កីឡាជាតិ
ជាតិ
កីឡាករ-ការិនីប៉េតង់១៨នាក់ចេញទៅដណ្តើមមេដាយក្នុងព្រឹត្តិការណ៍ Asian Beach Games នៅដាណាង
× ក្រោយការហ្វឹកហាត់ពង្រឹងសមត្ថភាពលើទីលានខ្សាច់សិប្បនិម្មិតនៅពហុកីឡដ្ឋានជាតិអស់រយៈពេលជិត២ខែកន្លងមកនេះ លោក សូម៉ៃ សុខគា អគ្គលេខាធិការរងសហព័ន្ធកីឡាប៊ូលនិងប៉េតង់កម្ពុជា ជឿជាក់ខ្ពស់សម្រាប់ចូលរួមលើកដំបូងរបស់កីឡាករកីឡាការិនីកម្ពុជាក្នុងការដណ្តើមមេដាយពីព្រឹត្តិការណ៍កីឡាឆ្នេរខ្សាច់អាស៊ីលើកទី៥ ( Asian Beach Games 2016) នៅទីក្រុងដាណាង ប្រទេសវៀតណាម។
លោក សូម៉ៃ សុខគា អគ្គលេខាធិការរងសហព័ន្ធកីឡាប៊ូល និងប៉េតង់កម្ពុជា ជឿជាក់យ៉ាងមុតមាំលើសមត្ថភាពរបស់កិឡាករកីឡាការិនីកម្ពុជា ក្នុងការដណ្តើមមេដាយពីព្រឹត្តិការណ៍កីឡាឆ្នេរខ្សាច់អាស៊ី ( Asian Beach Games 2016)នៅទីក្រុងដាណាង ប្រទេសវៀតណាម ដែលប្រព្រឹត្តទៅពីថ្ងៃទី២៤ ខែកញ្ញា ដល់ថ្ងៃទី៣ ខែតុលា។
ថ្លែងប្រាប់សារព័ត៌មានថ្មីៗ លោក សូម៉ៃ សុខគា បានបញ្ជាក់យ៉ាងដូច្នេះថា៖«សម្រាប់ការចូលរួមនៅ Beach Games នេះ យើងបានហ្វឹកហាត់ត្រៀមអស់រយៈជិត២ខែដែរ។ អ៊ីចឹងខ្ញុំជឿថា វាមិនមានអ្វីជាឧបសគ្គសម្រាប់យើងនោះទេ ហើយពេលនេះយើងបានស៊ាំជាមួយកំដៅថ្ងៃ។ ម្យ៉ាងទៀតយើងបានហ្វឹកហាត់នៅលើទីលានខ្សាច់ដែលមានទម្រង់ដូចនឹងទីលាននៅវៀតណាម»។
កីឡាករ៩នាក់ និងកីឡាការិនី៩នាក់ នឹងចូលរួមទាំង៩វិញ្ញាសានៃប្រភេទកីឡាប៉េតង់ ក្នុងនោះក៏មានវត្តមានរបស់កីឡាការិនីម្ចាស់មេដាយមាសពិភពលោក កែ ឡេងផងដែរ។ លោកបានរៀបរាប់ថា៖«កីឡាករដែលយើងបញ្ជូនឲ្យទៅ Beach Games នេះមិនមែនជាកីឡាករថ្មី គឺជាកីឡាករសុទ្ធតែធ្លាប់បានមេដាយសំរឹទ្ធ ប្រាក់ និងមាស ក្នុងព្រឹត្តិការណ៍នានាទាំងអស់»។
ទោះបីជាយ៉ាងណាក៏ដោយ លោក សូម៉ៃ សុខគា ក៏មិនហ៊ានវាយតម្លៃគូប្រកួតទាបនោះដែរ ជាពិសេសក្រុមថៃ ដែលជាគូប្រជែងដ៏ស្វិតស្វាញ។ ទន្ទឹមនឹងនេះ កីឡាការិនី ស៊ុន គន្ធា និង ស្រៀង សុរ៉ាឃីម ដែលត្រូវប្រកួតលើវិញ្ញាសា៣នាក់ទល់នឹង៣ នៅក្នុងព្រឹត្តិការណ៍ Asian Beach Games 2016 សុទ្ធតែបានបង្ហាញឆន្ទៈ និងប្តេជ្ញាខ្ពស់រៀងៗខ្លួនក្នុងការដណ្តើមមេដាយពីព្រឹត្តិការណ៍នេះ។
មិនខុសគ្នាពីកីឡាការិនី ស៊ុន គន្ធា នោះទេ កីឡាការិនីដែលចូលប្រឡូកក្នុងវិស័យកីឡាប៉េតង់តាំងឆ្នាំ២០១៣ ស្រៀង សុរ៉ាឃីម បានប្តេជ្ញាថា៖«ខ្ញុំគិតថាវារាងពិបាកដែរបង ព្រោះខ្ញុំមិនធ្លាប់ឆ្លងកាត់ ម្យ៉ាងទៀតខ្ញុំទើបតែចូលប្រឡូកការប្រកួតវ័យចាស់ជាមួយគេអ៊ីចឹង។ ប៉ុន្តែទោះបីជាយ៉ាងណាសម្រាប់ការចូលរួមជាលើកដំបូង ពួកខ្ញុំនឹងខិតខំលេងឲ្យអស់ពីសមត្ថភាពរៀងៗខ្លួន»។
គួរបញ្ជាក់ថា សម្រាប់ព្រឹត្តិការណ៍កីឡាឆ្នេរខ្សាច់ជើងឯកអាស៊ីប្រចាំឆ្នាំ២០១៦នៅទីក្រុងដាណាង ប្រទេសវៀតណាមដែលប្រព្រឹត្តទៅចាប់ពីថ្ងៃទី២៤ ខែកញ្ញា ដល់ថ្ងៃទី៣ ខែតុលា ដោយមានអត្តពលិកពី៤២ប្រទេសក្នុងតំបន់ចូលរួមប្រកួតប្រជែងលើ២២ប្រភេទកីឡា។ ក្រៅប៉េតង់ កម្ពុជាក៏បានបញ្ជូនប្រភេទកីឡាវ៉ូវីណាម ចំបាប់ ល្បុក្កតោ និងបាល់ទះលើឆ្នេរខ្សាច់ផងដែរ។
កីឡាការិនីចំបាប់ នី សំណាង ជាអត្តពលិកទីមួយដែលបានឈ្នះមេដាយពីព្រឹត្តិការណ៍ Asian Beach Games នេះ ដោយកាលពីឆ្នាំ២០១៤ គាត់ទទួលមេដាយសំរឹទ្ធនាព្រឹត្តិការណ៍ដែលរៀបចំនៅខេត្តភូកេត ប្រទេសថៃ៕
Tag:
ប៉េតង់
Beach Games 2016
សូម៉ៃ សុខគា
© រក្សាសិទ្ធិដោយ thmeythmey.com