កីឡាជាតិ
ជាតិ
ប្រតិភូ និងក្រុមអត្តពលិកកីឡាឆ្នេរខ្សាច់កម្ពុជាមកដល់មាតុប្រទេសវិញថ្ងៃនេះ ក្រុមកីឡាឆ្នេរខ្សាច់កម្ពុជា (រូបភាពហ្វេសប៊ុក NOCC)
× ក្រោយពីបានបំពេញបេសកកម្មចូលរួមការប្រកួតកីឡាឆ្នេរខ្សាច់អាស៊ី Asian Beach Games 2016 លើកទី៥ នៅទីក្រុងដាណាង ប្រទេសវៀតណាម អស់រយៈជាច្រើនថ្ងៃ ប្រតិភូរួមជាមួយនឹងក្រុមអត្តពលិកកម្ពុជានឹងមកដល់មាតុប្រទេសវិញនារសៀល។ ការវិលត្រឡប់របស់ក្រុមប្រតិភូកីឡាកម្ពុជានេះដោយបានពាំនាំនូវមេដាយមាស៦ ប្រាក់៦ និងសំរឺទ្ធ៩ មកកម្ពុជាផងដែរ។
ប្រតិភូព្រមទាំងក្រុមអត្តពលិកកម្ពុជាចាកចេញពីទីក្រុងណាដាង ប្រទេសវៀតណាម ដោយមកដល់កម្ពុជានាវេលាម៉ោង៤:៣០នាទីរសៀលនេះ បន្ទាប់ពីបានចូលរួមប្រកួតក្នុងកីឡាឆ្នេរខ្សាច់អាស៊ី Asian Beach Games 2016 លើកទី៥ដែលប្រព្រឹត្តទៅតាំងពីថ្ងៃទី២៤ ខែកញ្ញា ដល់ថ្ងៃទី៣ ខែតុលា កន្លងទៅនេះ។
ការវិលត្រឡប់មកកាន់មាតុប្រទេសរបស់ប្រតិភូ និងក្រុមអត្តពលិកកម្ពុជានេះ ដោយបាននាំយកនូវមេដាយសរុបចំនួន២១ពីព្រឹត្តិការណ៍នេះក្នុងនោះមាស៦ ប្រាក់៦ និងសំរឺទ្ធ៩។ មេដាយទាំងនេះក្រុមអត្តពលិកកម្ពុជាដណ្តើមបានលើប្រភេទវិញ្ញាសាប៉េតង់(មាស៣ ប្រាក់១ នឹងសំរឹទ្ធ៣), កីឡាវ៉ូវីណាម(មាស២ ប្រាក់១ និងសំរឹទ្ធ៤) និងល្បុក្កតោ(មាស១ ប្រាក់៤ និងសំរឹទ្ធ២)។
ការដណ្តើមបានមេដាយ២១ពីព្រឹត្តិការណ៍កីឡាឆ្នេរខ្សាច់អាស៊ី Asian Beach Games លើកទី៥នេះ វាលទ្ធផលដ៏ធំធេង និងជាប្រវត្តិសាស្ត្រថ្មីសម្រាប់កម្ពុជាដែលមិនធ្លាប់មាននាពេលកន្លងមក ខណៈកាលពីលើកមុននៅឆ្នាំ២០១៤ នៅទីក្រុងភូកេតប្រទេសថៃ កម្ពុជាទទួលបានមេដាយសំរឹទ្ធតែ១ប៉ុណ្ណោះ។
បើយោងតាមទំព័រហ្វេសប៊ុករបស់គណៈកម្មាធិការជាតិអូឡាំពិកកម្ពុជា(NOCC) ក្រុមប្រតិភូកីឡាដែលត្រឡប់មកដល់ថ្ងៃនេះមាន៤ក្រុមក្នុងនោះមានក្រុមកីឡាបាល់ទះឆ្នេរខ្សាច់, ក្រុមកីឡាវ៉ូវីណាម, ក្រុមកីឡាចំបាប់ឆ្នេរខ្សាច់ និងក្រុមកីឡាល្បុក្កតោ៕
Tag:
Asian Beach Games 2016
© រក្សាសិទ្ធិដោយ thmeythmey.com