អន្តរជាតិ
នយោបាយអន្តរជាតិ
×![]()
ដោយ: តន ចាន់រិទ្ធារ៉ា
ប្រមុខកងទ័ពជើងគោកអាមេរិក បានចេញសារព្រមានខ្លាំងៗចំពោះការគំរាមកំហែងទាំងឡាយមកលើអាមេរិក ដោយរួមទាំងរុស្សីផងនោះ។ មេទ័ពអាមេរិកថែមទាំងប្រកាសថា កងទ័ព នឹងកម្ចាត់រាល់សត្រូវទាំងអស់ដែលហ៊ានយាយីអាមេរិក។ ការចេញសារព្រមានធ្វើឡើង ខណៈដែលអាមេរិក កំពុងប្រឈមមុខជាមួយរុស្សី ក៏ដូចជាការគំរាមពីសំណាក់ក្រុមជ្រុលនិយមរដ្ឋឥស្លាមដែរ។ 
នាយសេនាធិការកងទ័ពជើងគោកអាមេរិក លោកឧត្តមសេនីយ៍ Mark Milley និយាយថាអាមេរិក កំពុងប្រឈមមុខនឹងការគំរាមកំហែងដែលមិនធា្លប់ពីមុនមក ដ្បិតសត្រូវរបស់អាមេរិក បាននិងកំពុងរៀបចំខ្លួនជាមួយនឹងក្ដីសង្ឃឹមថា ពួកគេ នឹងផ្ដួលអាមេរិកបាននៅពេលអនាគត។ ប៉ុន្តែលោកឧត្តមសេនីយ៍ Milley ក៏ព្រមានដែរថា កងទ័ពអាមេរិក នឹងកម្ទេចសកម្មភាពដែលប៉ះពាល់ខ្លួន។
ថ្លែងទៅកាន់កិច្ចប្រជុំមួយនៅក្រុងវ៉ាស៊ីនតោននៅថ្ងៃទី៤ ខែតុលា លោកឧត្តមសេនីយ៍ Milley បានបញ្ជាក់ច្បាស់ៗទៅកាន់ «អ្នកដែលចង់បំផ្លាញអាមេរិក» ថា កងទ័ពអាមេរិក នឹងមិនខ្វល់ពីបញ្ហាប្រឈមអ្វីឡើយ ហើយនឹងបញ្ឈប់សកម្មភាពរបស់ពួកគេ ព្រមទាំងកម្ទេចពួកគេឲ្យខ្លាំងជាងពីមុនទៅទៀត។ លោកបន្តថា កងទ័ពនឹងមិនធ្វើឲ្យមានកំហុសលើបញ្ហានេះទេ។
ប្រមុខកងទ័ពជើងគោកអាមេរិកព្រមានខ្លាំងៗដូចនេះ ស្របពេលដែលអាមេរិកឈានមកដល់កាលៈទេសៈដ៏សំខាន់ ជាពិសេសក្នុងដំណាក់កាលដែលប្រជាជនអាមេរិក ត្រូវជ្រើសរើសប្រធានាធិបតីថ្មីដែរនោះ។ មិនតែប៉ុណ្ណោះ ការកើនឡើងនៃការប្រឈមមុខផ្នែកយោធាជាមួយគូប្រជែងដូចជាចិន និងរុស្សីជាដើមនោះ សុទ្ធតែជាបញ្ហាសំខាន់ទាំងអស់។
យោងតាមសារព័ត៌មាន Military.com លោកឧត្តមសេនីយ៍ Milley បញ្ជាក់ថា ខណៈដែលអាមេរិកកំពុងផ្ដោតលើការប្រយុទ្ធនឹងភេរវកម្ម ប្រទេសជាច្រើនដូចជារុស្សី អ៊ីរ៉ង់ ចិន និងកូរ៉េខាងជើងនោះ កំពុងរៀនតាមអាមេរិក។ ហើយពួកគេ ក៏យកបទពិសោធន៍ទាំងនោះ ដើម្បីអភិវឌ្ឍយោធារបស់ខ្លួន ក្នុងគោលដៅវាយបកមកលើអាមេរិកវិញ។
ដោយនិយាយចំលើការលើកឡើងរបស់មន្ត្រីរុស្សីដែលថា រុស្សីអាចឈ្នះលើសង្គ្រាមនៅអឺរ៉ុបនោះ លោកឧត្តមសេនីយរូបនេះសង្កត់ធ្ងន់ថា សង្គ្រាមនៅថ្ងៃអនាគត នឹងកាន់តែសាហាវ មិនដូចអ្វីដែលកើតឡើងអំឡុងសង្គ្រាមលោកលើកទីពីរឡើយ។ លោកពន្យល់ថា៖ «ក្នុងសមរភូមិនាថ្ងៃខាងមុខ ប្រសិនបើអ្នកនៅមួយកន្លែងច្រើនជាងពីរ ឬបីម៉ោងនោះ អ្នកនឹងស្លាប់មិនខាន។»
យ៉ាងណាក្ដី មេទ័ពអាមេរិកក៏អះអាងដែរថា កងទ័ពនឹងបន្ស៊ាំខ្លួននឹងស្ថានភាពគ្រោះថ្នាក់ទាំងនោះ បើទោះជាវាជារឿងដ៏លំបាកក៏ដោយចុះ។ លោកថា យើងនឹងរក្សាសមត្ថភាពរបស់យើង ហើយយើងនឹងកម្ទេចសត្រូវទាំងអស់នៅគ្រប់ទីកន្លែង គ្រប់ពេលវេលា។ ការលើកឡើងខ្លាំងបែបនេះ គឺជាសញ្ញាបង្ហាញថា កងទ័ពអាមេរិក ទំនងជាត្រៀមខ្លួនរួចរាល់ហើយ សម្រាប់ទប់ទល់នឹងការគំរាមណាមួយនោះ៕
Tag:
អាមេរិក
រុស្សី
© រក្សាសិទ្ធិដោយ thmeythmey.com
