ជើងឯកវ៉ូវីណាម សែន រ៉ាឌី ទទួលស្គាល់ថា សមត្ថភាពកីឡាករកម្ពុជានៅមានកម្រិតទាប

កីឡាជាតិ

ជើងឯកវ៉ូវីណាម សែន រ៉ាឌី ទទួលស្គាល់ថា សមត្ថភាពកីឡាករកម្ពុជានៅមានកម្រិតទាប

30, Sep 2016 , 10:00 am

រូបភាព

ដោយ:

ក្រោយពិធីបិទការប្រកួតកីឡាវ៉ូវីណាមជ្រើសរើសជើងឯកថ្នាក់ជាតិប្រចាំឆ្នាំ២០១៦ នៅវិមានពហុកីឡដ្ឋានជាតិកាលពីម្សិលមិញ។ កីឡាករ សែន រ៉ាឌី ម្ចាស់ជើងឯកវិញ្ញាសាប្រយុទ្ធទម្ងន់៦០គីឡូក្រាមបានទទួលស្គាល់ថា សមត្ថភាពរបស់កីឡាករកម្ពុជានៅមានកម្រិតទាបបើប្រៀបធៀបទៅនឹងសមត្ថភាពកីឡាករកីឡាការិនីនៅតាមបណ្តាប្រទេសមួយចំនួននៅក្នុងតំបន់។

កីឡាករ សែន រ៉ាឌី ម្ចាស់មេដាយមាសជើងឯកថ្នាក់ជាតិកីឡាវ៉ូវីណាមប្រចាំឆ្នាំ២០១៦ ទទួលស្គាល់ថា សមត្ថភាព និងបច្ចេកទេសរបស់កីឡាករកីឡាការិនីវ៉ូវីណាមកម្ពុជានៅមានកម្រិតទាបនៅឡើយ បើប្រៀបធៀបទៅនឹងសមត្ថភាពរបស់កីឡាករកីឡាការិនីបរទេសមួយចំនួននៅក្នុងតំបន់។ ការលើកឡើងបែបនេះ ក្រោយរូបគេឆ្លងកាត់ការប្រកួតជាមួយកីឡាករកម្ពុជានៅជើងឯកថ្នាក់ជាតិប្រចាំឆ្នាំ២០១៦ និងបទពិសោធប្រកួតជាមួយកីឡាករបរទេសនាពេលកន្លងមក។

ទោះបីជាយ៉ាងនេះក្តី សមត្ថភាពកីឡាករកម្ពុជាក៏មិនអន់ប៉ុន្មានដែរក្នុងក្រសែភ្នែករបស់កីឡាករ សែន រ៉ាឌី ក្នុងបទសម្ភាសជាមួយសារព័ត៌មានថ្មីៗក្រោយចប់ការប្រកួតជើងឯកថ្នាក់ជាតិប្រចាំឆ្នាំ២០១៦ កីឡាករ សែន រ៉ាឌី បានបញ្ជាក់យ៉ាងខ្លីដូច្នេះថា៖«កម្ពុជាយើងមិនខ្សោយទេបង គ្រាន់តែសមត្ថភាពមិនដល់គេនៅក្រៅ»។

ទោះបីជាការប្រកួតកីឡាវ៉ូវីណាមជ្រើសរើសជើងឯកថ្នាក់ជាតិប្រចាំឆ្នាំ២០១៦ មានកីឡាករមួយចំនួនបានសុំចុះចាញ់មុនការប្រកួតក៏ដោយ។ ប៉ុន្តែកីឡាករ សែន រ៉ាឌី បានចាត់ទុកថា វាជាការប្រកួតមួយដ៏សំខាន់ក្នុងការផ្តល់ឱកាសឲ្យកីឡាករកីឡាការិនីនៅតាមបណ្តាក្លិបនានាបានបញ្ចេញសមត្តភាពរបស់ពួកគេដែលបានហ្វឹកហាត់នាពេលកន្លងមក។ ម្យ៉ាងវិញទៀត ជាឱកាសធ្វើឲ្យកុមារាកុមារី និងយុវជនមានការស្រលាញ់ និងងាកមកលេងកីឡាកាន់តែច្រើន។

ជាមួយគ្នានេះ ម្ចាស់ជើងឯកមេដាយមាសរូបនេះបានផ្ញើសារទៅកាន់យុវជនថា៖«សម្រាប់ខ្ញុំក៏មានសារផ្តាំផ្ញើដល់យុវជនទាំងអស់ ក៏ដូចជាអ្នកដែលចង់មានឈ្មោះល្បី អ៊ីចឹងអាចមកចូលរួមលេងកីឡាវ៉ូវីណាមបាន។ នៅពេលមានការប្រកួតជម្រើសជាតិ ប្រសិនបើយើងទទួលបានមេដាយប្រាក់ ឬក៏មាសគេនឹងអាចយកយើងចូលជាកីឡាករជម្រើសជាតិ។ ហើយនឹងមានឱកាសចេញទៅប្រកួតនៅក្រៅប្រទេស»។

គួរបញ្ជាកថា សម្រាប់ការប្រកួតកីឡាវ៉ូវីណាមជ្រើសរើសជើងឯកប្រចាំឆ្នាំ២០១៦ ក្លិបក្រសួងការពារជាតិទទួលបានចំណាត់ថ្នាក់លេខ១ ឬឯសមាគមក្រុមហ៊ុនរ័ត្នសាខនទទួលបានចំណាត់លេខ២ ខណៈក្លិបវិទ្យាល័យវត្តកោះបានចំណាត់ថ្នាក់លេខ៣។ ចំណែកសាកលវិទ្យាល័យអាស៊ីអឺរ៉ុបបានចំណាត់ថ្នាក់លេខ៤ និងក្លិបវិទ្យាល័យ ជា ស៊ីម បានចំណាត់ថ្នាក់លេខ៥។ ដោយឡែកក្លិបចំនួនពីរផ្សេងទៀតមិនទទួលបានមេដាយនោះឡើយ៕