លោក Jon Smith ភ្នាក់ងារកីឡាករបាល់ទាត់ដ៏ល្បីម្នាក់ បានបង្ហើបឲ្យដឹងថា ក្លិបកាំភ្លើងធំ Arsenal បានប្រើប្រាស់ក្រុមហ៊ុនទិន្នន័យ StatDNA សម្រាប់មុខជំនួញរបស់ខ្លួន ជាពិសេសការទិញដូរកីឡាករ។ លោក Smith ដែលជាអតីតភ្នាក់ងារផ្ទាល់របស់ Diego Maradona ផងដែរនោះ បានបញ្ជាក់ថា StatDNA មានក្រុមហ៊ុនដៃគូនៅកម្ពុជា ដែលផ្ទុកទិន្នន័យកីឡាករទាំងអស់នៅលើពិភពលោក។
លោក Jon Smith បុរសជនជាតិអង់គ្លេសដែលទើបប្រារព្ធខួបកំណើត៤០ឆ្នាំរបស់ខ្លួន គឺជាអតីតភ្នាក់ងាររបស់អតីតខ្សែប្រយុទ្ធឆ្នើមអាហ្សង់ទីន Diego Maradona ពីឆ្នាំ១៩៨៧ ដល់ឆ្នាំ១៩៩០ ដែលនៅពេលនោះ គេលេងឲ្យក្លិប Napoli របស់អ៊ីតាលី។ មិនត្រឹមជាភ្នាក់ងារកីឡាករបាល់ទាត់ លោក Smith ក៏ជាអ្នកនិពន្ធម្នាក់ផងដែរ ហើយកាលពីខែកញ្ញា កន្លងមកនេះ លោកបានចេញផ្សាយសៀវភៅមួយដែលមានចំណងជើងថា៖ «The Deal, Inside the World of a Super-Agent»។
យោងតាមកាសែត The Sunday Times សៀវភៅ «The Deal, Inside the World of a Super-Agent» របស់លោក Smith បានរៀបរាប់ពីឆាកជីវិតរបស់លោកក្នុងតួនាទីជាភ្នាក់ងារបាល់ទាត់ រួមទាំងសកម្មភាពនានាទាក់ទងនឹងជំនួញក្នុងវិស័យកីឡាបាល់ទាត់។ អ្វីដែលគួរឲ្យកត់សម្គាល់នោះ លោកបានលើកយកករណីក្លិប Arsenal នៃក្របខណ្ឌ Premier League ទាក់ទងនឹងការដោះដូរកីឡាករ។
ក្នុងសៀវភៅរបស់ខ្លួន លោក Smith បានអះអាងថា ចាប់ពីឆ្នាំ២០១២ មក ក្លិប Arsenal ជាពិសេសលោក Arsene Wenger ដែលជាអ្នកចាត់ការទូទៅ បានប្រើប្រាស់សេវាកម្មក្រុមហ៊ុនទិដ្ឋន័យមួយឈ្មោះ StatDNA ដែលមានទីស្នាក់ការកណ្តាលនៅក្រុងឈីកាហ្កោ សហរដ្ឋអាមេរិក។
កាលពីឆ្នាំ២០១៤ កាសែត The Guardian បានផ្សាយថា Arsenal បានទិញទិន្នន័យដ៏សម្ងាត់ពីក្រុមហ៊ុន StatDNA ក្នុងតម្លៃ២.១៦៥លានផោន (២.៦៩លានដុល្លារអាមេរិក)។ StatDNA មានជំនាញខ្ពស់ក្នុងការផ្តល់ទិន្នន័យទាក់ទងនឹងកីឡាករ ការវិភាគលើទម្រង់លេង និងការវិវត្តន៍ចុងក្រោយនានា។
StatDNA ត្រូវបានបង្កើតឡើងនៅឆ្នាំ២០០៩ ដោយមានលោក Jaeson Rosenfeld ជាអគ្គនាយក ហើយលោកក៏ស្ថាបនិកក្រុមហ៊ុន Digital Divide Data (DDD) ដែលមានទីតាំងនៅកម្ពុជា និងឡាវផងដែរ។ The Guardian បានគូសបញ្ជាក់ថា DDD គឺជាដៃគូប្រតិបត្តិការរបស់ StatDNA ដែលអាចផលិតការវិភាគជាវីដេអូ។
លោក Jon Smith បានលើកឡើងថា ក្លិប Arsenal គឺជាឧទាហរណ៍ទាក់ទងនឹងជំនួញបាល់ទាត់ដែលអ្នកគាំទ្រពិបាកយល់ ខណៈលោក Wenger នារយៈពេលប៉ុន្មានឆ្នាំចុងក្រោយនេះ តែងតែរងនូវការរិះគន់ ទាក់ទងនឹងការដោះដូរកីឡាករ ដោយលោកមិនសូវចំណាយលុយ និងទិញកីឡាករឆ្នើម។
ទាក់ទងនឹង StatDNA លោក Smith បានគូសបញ្ជាក់ថា៖ «មានទិន្នន័យដ៏ធំនៅកម្ពុជា ដែលពោរពេញទៅដោយឯកសារ និងស្ថិតិគ្រប់បែបយ៉ាងទាក់ទងនឹងកីឡាករ។ ពោលគឺកីឡាករទាំងអស់នៅលើពិភពលោក។ ពួកគេលម្អិតគ្រប់បែបយ៉ាងទាក់ទងនឹងកីឡាករបាល់ទាត់ម្នាក់ៗ»។
លោកបានបញ្ជាក់ ប្រព័ន្ធទិន្នន័យនេះ អាចឲ្យគេវិភាគឃើញជាឧទាហរណ៍ថា បើខ្សែការពារឆ្វេងម្នាក់បើកការវាយលុក តើគូប្រជែងគួរយកកីឡាករដែលមានលក្ខណៈសម្បត្តិបែបណាទៅទប់ទល់វិញ? ។ លោក Smith ដែលធ្លាប់ជួយ Arsenal ទិញបាន Fredrik Ljungberg, Nwankwo Kanu និង Andrey Arshavin ជាដើមនោះ ក៏បានមើលឃើញបញ្ហាផងដែរទាក់ទងនឹងការប្រើប្រាស់សេវាកម្មក្រុមហ៊ុនទិន្នន័យ។ លោកបានលើកឡើងថា ដោយសារតែការវិភាគច្រើនពេក ទើបធ្វើឲ្យលោក Wenger មានការយឺតយ៉ាវក្នុងទិញកីឡាករ ហើយពេលខ្លះបណ្តោយឲ្យគូប្រជែងទិញបានមុន ។
លោកបានវាយតម្លៃថា ប្រព័ន្ធទិញដូរ កីឡាករនៅ Arsenal នឹងមិនមានការផ្លាស់ប្តូរនោះឡើយ ដរាបណា លោក Wenger នៅតែបន្តដឹកនាំក្រុម៕