ជាតិ
សេដ្ឋកិច្ច
CRF ជំរុញឲ្យរោងម៉ាស៊ីនកិនស្រូវ បន្តប្រមូលទិញស្រូវក្រអូប ដែលនៅសល់ជិត ២០ម៉ឺនតោនទៀត រូបភាពពីសហព័ន្ធស្រូវអង្ករកម្ពុជា
× ភ្នំពេញ៖ សហព័ន្ធស្រូវអង្ករកម្ពុជា(CRF) ជំរុញឲ្យរោងម៉ាស៊ីនកិនស្រូវបន្តប្រមូលទិញស្រូវសែនក្រអូបពីកសិករបន្ថែមទៀត ដើម្បីជួយសង្គ្រោះតម្លៃស្រូវ ដែលធ្លាក់ចុះ។ លោក សុខ ពុទ្ធីវុធ ប្រធាន CRF ថ្លែងថា ទន្ទឹមនឹងមានការគាំទ្រពីមហាជនលើការទិញអង្ករខ្មែរ និងការជួយផ្នែកដើមទុនពីរដ្ឋាភិបាល រោងម៉ាស៊ីនកិនស្រូវ មិនគួរបង្អង់សកម្មប្រមូលទិញស្រូវ រហូតដល់រដូវប្រមូលផលស្រូវធ្ងន់នោះទេ។ លោកថា ការបង្អែបង្អង់ទិញស្រូវរបស់រោងម៉ាស៊ីនកិនស្រូវ នឹងធ្វើឲ្យតម្លៃស្រូវបន្តធ្លាក់ចុះថែមទៀត។
បើតាមលោក សុខ ពុទ្ធីវុធ ទិន្នផលស្រូវសែនក្រអូបសរុប មានប្រមាណជិត ៥០ម៉ឺនតោន ដែលក្នុងនោះស្រូវប្រហែល ៣០ម៉ឺនតោន ត្រូវបានប្រមូលទិញ។ ប្រធាន CRF រូបនេះ បានថ្លែងក្នុងសន្និសីទសារព័ត៌មានស្ដីពី«យុទ្ធនាការទិញស្រូវកម្ពុជា ជួយកសិករកម្ពុជា» នៅថ្ងៃទី៤ខែតុលា ថា ក្រៅពីទីផ្សារ អន្តរជាតិ ទីផ្សារក្នុងស្រុក គឺជាកត្តាជួយដោះស្រាយបញ្ហាស្រូវអង្ករដ៏សំខាន់មួយ ខណៈមានតម្រូវការប្រើប្រាស់អង្ករមិនតិចជាង ១លាននិង២សែនតោន ក្នុងមួយឆ្នាំៗ។ លោកថែមទាំងអំពាវនាវឲ្យសា្ថប័នរដ្ឋ និងឯកជន រួមទាំងប្រជាពលរដ្ឋទូទៅ ចូលរួមទិញអង្ករខ្មែរ។
សូមស្ដាប់ប្រសាសន៍លោក សុខ ពុទ្ធីវុធ ខាងក្រោមនេះ៖
ក្នុងពេលថ្មីៗនេះ រដ្ឋាភិបាលបានបញ្ចេញថវិកា ២៧លានដុល្លារ ក្នុងនោះមូលនិធិ ៧លានដុល្លារពីធនាគារអភិវឌ្ឍន៍ជនបទ(RDB) ។ RDB ជាអ្នកអនុវត្តនីតិវិធីផ្ដល់កម្ចីដល់រោងម៉ាស៊ីនកិនស្រូវលើកញ្ចប់ថវិកាទាំងនេះ ដោយតម្រូវលក្ខខណ្ឌ ដូចជា យកស្តុកស្រូវជាវត្ថុធានា ការប្រាក់៧ភាគរយក្នុងមួយឆ្នាំ និងត្រូវទិញស្រូវកសិករក្នុងតម្លៃ៨៤ម៉ឺនរៀលក្នុង១តោន(តម្លៃទិញដល់ស្រែ)៕
Tag:
សុខ ពុទ្ធីវុធ
CRF
អង្ករ
© រក្សាសិទ្ធិដោយ thmeythmey.com