កីឡាជាតិ
ជាតិ
Asian Beach Games៖ លោក ហុក ឈាងគីម រំពឹងថា ល្បុក្កតោ ទទួលបានលទ្ធផលល្អ
× ក្រោយពីធ្វើការហ្វឹកហាត់ត្រៀមក៏ដូចជាបញ្ជូនទៅហ្វឹកហាត់ នៅទីក្រុងដាណាង ប្រទេសវៀតណាម តាំងពីថ្ងៃទី២២ ខែកញ្ញា កន្លងទៅ។ លោកព្រឹទ្ធាចារ្យកីឡា ហុក ឈាងគីម គ្រូបង្វឹកកីឡាល្បុក្កតោកម្ពុជាមានក្តីរំពឹង និងជឿជាក់យ៉ាងមុតមាំថា ក្រុមល្បុក្កតោកម្ពុជានឹងទទួលបានលទ្ធផលល្អសម្រាប់ការចូលរួមលើកដំបូងរបស់ខ្លួនក្នុងព្រឺត្តិការណ៍កីឡាឆ្នេរខ្សាច់អាស៊ីលើកទី៥ នៅទីក្រុងដាណាង ប្រទេសវៀតណាម។
ទោះបីវាជាការចូលរួមលើកដំបូងរបស់ក្រុមកីឡាល្បុក្កតោកម្ពុជាក៏ដោយ ប៉ុន្តែលោកព្រឹទ្ធាចារ្យកីឡា ហុក ឈាងគីម គ្រូបង្វឹកកីឡាល្បុក្កតោកម្ពុជាហាក់ដូចជាមានកី្តរំពឹង និងជឿជាក់ខ្ពស់លើសមត្ថភាពរបស់កីឡាករកីឡាការិនីល្បុក្កតោកម្ពុជា ក្នុងការដណ្តើមមេដាយក្នុងព្រឹត្តិការណ៍កីឡាឆ្នេរខ្សាច់អាស៊ីលើកទី៥នៅទីក្រុងដាណាង ប្រទេសវៀតណាម។
អ្វីដែលធ្វើឲ្យលោកព្រឹទ្ធាចារ្យកីឡារូបនេះមានកី្តរំពឹងខ្ពស់ ដោយសារលោកមើលឃើញថា កីឡាករកីឡាការិនីកម្ពុជាមានការព្យាយាមហ្វឹកហាត់ខ្លាំងក្នុងការពង្រឹងសមត្ថភាព និងបច្ចេកទេសរបស់ខ្លួន ដើម្បីត្រៀមមុនការប្រកួត។ ម្យ៉ាងទៀតដោយសារក្រុមកីឡាការិនីល្បុក្កតោកម្ពុជាទាំង៤នាក់ដែលចូលរួម បានចេញទៅហ្វឹកហាត់ពង្រឹងបច្ចេកទេសអស់រយៈពេល៦ថ្ងៃនៅទីនោះផ្ទាល់។
ទោះបីជាមានក្តីរំពឹងយ៉ាងណាក្តី តែលោកគ្រូបង្វឹកកីឡាល្បុក្កតោរូបនេះបានបញ្ជាក់ថា លទ្ធផលយ៉ាងណាលោកមិនហ៊ានព្យាករណ៍ទុកមុននោះឡើយ វាអាស្រ័យទៅលើការប្រកួតរបស់កីឡាករកីឡាការិនីជាក់ស្តែងនៅលើសង្វៀន។ គួរបញ្ជាក់ថា សម្រាប់ការចូលរួមលើកនេះក្រុមល្បុក្កតោកម្ពុជានឹងប្រកួតលើវិញ្ញាសាប្រយុទ្ធ ហើយពួកគេនឹងធ្វើការប្រកួតអំឡុងពេលចាប់ពីថ្ងៃទី២៩ កញ្ញា ដល់ថ្ងៃទី៤ តុលា។
ដោយឡែក ក្រុមកីឡាចំបាប់កម្ពុជាដែលធ្លាប់បានសាងស្នាដៃជាប្រវត្តិសាស្ត្រដំបូងក្នុងព្រឹត្តិការណ៍កីឡាឆ្នេរខ្សាច់អាស៊ីតាមរយៈការដណ្តើមបានមេដាយសំរឹទ្ធរបស់កីឡាការិនី នី សំណាង នៅប្រទេសថៃកាលពីឆ្នាំ២០១៤។ ក្រុមនេះបានចាកចេញពីកម្ពុជាកាលពីព្រឹកថ្ងៃទី២៨ ខែកញ្ញា ដើម្បីចូលរួមប្រកួតកីឡាឆ្នេរខ្សាច់អាស៊ីលើកទី៥នៅទីក្រុងដាណាង ប្រទេសវៀតណាមចាប់ពីថ្ងៃទី៣០ ខែកញ្ញា ដល់ថ្ងៃទី២ ខែតុលា។
សម្រាប់ការចូលរួមព្រឹត្តិការណ៍កីឡាឆ្នេរអាស៊ីលើកទី៥នេះ ចំបាប់កម្ពុជាបានបញ្ជូនកីឡាករកីឡាការិនី និងគ្រូបង្វឹកទាំងអស់ចំនួន៥នាក់ចូលរួម ក្នុងនោះគ្រូបង្វឹក២រូប(លោក ធិន វិចិត្រ និងលោក កាង ដែនពិសិដ្ឋ) កីឡាករ៣នាក់ និងកីឡាការិនី២នាក់៕
Tag:
ល្បុក្កតោ
ហុក ឈាងគីម
Asian Beach Games 2016
© រក្សាសិទ្ធិដោយ thmeythmey.com