អន្តរជាតិ
នយោបាយអន្តរជាតិ
លោក បាន គីមូន៖ «បាតដៃប្រទេសមហាអំណាចប្រឡាក់ដោយឈាមជនស៊ីវិល» អគ្គលេខាធិការអង្គការសហប្រជាជាតិ បាន គីមូន (រូបភាព Xinhua)
× ប្រមុខអង្គការសហប្រជាជាតិ លោក បាន គីមូន បានព្រលះបណ្ដាមេដឹកនាំពិភពលោកដោយប្រើប្រាស់ពាក្យសម្ដីធ្ងន់ៗ ជុំវិញជម្លោះបង្ហូរឈាមដែលឆក់យកជីវិតមនុស្សរាប់លាននាក់ និងបណ្ដាលឲ្យមនុស្សរាប់សិបលាននាក់ទៀតក្លាយជាជនភៀសខ្លួន។ ប្រមុខអង្គការសហប្រជាជាតិ ក៏រិះគន់ប្រទេសមហាអំណាច ដែលចូលដៃចូលជើងក្នុងជម្លោះទាំងនោះ តាមរយៈការគាំទ្រភាគីជម្លោះនីមួយៗ និងមិនរកដំណោះស្រាយដែលមានប្រសិទ្ធភាពឡើយ។
អគ្គលេខាធិការអង្គការសហប្រជាជាតិ លោក បាន គីមូន បានប្រើវេទិកាមហាសន្និបាតលើកទី៧១ រិះគន់មេដឹកនាំពិភពលោកចំៗ ចំពោះការបង្កើតបញ្ហាមិនចេះចប់។ ប្រធានាធិបតីស៊ីរី បាសា អាល់អាសាដ ប្រធានាធិបតីស៊ូដង់ខាងត្បូង Salva Kiir សុទ្ធតែត្រូវប្រមុខអង្គការសហប្រជាជាតិ ព្រលះធ្ងន់ៗទាំងអស់លើបញ្ហារឹតត្បិតសេរីភាព វិបត្តិនយោបាយក្នុងស្រុក ដែលសម្លាប់ប្រជាជនរាប់លាននាក់មកហើយនោះ។
ថ្លែងទៅកាន់កិច្ចប្រជុំមហាសន្និបាតនៅក្រុង New York អគ្គលេខាធិការជិតចប់អាណត្តិរូបនេះនិយាយថា នៅប្រទេសជាច្រើន មេដឹកនាំទាំងនោះ បានកែរដ្ឋធម្មនុញ្ញ ក្លែងបន្លំការបោះឆ្នោត និងធ្វើសកម្មភាពផ្សេងទៀតដើម្បីរក្សាអំណាចរបស់ខ្លួន។ ដោយមិននិយាយចំពីប្រទេសណាមួយនោះ លោក បាន គីមូន ក៏ផ្ញើសារឲ្យមេដឹកនាំប្រទេសនោះ បម្រើប្រជាជន ឈប់កេងប្រវ័ញ្ចធនធានធម្មជាតិ និងមិនត្រូវធ្វើបាបអ្នករិះគន់ឡើយ។
ប្រមុខអង្គការសហប្រជាជាតិជនជាតិកូរ៉េខាងត្បូង ក៏ព្រលះចំៗលើមេដឹកនាំស៊ីរី និងស៊ូដង់ខាងត្បូង ដែលចូលចិត្តប្រើហិង្សាដើម្បីក្រាញអំណាច។ លោកអះអាងថា មេដឹកនាំស៊ូដង់ខាងត្បូង បានក្បត់ប្រជាជនខ្លួនឯង ដោយប្រើកម្លាំងអាវុធដើម្បីបន្តក្តោបក្តាប់អំណាច។ ចំណែកលោក អាសាដ វិញ ក៏ប្រើយុទ្ធនាការយោធា និងការធ្វើទុក្ខបុកម្នេញប្រជាជន ដើម្បីការពារអំណាចរបស់ខ្លួន បើទោះជាប្រជាជនរាប់សែននាក់ត្រូវបានសម្លាប់ក៏ដោយចុះ។
បើយោងតាមសារព័ត៌មាន Foreign Policy លោក បាន គីមូន ក៏បានរិះគន់មហាអំណាចខាងក្រៅដែលលូកដៃចូលជម្លោះបង្ហូរឈាម ដោយបានផ្ដល់ការគាំទ្រដល់ភាគីជម្លោះទាំងសងខាង។ ប៉ុន្តែលោកមិនបានបញ្ជាក់ចំឈ្មោះប្រទេសទាំងនោះឡើយ ដោយលោកលើកឡើងថា បាតដៃរបស់មហាអំណាចដែលនៅតែបន្តគាំទ្រឧបករណ៍សង្គ្រាម គឺប្រឡាក់ដោយឈាមជនស៊ីវិលរាប់លាននាក់។
លោក បាន គីមូន និយាយបន្តទៀតថា៖« អ្នកដែលចូលរូមកិច្ចប្រជុំថ្ងៃនេះ គឺជាតំណាងប្រទេសដែលមិនខ្វល់នឹងការសម្លាប់មនុស្ស ហើយថែមទាំងជួយឧបត្ថម្ភហិរញ្ញវត្ថុ រៀបចំផែនការ ក៏ដូចជាចូលរួមក្នុងសកម្មភាពឃោរឃៅទាំងនោះទៀតផង»។
នេះក៏ព្រោះតែប្រទេសទាំងនោះ មានជំហរមិនដូចគ្នា និងគាំទ្រភាគីជម្លោះផ្សេងគ្នា ដែលធ្វើឲ្យបញ្ហាកាន់តែស្មុគស្មាញខ្លាំង។
បើទោះជាអគ្គលេខាធិការរូបនេះ មិននិយាយចំឈ្មោះមហាអំណាចណាមួយក៏ដោយ ក៏គេអាចដឹងថា គ្មានអ្នកណាក្រៅពីអាមេរិក រុស្សី តួកគី អារ៉ាប៊ី សាអូឌីត បារាំង និងអ៊ីរ៉ង់ដែរ។ នេះក៏ដោយសារតែមហាអំណាចពិភពលោក និងមហាអំណាចតំបន់ទាំងនេះ សុទ្ធតែចូលរួមយ៉ាងសកម្មនៅក្នុងជម្លោះបង្ហូរឈាមនៅស៊ីរី អ៊ីរ៉ាក់ និងតំបន់ដទៃទៀត៕
© រក្សាសិទ្ធិដោយ thmeythmey.com