ជាតិ
នយោបាយជាតិ
អ្នកនាំពាក្យCPP ថា បាតុកម្មដឹកនាំដោយលោក ហុង លីម មានបក្សនយោបាយនៅពីក្រោយ លោក សុខ ឥសាន អ្នកនាំពាក្យគណបក្សប្រជាជនកម្ពុុជា ថ្លែងនៅមុខតុលាការដំបូងរាជធានីភ្នំពេញ កាលពីពេលកន្លងទៅ។
× អ្នកនាំពាក្យគណបក្សប្រជាជនកម្ពុជា នៅថ្ងៃនេះ បានចេញសេចក្តីប្រកាសព័ត៌មាន ដោយចោទបាតុកម្មនៅប្រទេសអូស្ត្រាលីដឹកនាំដោយលោក ហុង លីម ប្រឆាំងនឹងលោក ហ៊ុន ម៉ាណែត ថា មានគណបក្សនយោបាយនៅពីក្រោយ។
អ្នកនាំពាក្យគណបក្សប្រជាជនកម្ពុជា បានហៅលោក ហុង លីម តំណាងរាស្ត្រអូស្ត្រាលី ដើមកំណើតខ្មែរថា ជា«បុគ្គលនយោបាយ» ហើយចាត់ទុកបាតុកម្មប្រឆាំងនឹងលោក
ហ៊ុន ម៉ាណែតនៅអូស្ត្រាលីថា ជាបាតុកម្មនយោបាយ។ តាមរយៈសេចក្តីប្រកាសព័ត៌មានរបស់ខ្លួនចុះថ្ងៃទី ៨ ខែតុលា អ្នកនាំពាក្យគណបក្សនេះ អះអាងថា លោក ហុង លីម ពុំមានសិទ្ធិបញ្ចេញមតិលើអធិបតេយ្យកម្ពុជាទេ ព្រោះលោកបានបោះបង់សញ្ជាតិខ្មែរទៅហើយ។ «លោក ហុង លីម រៀបចំបាតុកម្មឡើងក្រោមខ្សែញាក់របស់គណបក្សនយោបាយណាមួយ ដែលកំពុងតែជំរុញឲ្យស្ថានភាពនយោបាយនៅកម្ពុជាឲ្យឡើងកម្តៅស្របនឹងគោលបំណងរបស់មេដឹកនាំនយោបាយទុច្ចរិតដែលនៅពីក្រោយខ្នង សំដៅបំភ័ន្តមតិជាតិ និងអន្តរជាតិថា កម្ពុជាកំពុងមានវិបត្តិនយោបាយ»។ នេះជាខ្លឹមសារបន្ថែមនៃសេចក្តីថ្លែងការណ៍របស់បក្សកាន់អំណាច ទន្ទឹមនឹងប្រាប់ឲ្យលោក ហុង លីម ត្រូវតែទទួលខុសត្រូវចំពោះការចោទប្រកាន់គណបក្សប្រជាជនកម្ពុជា ដោយគ្មានភស្តុតាងអំពីឃាតកម្មលើលោក កែម ឡី។
សូមបញ្ជាក់ថា ប្រជាពលរដ្ឋខ្មែរមួយចំនួនដែលដឹកនាំដោយលោក ហុង លីម តំណារាស្ត្រអូស្ត្រាលីដើមកំណើតខ្មែរ បានធ្វើបាតុកម្មប្រឆាំងនឹងវត្តមានលោក ហ៊ុន ម៉ាណែត នៅក្នុងទឹកដីអូស្ត្រាលី។ ពួកគេប្រឆាំងវត្តមានលោក ហ៊ុន ម៉ាណែត ក្រោមហេតុផលថា កូនប្រុសរបស់សម្តេចនាយករដ្ឋមន្ត្រីរូបនេះ ទៅធ្វើពិធីសប្បាយរីករាយផឹកស៊ីនៅអូស្ត្រាលី ចំពេលដែលប្រជាពលរដ្ឋខ្មែរមួយចំនួននៅអូស្ត្រាលីកំពុងធ្វើបុណ្យកាន់ទុក្ខ១០០ ថ្ងៃលោកបណ្ឌិត កែម ឡី។
© រក្សាសិទ្ធិដោយ thmeythmey.com