ទោះបីមានរបួសធ្លាក់សរសៃស្មាទាំងសងខាងដ៏យូរខែក៏ដោយ តែកីឡាការិនីចំបាប់ នី សំណាង ម្ចាស់មេដាយសំរឹទ្ធកីឡាឆ្នេរខ្សាច់លើកទី៤នៅថៃ កាលពីឆ្នាំ២០១៤ បានប្តេជ្ញាថា នឹងធ្វើឲ្យបានល្អសម្រាប់ការចូលរួមព្រឹត្តិការណ៍កីឡាឆ្នេរខ្សាច់ជើងឯកទ្វីបអាស៊ី(Asian Beach Games 2016) នៅទីក្រុងដាណាង ប្រទេសវៀតណាម លើកនេះ។
កីឡាការិនីចំបាប់ម្ចាស់មេដាយសំរឹទ្ធកីឡាឆ្នេរខ្សាច់លើកទី៤ នី សំណាង ទោះបីកំពុងញាំញីដោយរបួសធ្លាក់សរសៃស្មាទាំងសងតាំងពីខែកុម្ភៈ ឆ្នាំ២០១៦ក៏ដោយ ប៉ុន្តែកញ្ញាបានប្តេជា្ញនឹងធ្វើឲ្យល្អតាមរយៈការខិតខំប្រឹងប្រែងប្រកួតឲ្យអស់ពីសមត្ថភាពនៅក្នុងព្រឹត្តិការណ៍កីឡាឆ្នេរខ្សាច់អាស៊ីលើកទី៥នៅទីក្រុងដាណាង ប្រទេសវៀតណាម។
ក្នុងបទសម្ភាសជាមួយសារព័ត៌មានថ្មីៗម្ចាស់មេដាយសសំរឹទ្ធរូបនេះបានប្តេជ្ញាដូច្នេះថា៖«ខ្ញុំមិនហ៊ានរំពឹងរហូតដល់ដណ្តើមបានមេដាយនោះទេ តែខ្ញុំប្តេជ្ញាថា នឹងខិតខំប្រឹងប្រែងប្រកួតឲ្យអស់ពីសមត្ថភាព។ ទោះបីខ្ញុំឈឺក៏ពិតមែន តែចិត្តខ្ញុំនៅមាន»។
ទោះបីម្ចាស់មេដាយសំរឹទ្ធរូបនេះបានបង្ហាញពីគោលជំហរ និងការតាំងចិត្តមិនយកបញ្ហាឈឺសរសៃដាក់ក្នុងចិត្តយ៉ាងណាក៏ដោយ ប៉ុន្តែនាងបានចាត់ទុកថា វាជាកត្តាមួយធ្វើឲ្យបាត់បង់ការជឿជាក់ និងទំនុកចិត្តរបស់គេក្នុងការប្រកួត។ កត្តានេះបានធ្វើឲ្យម្ចាស់មេដាយសំរឹទ្ធរូបនេះមិនហ៊ានដាក់ក្តីរំពឹងខ្ពស់ក្នុងការឈានដល់ដណ្តើមបានមេដាយពីព្រឹត្តិការណ៍កីឡាឆ្នេរខ្សាច់លើកនេះឡើយ។
ម្យ៉ាងទៀត នាងយល់ថាការប្រកួតកីឡាឆ្នេរខ្សាច់មានលក្ខណខុសប្លែកពីការប្រកួតធម្មតា ពោលគឺការប្រកួតនេះប្រសិនបើកីឡាករណាអាចផ្តួលគូប្រកួតឲ្យដួល ឬក្បាលជង្គង់ដល់ដីនឹងទទួលបានពិន្ទុតែម្តង។ ចំណែកការប្រកួតនៅលើកម្រាល គឺកីឡាករអាចប្រកួតក្នុងអំឡុងពេលដេកដួលក៏បាន។
បើយោងតាមកីឡាការិនី នី សំណាង របួសធ្លាក់សរសៃស្មាទាំងសងរបស់ខ្លួនកើតឡើងក្នុងអំឡុងពេលហ្វឹកហាត់នៅប្រទេសកូរ៉េខាងត្បូងកាលពីខែកុម្ភៈ ឆ្នាំ២០១៦ កន្លងទៅ ខណៈពេលដែលគ្រូបង្វឹកជនជាតិកូរ៉េខាងត្បូងឲ្យកញ្ញាចូលហ្វឹកហាត់ពង្រឹងបច្ចេកទេសជាមួយប្រុសៗដែលជាកីឡាករជម្រើសជាតិរបស់កូរ៉េ។ ហើយគិតមកត្រឹមខែនេះរបួសរបស់កីឡាការិនីជម្រើសជាតិ នី សំណាង មានរយៈពេលជិត៨ខែមកហើយ។
ដោយសារការញាំញីជាមួយរបួសដែលនាងបានអះអាងខ្លួនឯងថា ជាការធ្លាក់សរសៃស្មាអាចនឹងធ្វើឲ្យកីឡាការិនីម្ចាស់មេដាយមាសស៊ីហ្គេមឆ្នាំ២០១៣ឈានដល់ការបោះបង់អាជីពជាកីឡាការិនីចំបាប់ចាប់យកអាជីពផ្សេង។
៖«ដោយសារខ្ញុំគិតថា របួសធ្លាក់សរសៃស្មាររបស់ខ្ញុំវានៅឈឺ ម្យ៉ាងទៀតខ្ញុំចង់ផ្តល់ឱកាសដល់ក្មេងជំនាន់ក្រោយបានចូលរួមដូចខ្ញុំ ដូច្នេះខ្ញុំប្រហែលជាអាចលាឈប់ពីអាជីពកីឡាការិនីចំបាប់។ ប៉ុន្តែរង់ចាំការសម្រេចរបស់ឯកឧត្តមប្រធាន ថា តើគាត់ឲ្យឈប់ ឬនៅបន្ត»។ នេះជាការលើកឡើងរបស់កីឡាការិនី នី សំណាង។
គួរបញ្ជាក់ថា សម្រាប់ការចូលរួមកីឡាឆ្នេរខ្សាច់អាស៊ី Asian Beach Games 2016 ដែលធ្វើឡើងនៅទីក្រុងដាណាង ប្រទេសវៀតណាម កីឡាការិនីចំបាប់ នី សំណាង ប្រកួតក្នុងប្រទេសទម្ងន់ក្រោម៦០គីឡូក្រាម ប៉ុន្តែជាក់ស្តែងកីឡាការិនីរូបនេះមានទម្ងន់៥៣គីឡូក្រាម។ នី សំណាង រួមជាមួយកីឡាករកីឡាការិនីចំបាប់៤នាក់ផ្សេងទៀតបានចាកចេញពីកម្ពុជាតាំងថ្ងៃទី២៨ ខែកញ្ញា មកម្ល៉េះ៕