កីឡាប្រពៃណី៥ប្រភេទនឹងបង្ហាញវត្តមាននៅវិហារសួគ៌ក្នុងថ្ងៃភ្ជុំបិណ្ឌធំ

កីឡាជាតិ

ជាតិ

កីឡាប្រពៃណី៥ប្រភេទនឹងបង្ហាញវត្តមាននៅវិហារសួគ៌ក្នុងថ្ងៃភ្ជុំបិណ្ឌធំ

29, Sep 2016 , 4:59 pm

រូបភាព

ដោយ:

កីឡាប្រពៃណីវប្បធម៌ខ្មែរចំនួន៥ប្រភេទរួមមាន ល្បុក្កតោ ចំបាប់ ប្រណាំងក្របី ប្រណាំងសេះ និងគុនដំបង នឹងធ្វើការសម្តែងរយៈពេលមួយថ្ងៃនៅវត្តវិហារសួគ៌ ដើម្បីអបអរនាឱកាសបុណ្យភ្ជុំបិណ្ឌ(បិណ្ឌ១៥)ដែលជាបុណ្យវប្បធម៌ប្រពៃណីខ្មែរឲ្យកាន់តែមានភាពសប្បាយរីករាយ។ ម្យ៉ាងទៀត ដើម្បីផ្សព្វផ្សាយឲ្យប្រជាពលរដ្ឋបានដឹង ក៏ដូចជារក្សាទំនៀបទំលាប់ប្រពៃណីរបស់ដូនតាខ្មែរ។

ជារៀងរាល់ឆ្នាំនាឱកាសនៃពិធីបុណ្យភ្ជុំបិណ្ឌនៅវត្តវិហារសួគ៌ក្នុងស្រុកខ្សាច់កណ្តាល ខេត្តកណ្តាល តែងតែមានការសម្លែងក៏ដូចជាប្រកួតកីឡាផ្សេងៗជាច្រើន ដើម្បីអបអរកម្មវិធីបុណ្យព្រៃណីខ្មែរមួយនេះ។ ជាក់ស្តែងកីឡា៥ប្រភេទរូមមាន ល្បុក្កតោ ចំបាប់ ប្រណាំងក្របី ប្រណាំងសេះ និងគុនដំបង ត្រូវបានគណៈកម្មការរៀបចំការប្រកួតកីឡានៅវត្តវិហារសួគ៌ដាក់ឲ្យចូលរួមប្រកួត និងសម្តែងក្នុងថ្ងៃបុណ្យភ្ជុំធំ(បិណ្ឌ១៥)នៅឆ្នាំនេះ។

បើយោងតាម លោក ហុក ឈាងគីម គ្រូបង្វឹកកីឡាល្បុក្កតោ និងចំបាប់បុរាណខ្មែរ ការប្រកួតកីឡានៅវិហារសួគ៌ឆ្នាំនេះមានការខុសប្លែកពីឆ្នាំមុនៗ ដោយឆ្នាំនេះការចូលរួមសម្តែងពីក្រុមកីឡាករល្បុក្កតោរបស់សមាគមក្រសួងមហាផ្ទៃមហាផ្ទៃ បន្ថែមលើប្រភេទកីឡាទាំង៤ដែលដាក់ឲ្យចូលរួមរៀងរាល់ឆ្នាំមុនៗ។

ជាមួយគ្នានេះ លោក ចាប លឿន អ្នករៀបចំកម្មវិធីប្រកួតកីឡាចំបាប់នៅវត្តវិហារសួគ៌បានបញ្ជាក់ថា ការប្រកួតកីឡានៅវិហារសួគ៌ឆ្នាំនេះមិនទាន់ដឹងពីចំនួនអ្នកចូលរួមជាក់លាក់នៅឡើយទេ។ ប៉ុន្តែសម្រាប់វិញ្ញាសារបស់លោក(ចំបាប់) គឺមិនកំណត់ពីចំនួនអ្នកចូលរួមនោះទេ វាអាស្រ័យលើអ្នកចង់ចូលរួម និងថវិកាដែលទទួលបានពីសប្បុរសជនក្នុងការឧបត្ថម្ភដល់កីឡាករ។

បើយោងតាម លោក ចាប លឿន ទោះបីវាជាការប្រកួតដើម្បីអបអរក្នុងឱកាសនៃពិធីបុណ្យភ្ជុំបិណ្ឌក៏ដោយ ប៉ុន្តែការប្រកួតនេះមានការប្រជែងគ្នាក្នុងការដណ្តើមយកចំណាត់ថ្នាក់ផងដែរ ដើម្បីទទួលបានប្រាក់រង្វាន់លើកទឹកចិត្តទៅតាមប្រភេទកីឡានីមួយៗ។

ជាក់ស្តែងកាលពីឆ្នាំមុនកីឡាករដែលចូលរួមម្នាក់ៗទទួលបានប្រាក់ឧបត្ថម្ភលើកទឹកចិត្តពី២ម៉ឺនរៀលទៅ៣ម៉ឺនរៀល។ ប៉ុន្តែសម្រាប់ឆ្នាំនេះកម្មវិធីដែលរៀបចំដោយ លោកមេឃុំវិហារសួគ៌ ស្រុកខ្សាច់កណ្តាល ខេត្តកណ្តាលមួយនេះ មិនទាន់ដឹងច្បាស់ពីទំហំទឹកប្រាក់លើកទឹកនោះឡើយ។

ពាក់ព័ន្ធទៅនឹងគោលបំណងនៃការរៀបចំការសម្តែង និងប្រកួតកីឡានៅវត្តវិហារសួគ៌ក្នុងឱកាសបុណ្យភ្ជុំបិណ្ឌនេះ។ លោក ចាប លឿន ដែលជាអ្នករៀបចំការប្រកួតកីឡាចំបាប់បូរាណ មិនបានដឹងហេតុផលច្បាស់លាស់នោះទេ ដោយលោកគ្រាន់តែបញ្ជាក់ថា វាជាការធ្វើតៗគ្នា ដើម្បីរក្សាប្រពៃណីរបស់ដូនតាខ្មែរយើងប៉ុណ្ណោះ៕