រទេសជាតិ ដោយជៀសវាង ការប្រើកម្លាំងប្រដាប់អាវុធ និងកម្លាំងប្រជាពលរដ្ឋ ដើម្បីផ្ចាញ់ផ្ចាលគ្នា ដែលជាហេតុនាំឲ្យប្រទេសជាតិ ឈានទៅរកវិនាសកម្ម ដូចប្រវត្តិសាស្ត្រកន្លងមក។ លោក សង្កត់ធ្ងន់ៗថា វា ជាការល្អមែនទែន ប្រសិនបក្សទាំងពីរ បន្តប្រើយន្តការសភា ដើម្បីដោះស្រាយបញ្ហា រហូតដល់ការបោះឆ្នោត ចប់សព្វគ្រប់៕