ក្រុមកីឡាបាល់ទាត់ជម្រើសជាតិកម្ពុជា បានចេញដំណើរទៅហ្វឹកហាត់នៅប្រទេសសិង្ហបុរី នាថ្ងៃពុធ ទី២១ ខែកញ្ញា នេះ ដើម្បីត្រៀមខ្លួនធ្វើជាម្ចាស់ផ្ទះសម្រាប់ការប្រកួតជម្រុះជើងឯកប្រចាំតំបន់អាស៊ាន AFF Suzuki Cup ឆ្នាំ២០១៦ នៅរាជធានីភ្នំពេញនាពាក់កណ្តាលខែតុលា ខាងមុខ។
គ្រូបង្វឹកក្រុមកីឡាបាល់ទាត់ជម្រើសជាតិកម្ពុជា លោក Lee Tae Hoon ចម្រាញ់បានកីឡាករចំនួន២៦នាក់សម្រាប់ការហ្វឹកហាត់រយៈពេល១០ថ្ងៃនៅសិង្ហបុរី ដោយពួកគេនឹងធ្វើការប្រកួតមិត្តភាពចំនួន៣លើកនៅទីនោះ។ ក្នុងចំណោមកីឡាករទាំង២៦រូប ខ្សែបម្រើវ័យក្មេងភ្នំពេញក្រោន អ៊ិន សូដាវីដ មានឈ្មោះជាលើកដំបូង ដោយរូបគេ និងឆេង ម៉េង នៃក្លិបណាហ្គាវើល ត្រូវបន្តដំណើរទៅសិង្ហបុរីទៀត បន្ទាប់ពីបញ្ចប់យុទ្ធនាការ AFF U19 Championship នៅក្នុងទីក្រុងហាណូយ ប្រទេសវៀតណាម។
ខណៈដែល ស៊ុន វណ្ណដេត នៃក្លិបអគ្គស្នងការដ្ឋាននគរបាលជាតិ សារី ម៉ាត់ណូរ៉ូទីន នៃក្លិបណាហ្គាវើល និងអ្នកចាំទី កែវ សុសិលា នៃក្លិបភ្នំពេញក្រោន បានបាត់ឈ្មោះពីបញ្ជី លោក Lee បានកោះហៅកីឡាករជើងចាស់ ដូចជា ខ្សែប្រយុទ្ធ ឃួន ឡាបូរ៉ាវី នៃក្លិបបឹងកេតអង្គរ និងអ្នកចាំទី អ៊ុំ វិចិត្រ នៃក្លិបក្រសួងការពារជាតិ មកចូលរួមក្នុងក្រុមឡើងវិញផងដែរ។
កម្ពុជានឹងធ្វើជាម្ចាស់ផ្ទះរៀបចំព្រឹត្តិការណ៍ប្រកួតជម្រុះ AFF Suzuki Cup ឆ្នាំ២០១៦ ពីថ្ងៃទី១៥ ដល់ថ្ងៃទី២១ ខែតុលា ត្រូវទទួលឡាវ ទីម័រខាងកើត និងព្រុយណេ។ ក្រុមដែលទទួលបានពិន្ទុខ្ពស់ជាងគេ នឹងទទួលបានកៅអីក្នុងពូល B សម្រាប់ការប្រកួតជុំចុងក្រោយនៅក្នុងប្រទេសមីយ៉ាន់ម៉ា ដែលមានក្រុមម្ចាស់ផ្ទះមីយ៉ាន់ម៉ា ម៉ាឡេស៊ី និងវៀតណាម នៅរង់ចាំ។
សមាសភាពថ្នាក់ដឹកនាំ គ្រូបង្វឹក និងកីឡាករជម្រើសជាតិកម្ពុជា៖
ថ្នាក់ដឹកនាំ៖ លោក ឆាំង ពិសិដ្ឋ (អ្នកចាត់ការទូទៅ), លោក Lee Tae Hoon (គ្រូបង្វឹក), លោក អ៊ុង កនយ៉ានិត, លោក អ៊ុំ សាវង្ស, លោក ហោ សុខហេង (គ្រូជំនួយ) លោក សួង ភិរម្យ (គ្រូចាំទី), លោក ហៃ សក្ខរី, លោក ស៊ាង ប៉ុណ្ណា (គ្រូពេទ្យ)
កីឡាករ៖ ស៊ូ យ៉ាទី, រស់ សំអឿន, ចាន់ វឌ្ឍនាកា, ឃួន ឡាបូរ៉ាវី, សុខ សុវណ្ណ (បឹងកេតអង្គរ), ទិត្យ ឌីណា (អគ្គស្នងការដ្ឋាននគរបាលជាតិ), ច្រឹង ពលរដ្ឋ, ឈិន ឈឿន, អ៊ុំ វិចិត្រ, រ៉ឹង ប៊ុនហៀង, ខែក ខេមរិន្ទ, ស ពិសិដ្ឋ, អ៊ុំ សេរីរ័ត្ន (ក្រសួងការពារជាតិ), ធារី ចន្ថាប៊ីន, កែវ សុខផេង, អ៊ិន សុដាវិដ (ភ្នំពេញក្រោន), សុះ ស៊ូហាណា, ឆេង ម៉េង (ណាហ្គាវើល), រស់ គង់សំរេច, សំអឿន ពិដោរ, សុខ សំណាង, ប្រាក់ មុន្នីឧត្តម, ហ៊ួយ ផល្លីន, នេន សុធារ័ត្ន, សឿយ វិសាល, ណុប តុលា (ព្រះខ័នរាជស្វាយរៀង)៕