អគ្គលេខាធិការវ៉ូវីណាមកម្ពុជា នៅតែមានសង្ឃឹម ទោះបី Beach Games ពិបាកស្វែងរកមេដាយ

កីឡាជាតិ

អគ្គលេខាធិការវ៉ូវីណាមកម្ពុជា នៅតែមានសង្ឃឹម ទោះបី Beach Games ពិបាកស្វែងរកមេដាយ

30, Sep 2016 , 12:40 pm

រូបភាព

ដោយ:

អគ្គលេខាធិការសហព័ន្ធកីឡាវ៉ូវីណាមកម្ពុជានៅតែបងា្ហញពីក្តីសង្ឃឹមរបស់ខ្លួនសម្រាប់ការចូលរួមរបស់កីឡាករកីឡាការិនិវ៉ូវីណាមកម្ពុជាក្នុងព្រឹត្តិការណ៍កីឡាឆ្នេរខ្សាច់អាស៊ី(Asian Beach Games 2016) នៅទីក្រុងដាង ប្រទេសវៀតណាម។ ប៉ុន្តែលោកទទួលស្គាល់ថា ប្រហែលជាពិបាកក្នុងការស្វែងរកមេដាយសម្រាប់វិញ្ញាសាមួយនេះ ព្រោះវាជាប្រភេទកីឡាដែលមានដើមកំណើតពីប្រទេសវៀតណាម។

លោក ទេព ជីវសុខុម អគ្គលេខាធិការសហព័ន្ធកីឡាវ៉ូវីណាមកម្ពុជានៅតែបងា្ហញពីក្តីសង្ឃឹមជឿជាក់លើសមត្ថភាពរបស់កីឡាករកីឡាការិនីវ៉ូវីណាមទាំង១០នាក់របស់កម្ពុជា ក្នុងការដណ្តើមបានមេដាយពីព្រឹត្តិការណ៍ Asian Beach Games 2016 ជូនជាតិកម្ពុជាសម្រាប់ការចូលរួមលើកដំបូង។ ទោះបីប្រភេទកីឡានេះមានដើមកំណើតមកពីប្រទេសវៀតណាម ដែលជាម្ចាស់ផ្ទះនៃការប្រកួតនេះក៏ដោយ។

ទោះបីវាជាការចូលរួមលើកទី១សម្រាប់វ៉ូវីណាមកម្ពុជា ប៉ុន្តែលោកអគ្គលេខាធិការសហព័ន្ធកីឡាវ៉ូវីណាមកម្ពុជាបានចាត់ទុកថា ការប្រកួតនេះវាមិនមានអ្វីខុសប្លែក និងបង្ករភាពលំបាកសម្រាប់កីឡាករកីឡការិនីកម្ពុជានោះឡើយ។ ដោយសារពួកគេទាំងនេះទទួលបានការហ្វឹកហាត់ពង្រឹងសមត្ថភាព និបច្ចេកទេសត្រៀមនៅទីក្រុងដាណងរយៈពេល២ខែមុនចូលរួមព្រឹត្តិការណ៍នេះ។

កត្តាទាំងអស់នេះហើយដែលធ្វើឲ្យលោក ទេព ជីវសុខុម មានទំនុកចិត្តយ៉ាងខ្លាំងលើសមត្ថភាពរបស់កីឡាករកីឡាការិនីកម្ពុជាទាំងនេះ។ ហើយអ្វីដែលធ្វើឲ្យលោកមានទំនុកចិត្តខ្លាំងបំផុតនោះ បន្ទាប់ពីគ្រូបង្វឹកជនជាតិវៀតណាមបានវាយតម្លៃថា កម្រិតបច្ចេកទេសរបស់កីឡាករកីឡាការិនីកម្ពុជាមានកើនឡើង។ ទន្ទឹមនឹងនេះ លោកបានដាក់ក្តីសង្ឃឹមរហូតដល់៧០ភាគរយលើការដណ្តើមបានមេដាយរបស់កម្ពុជា ដោយលោកទុក៣០ភាគរយរង់ចាំការប្រកួតបានបញ្ចប់។

ទោះបីជាយ៉ាងនេះក្តីក្នុងបទសម្ភាសជាមួយសារព័ត៌មានអេឡិចត្រូនិកថ្មីៗ លោក ទេព ជីវសុខុម បានបញ្ជាក់ដូច្នេះថា៖«យើងមានការព្រួយបារម្ភខ្លាំងជាងគេលើ ឥណ្ឌូនេស៊ី និងមីយ៉ាន់ម៉ា។ ទោះបីយើងគិតថា យើងដើរចូលមុនគាត់ក៏ដោយ ប៉ុន្តែកម្រិតបច្ចេកទេសរបស់គាត់មានភាពប្រហាក់ប្រហែល។ អ៊ីចឹងមានការលំបាកក្នុងការដណ្តើមយកមេដាយ ប៉ុន្តែយើងនៅតែមានសង្ឃឹម ព្រោះយើងបានឆ្លងកាត់ការបញ្ជូនរបស់ក្រសួងអប់រំ និងមជ្ឈមណ្ឌលជាតិហ្វឹកហ្វឺនទៅហ្វឹកហាត់នៅទីនោះរយៈពេល២ខែ។ ហើយតាមការវាយតម្លៃរបស់អ្នកគ្រូបង្វឹកជនជាតិវៀតណាមថា កម្រិតបច្ចេកទេសមានការកើនឡើង ដូច្នេះយើងសង្ឃឹមច្រើនក្នុងការដណ្តើមបានមេដាយ»។

ដោយសារការប្រកួតកីឡាឆ្នេរខ្សាច់អាស៊ី(Asian Beach Games 2016) នៅទីក្រុងដាណាង ប្រទេសវៀតណាម មិនមានលក្ខណៈទូលំទូលាយដូចការប្រកួតលក្ខណៈអន្តរជាតិផ្សេងៗ ដោយតម្រូវឲ្យកីឡាករម្នាក់ប្រកួតបានតែមួយវិញ្ញាសា។ ជាហេតុធ្វើឲ្យកម្ពុជាមានការលំបាកផងដែរ ដោយសារខ្វះធនធានល្អៗក្នុងការចូលរួម។ ជាពិសេសព្រឹត្តិការណ៍នេះមិនបានដាក់បញ្ចូលវិញ្ញាសាសក្តានុពលរបស់កម្ពុជា ដែលធ្លាប់ដណ្តើមបានមេដាយមាសពិភពលោក។

គួរបញ្ជាក់ថា សម្រាប់ការប្រកួតកីឡាឆ្នេរខ្សាច់អាស៊ីប្រចាំឆ្នាំ២០១៦នៅទីក្រុងដាណាង ប្រទេសវៀតណាម ដែលធ្វើឡើងចាប់ផ្តើមពីថ្ងៃទី២៤ កញ្ញា ដល់ថ្ងៃទី៣ តុលា ខាងមុខនេះ។ វ៉ូវីណាមកម្ពុជាបានបញ្ជូនកីឡាករចំនួន១០នាក់(ស្រី៣នាក់)និងគណប្រតិភូ២នាក់ឲ្យចូលរួម ដោយកីឡាករទាំងនេះប្រកួតលើវិញ្ញាសាចំនួន៩។

កីឡាករកីឡាការិនីកម្ពុជាទាំងនោះរួមមាន កីឡាករ ប្រាក់ សុវណ្ណនី, កើត សុភ័ក្ត្រ, ជិន ពិសិដ្ឋ, ជ្រិន ប៊ុនឡុង, លី បូរ៉ាមី, សាន សុជាតិ, សុខ សម្បត្តិ, កីឡាការិនី ប៉ាល់ ឆរស្មី, សឿ ច័ន្ធលក្ខិណា និងកីឡាការិនី ពៅ សុខា៕