កីឡាជាតិ
ជាតិ
លោក អ៊ុក សិទ្ធិជាតិ បកស្រាយរឿងកីឡាករចូលរួមប្រកួតកីឡាជាតិបង់ម្នាក់១០ម៉ឺនរៀល លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡារបស់ក្រសួងអប់រំ យុវជន និងកីឡា
× វាមិនមែនជារឿងគួរឲ្យភ្ញាក់ផ្អើលនោះឡើយសម្រាប់វិស័យកីឡាដែលទាមទារឲ្យកីឡាករកីឡាការិនីចំណាយថវិកា ដើម្បីទទួលបានសិទ្ធិក្នុងការចូលរួមប្រកួត។ ជាក់ស្តែងសម្រាប់ការប្រកួតជើងឯកកីឡាជាតិលើកទី១ ប្រចាំឆ្នាំ២០១៦ ដែលរៀបចំដោយក្រសួងអប់រំ យុវជន និងកីឡា គឺតម្រូវឲ្យកីឡាករកីឡាការិនីម្នាក់ត្រូវចំណាយថវិកាចំនួន១០ម៉ឺនរៀល ដើម្បីទិញសិទ្ធក្នុងការចូលរួមប្រកួត។ ពាក់ព័ន្ធនឹងបញ្ហានេះមានមតិមួយចំនួនលើកឡើង និងរិះគន់ផងដែរចំពោះគោលការណ៍របស់ក្រសួងអប់រំ។
បើយោងតាម លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡារបស់ក្រសួងអប់រំ យុវជន និងកីឡា ការចំណាយថវិកាម្នាក់១០ម៉ឺនរៀលរបស់កីឡាករកីឡាការិនី គឺដើម្បីទិញសិទ្ធិសម្រាប់ចូលរួមប្រកួតក្នុងព្រឹត្តិការណ៍កីឡាជាតិប៉ុណ្ណោះ មិនមែនដើម្បីបង់សម្រាប់ថ្ងៃអាហារនឹងកន្លែងស្នាក់នៅនោះទេ ពោលគឺបញ្ហានេះជាបន្ទុករបស់ក្រសួងអប់រំ។
លោក អ៊ុក សិទ្ធិជាតិ បានបញ្ជាក់ដូច្នេះថា៖«ជាធម្មតាការប្រកួតគឺយើងត្រូវតែបង់សិទ្ធដើម្បីចូលរួម។ ពាក់ព័ន្ធទៅនឹងការបង់១០ម៉ឺនរៀលនៅក្នុងការប្រកួតកីឡាជាតិនេះ គឺមិនមែនបង់ថ្លៃអាហារហូបចុក និងកន្លែងស្នាក់នៅនោះទេ ព្រោះការស្នាក់នៅជាបន្ទុករបស់រដ្ឋ។ ចំណែក១០ម៉ឺនរៀលជាការបង់សិទ្ធចូលរួមប្រកួត»។
ឆ្លើយទៅនឹងសំនួរអ្នកសារព័ត៌មានពាក់ព័ន្ធទៅនឹងប្រាក់រង្វាន់ និងថ្លៃខ្លួនរបស់កីឡាករកីឡាការិនី លោកអគ្គនាយកនៃអគ្គនាយកដ្ឋានរូបនេះបានបញ្ជាក់ថា៖«ពាក់ព័ន្ធទៅនឹងប្រាក់តម្លៃនៃមេដាយគឹយើងអនុវត្តតាមសេចក្តីប្រកាសរបស់ក្រសួងចាស់ដែលយើងមិនទាន់បានស្នើសុំកែប្រែ ដូច្នេះយើងត្រូវអនុវត្តន៍តាមគោលការណ៍ដែលរដ្ឋបានកំណត់។ ហើយពាក់ព័ន្ធជាមួយតម្លៃខ្លួន គឺអត់មានតម្លៃខ្លួននោះទេ»។
ការលើកឡើងរបស់អគ្គនាយកកីឡារូបនេះ ធ្វើឡើងក្នុងសន្និសីទសារព័ត៌មានកីឡាជាតិលើកទី១ និងការចុះអនុសារណៈយោគយល់គ្នារវាង NOCC ជាមួយក្រុមហ៊ុនធំៗចំនួនពីរគឺក្រុមហ៊ុនខ្មែរប្រ៊ូវើរី និងក្រុមហ៊ុនស្មាត នៅទីស្នាក់ការគណៈកម្មាធិការជាតិអូឡាំពិកកម្ពុជាកាលពីម្សិលមិញ។ ការចុះអនុសារណៈនៃការយោគយល់នេះក្នុងគោលបំណងដើម្បីសហការគ្នារៀបការប្រកួតកីឡាការជាតិរយៈពេល៨ឆ្នាំ៕
Tag:
កីឡាជាតិលើកទី១
អ៊ុក សិទ្ធិជាតិ
© រក្សាសិទ្ធិដោយ thmeythmey.com