អន្តរជាតិ
Wikileaks៖លោកស្រី ហ៊ីឡារី គ្លីនតុន មានគម្រោងធ្វើឃាតលោក Julian Assange
× ស្ថាបនិក Wikileaks លោក Julian Assange សម្រេចចិត្តផ្លាស់ប្តូរទីតាំងរៀបចំខួបលើកទី ១០នៃការបង្កើតសារព័ត៌មាន Wikileaks ពីអង់គ្លេសទៅទីក្រុងប៊ែកឡាំងអាល្លឺម៉ង់វិញ ដោយសារបញ្ហាសន្តិសុខផ្ទាល់ខ្លួន។ ដើមសប្តាហ៍នេះ Wikileaks ក៏បានចោទប្រកាន់ថា លោកស្រី ហ៊ីឡារី គ្លីនតុន ចង់ធ្វើឃាតលោក Assange ដើម្បីបញ្ចប់រាល់ការបញ្ចេញព័ត៌មានសម្ងាត់ទៀត។
ទីតាំងនៃការរៀបចំសន្និសីទសារព័ត៌មានស្តីពីខួបលើកទី ១០ នៃការបង្កើតគេហទំព័រ Wikileaks ត្រូវបានផ្លាស់ប្តូរពីស្ថានទូតអេក្វាទ័រប្រចាំក្រុងឡុងដ៍ មកកាន់ទីក្រុងប៊ែកឡាំងប្រទេសអាល្លឺម៉ង់វិញ។ ការផ្លាស់ប្តូរនេះធ្វើឡើងដោយសារលោក Julian Assange ដឹងព័ត៌មានជាក់លាក់ថាវាអាចមានការប៉ុនប៉ងធ្វើឃាតលោក។
ហើយថ្ងៃចន្ទម្សិលមិញ Wikileaks បានចោទប្រកាន់ថា លោកស្រី ហ៊ីឡារី គ្លីនតុន ធ្លាប់មានគម្រោងធ្វើឃាតលោក Julian Assange ហើយគេហទំព័រនេះលើកយកព័ត៌មានសម្ងាត់ដែលគេទទួលបានពីកិច្ចប្រជុំក្រសួងការបរទេសអាមេរិកឆ្នាំ ២០១០ ។ គណនី Twitter ផ្លូវការរបស់ Wikileaks បានបង្ហោះសម្រង់ពាក្យសម្តីលោកស្រី ហ៊ីឡារី គ្លីនតុន ក្នុងពេលប្រជុំក្រសួងការបរទេសឆ្នាំ ២០១០ ដោយលោកស្រី សួរទៅកាន់អង្គប្រជុំថា៖«តើអាចសម្លាប់ Assange ដោយប្រើប្រាស់យន្តហោះទម្លាក់គ្រាប់គ្មានអ្នកបើកបានឬអត់?»។
លោក Assange ដែលជាស្ថាបនិកនិងនិពន្ធនាយកនៃគេហទំព័រ Wikileaks កន្លងមកបានដើរតួនាទីសំខាន់ជាអ្នកបកអាក្រាតរឿងអាស្រូវរបស់លោកស្រី ហ៊ីឡារី គ្លីនតុន និងបក្សប្រជាធិបតេយ្យ។ កាលពីខែសីហាកន្លងទៅ លោក Assange បានប្រកាសថា លោកនឹងបញ្ចេញឯកសារសំខាន់ៗផ្សេងទៀតពាក់ព័ន្ធយុទ្ធនាការឃោសនាបោះឆ្នោតរបស់បេក្ខជនប្រធានាធិបតី ហ៊ីឡារី គ្លីនតុនមុនថ្ងៃបោះឆ្នោតខែវិច្ឆិកាមកដល់។ គេរំពឹងថា ការទម្លាយឯកសារថ្មីទៀតនេះ នឹងមានផលប៉ះពាល់ ចំពោះការបោះឆ្នោតនៅពេលខាងមុខ។ ប៉ុន្តែមកទល់ពេលនេះលោក មិនទាន់ទម្លាយរបាយការណ៍សម្ងាត់ទាំងនោះឡើយ។
ហើយកាលពីខែកក្កដាកន្លងមក គេហទំព័រ Wikileaks ក៏បានបញ្ចេញឯកសារសម្ងាត់ដែលត្រូវបានគេលួចទាញយកពីសារអេឡិចត្រូនិករបស់គណកម្មាធិការជាតិបក្សប្រជាធិបតេយ្យ។ ហើយឯកសារទាំងនោះបានបើកកកាយពីការរឿងតែងតាំងបេក្ខជនប្រធានាធិបតីសម្រាប់បក្សប្រជាធិបតេយ្យ ក្នុងពេលសមាជបក្សនាខែកក្កដា។ ហើយការទម្លាយឯកសារនេះបានធ្វើឲ្យប្រធានគណៈកម្មាធិការបក្សប្រជាធិបតេយ្យលោកស្រី Debbie Wasserman Schultz ចុះចេញពីតំណែងថែមទៀតផង។
សូមបញ្ជាក់ថា លោក Julian Assange បានរស់នៅស្ថានទូតអេក្វាទ័រប្រចាំប្រទេសអង់គ្លេសអស់រយៈពេល ៥ឆ្នាំហើយ។ លោកសុំសិទ្ធិជ្រកកោននៅស្ថានទូតដោយសារលោករត់គេចពីការធ្វើបត្យាប័នបញ្ជូនលោកទៅកាត់ទោសនៅប្រទេសស៊ុយអែត ដោយសារលោករងការចោទប្រកាន់ពីបទរំលោភបំពានផ្លូវភេទនោះ៕
Tag:
Julian Assange
Wikileaks
ហ៊ីឡារី គ្លីនតុន
© រក្សាសិទ្ធិដោយ thmeythmey.com