អន្តរជាតិ
ឥណ្ឌាចាប់ឃុំសត្វព្រាបមួយក្បាល ដោយចោទថា វាជាគិញសម្ងាត់របស់ប៉ាគីស្ថាន
×
សត្វព្រាបមួយក្បាលត្រូវបានអាជ្ញាធរឥណ្ឌា ចាប់ឃុំកាលពីពេលថ្មីៗកន្លងមកនេះ បន្ទាប់ពីរងឃើញថា វាបាននាំលិខិតគំរាមកំហែងមួយដែលមានប្រភពមកពីប្រទេសប៉ាគីស្ថាន។ នេះបើយោងតាមការផ្សាយរបស់ AFP។
ប៉ូលិសឥណ្ឌា បានចាប់សត្វព្រាបមួយក្បាលឃុំភ្លាមៗ បន្ទាប់ពីពួកគេរកឃើញលិខិតមួយច្បាប់នៅលើខ្លួនសត្វព្រាបនោះ។ ព្រាបដែលត្រូវបានចាត់ទុកជាភ្នាក់ងារស៊ើបការរបស់ប៉ាគីស្ថាន ត្រូវបានចាប់ខ្លួននៅតំបន់ព្រំដែនក្នុងក្រុង Pathankot រដ្ឋ Pendjab។ ទីតាំងនោះ គឺជាកន្លែងនៃវាយប្រហាររបស់កងកម្លាំងប្រដាប់អាវុធប៉ាគីស្ថានទៅលើឥណ្ឌា កាលពីខែមករា កន្លងមក ដែលបណ្តាលឲ្យមនុស្ស៧នាក់ស្លាប់។
យោងតាម AFP លិខិតដែលរកឃើញនៅលើខ្លួនព្រាប ត្រូវបានចុះហត្ថលេខាដោយក្រុមជីហាត Lashkar-e-Taiba ក្រុមដែលបានវាយប្រហារក្រុងប៊ុមបៃ កាលពីឆ្នាំ២០០៩ ។ លោក Rakesh Kumar អធិការរងប៉ូលិសប្រចាំតំបន់ បានអះអាងថា៖ «លិខិតនោះ មានខ្លឹមសារគំរាមកំហែងដ៏ធ្ងន់ធ្ងរមួយ»។
«Modi [នាយករដ្ឋមន្ត្រីឥណ្ឌា] យើងមិនមែនជាក្រុមមនុស្សដូចកាលពីឆ្នាំ១៩៧១ឡើយ។ ពេលនេះ ក្មេងៗទាំងអស់ត្រៀមខ្លួនជានិច្ចក្នុងការវាយប្រហារឥណ្ឌា»។ នេះជាខ្លឹមសារក្នុងលិខិតដែលរៀបរាប់ដោយលោក Rakesh Kumar។ ឆ្នាំ១៩៧១ ជាកាលបរិច្ឆេទមួយនៃសង្គ្រាមរវាងឥណ្ឌា និងប៉ាគីស្ថាន។
សត្វព្រាបប្រហែលជាមិនអាចរួចខ្លួននោះឡើយ ហើយករណីនេះ កាន់តែបង្កឲ្យមានកំដៅរវាងឥណ្ឌា និងប៉ាគីស្ថាន ដោយប្រទេសទាំងពីរកំពុងតាំងនុយក្លេរអ៊ែររៀងៗខ្លួននៅតំបន់ព្រំដែនកាស្មៀរ៕
Tag:
ព្រាបនាំសារ
ឥណ្ឌា-ប៉ាគីស្ថាន
© រក្សាសិទ្ធិដោយ thmeythmey.com