ប៉េតង់កម្ពុជាកំពុងមានមេដាយសំរឹទ្ធពីរនៅក្នុងដៃពីព្រឹត្តិការណ៍កីឡាឆ្នេរខ្សាច់អាស៊ីនៅដាណាង

កីឡាជាតិ

ប៉េតង់កម្ពុជាកំពុងមានមេដាយសំរឹទ្ធពីរនៅក្នុងដៃពីព្រឹត្តិការណ៍កីឡាឆ្នេរខ្សាច់អាស៊ីនៅដាណាង

30, Sep 2016 , 5:30 pm

រូបភាព

ដោយ:

ប៉េតង់កម្ពុជាកំពុងមានមេដាយសំរឺទ្ធពីរនៅក្នុងដៃលើវិញ្ញាសាប្រកួត៣នាក់ទល់៣នាក់បុរស-នារី បន្ទាប់ពីក្រុមទាំងពីរបានឆ្លងផុតវគ្គជម្រុះតាមពូលឡើងមកកាន់វគ្គពាក់កណ្តាលផ្តាច់ព្រ័ត្រកាលពីម្សិលមិញ។ ប៉ុន្តែបើកម្ពុជាអាចឈ្នះគូប្រកួតនៅថ្ងៃនេះ អាចនឹងទទួលបានមេដាយប្រាក់ ឬមាសពីព្រឹត្តិការណ៍កីឡាឆ្នេរខ្សាច់អាស៊ីលើកទី៥នៅទីក្រុងដាណាង ប្រទេសវៀតណាម នេះ។

ក្រោយពីធ្វើការប្រកួតជម្រុះលើវិញ្ញាសា៣នាក់ទល់៣នាក់កាលពីម្សិលមិញ ក្រុមប៉េតង់កម្ពុជាផ្នែកបុរសដែលមានកីឡាករ មួង ទិត្យម៉ាណែត, សៀង វណ្ណា, ទេព វណ្ណា និងកីឡាករ យ៉ា ច័ន្ទដារ៉ារឹទ្ធ បានយកឈ្នះឡាវ ៦-៤ និងបន្តយកឈ្នះម៉ាឡេស៊ី ១០-២។ ប៉ុន្តែក្រុមនេះបានចាញ់ក្រុមវៀតណាម ១០-៧ និងចាញ់ក្រុមថៃ ១៣-៥។ លទ្ធផលឈ្នះ២ និងចាញ់២នេះ នាំឲ្យក្រុមកម្ពុជាទទួលបានសិទ្ធឡើងមកកាន់វគ្គពាក់កណ្តាលផ្តាច់ព្រ័ត្រ។

ជាមួយគ្នានេះដែរ សម្រាប់ការប្រកួតជម្រុះតាមពូលកាលពីម្សិលមិញក្រុមកីឡាប៉េតង់កម្ពុជាផ្នែកនារីដែលមានកីឡាការិនី ឃួន យ៉ារី, ស្រៀង សុរ៉ាឃីម, ស៊ុន គន្ធា និងកីឡាការិនី វង ចន្ថា បានយកឈ្នះ៤ប្រកួត និងចាញ់១ប្រកួត។

ក្នុងនោះក្រុមកីឡាការិនីកម្ពុជាបានយកឈ្នះក្រុមថៃ ៩-៨, ម៉ាឡេស៊ី ៨-៦, ឡាវ ១៣-១០ និងក្រុមឥណ្ឌា ១៣-២ ប៉ុន្តែចាញ់ក្រុមម្ចាស់ផ្ទះវៀតណាម ១១-៦។ លទ្ធផលនេះបានធ្វើឲ្យក្រុមកីឡាការិនីកម្ពុជាមួយនេះមានសិទ្ធិគ្រប់គ្រាន់ក្នុងការឡើងមកកាន់វគ្គពាក់កណ្តាលផ្តាច់ព្រ័ត្រដោយស្វ័យប្រវត្តិ។

ការឡើងមកកាន់វគ្គពាក់កណ្តាលផ្តាច់ព្រ័ត្ររបស់ក្រុមកម្ពុជាទាំងពីរនេះមានន័យថា កម្ពុជាកំពុងមានមេដាយសំរឹទ្ធស្ទួនពីររួចទៅបាត់ហើយ។ ប៉ុន្តែប្រសិនកម្ពុជាអាចយកឈ្នះនៅថ្ងៃនេះ កម្ពុជាអាចទទួលបានមេដាយប្រាក់ ឬមាសពីព្រឺត្តិការណ៍កីឡាឆ្នេរខ្សាច់អាស៊ីលើកទី៥នៅទីក្រុងដាណាងប្រទេសវៀតណាម បន្ថែមលើមេដាយទាំង៥ដែលមានស្រាប់៕