អន្តរជាតិ
នយោបាយអន្តរជាតិ
ភរិយា ដូណាល់ ត្រាំ ស្នើឲ្យអ្នកគាំទ្រទទួលការសុំទោសរបស់ស្វាមីរឿងប្រើពាក្យអាសគ្រាម
×
លោក ដូណាល់ ត្រាំ កំពុងប្រឈមមុខនឹងសម្ពាធខ្លាំងពីក្នុងបក្សផងនិងសាធារណរដ្ឋជនអាមេរិកផងក្រោយពេលលេចធ្លាយព័ត៌មានដែលបង្ហាញថាលោកបានប្រើប្រាស់ពាក្យចំអាសចំអូងមិនសមរម្យដាក់ស្ត្រីភេទ។ ភរិយារបស់លោក ដូណាល់ ត្រាំ លោកស្រី Melania Trump បានអំពាវនាវឲ្យអ្នកគាំទ្រទទួលយកការសុំអភ័យទោសរបស់ស្វាមីលោកស្រីផងដែរ។
សម្ពាធបង្ខំឲ្យបេក្ខជនប្រធានាធិបតីអាមេរិកមកពីបក្សសាធារណរដ្ឋលោក ដូណាល់ ត្រាំ បោះបង់ចោលការប្រកួតប្រជែងកើនឡើងខ្លាំង ក្រោយលេចធ្លាយព័ត៌មានដែលបង្ហាញថា លោកប្រើប្រាស់ពាក្យអាសគ្រាមមិនគប្បីដាក់ស្ត្រីភេទ។ ប៉ុន្តែបេក្ខជនម្នាក់នេះបានប្តេជ្ញាហើយថា គ្មានហេតុផលណាមួយដែលលោកត្រូវចាកចេញ ពីការប្រកួតប្រជែងតំណែងប្រធានាធិបតីនេះឡើយ។
លោកសុំអភ័យទោសចំពោះរាល់ពាក្យសម្តីទាំងឡាយដែលលោកបានប្រើប្រាស់កាលពីឆ្នាំ ២០០៥នោះដែរ។ ប៉ុន្តែសមាជិកបក្សសាធារណរដ្ឋជើងចាស់ជាច្រើននាក់មិនបានស្តាប់ការសុំអភ័យទោសនេះទេ។ ពួកគេបានប្រកាសដកការទុកចិត្តនិងគាំទ្រលោក ដូណាល់ ត្រាំ សម្រាប់ការបោះឆ្នោតខាងមុខផងដែរ។
ចំណែកភរិយាលោក លោកស្រី Melania Trump បានចេញមុខរិះគន់សម្តីលោក ដូណាល់ ត្រាំដែរ តែលោកស្រី អំពាវនាវឲ្យអ្នកគាំទ្រទទួលយកការសុំអភ័យទោសរបស់លោក ដូណាល់ ត្រាំដែរ ហើយឈប់ប្រកាន់ទោសអូសដំណើរអ្វីទៀតដែរ។
លោកស្រីអះអាងថា៖ «ពាក្យសម្តីអាសគ្រាមរបស់ស្វាមីខ្ញុំពិតជាមិនអាចទទួលយកបាននិងប៉ះពាល់ខ្លាំងដល់ស្ត្រីមែន បើតាមការយល់ឃើញរបស់ខ្ញុំ។ វាមិនឆ្លុះបញ្ចាំងពីបុរសដែលខ្ញុំស្គាល់សោះ។ គាត់មានបេះដូងនិងចិត្តនៃអ្នកដឹកនាំ ។ ខ្ញុំសង្ឃឹមថា អ្នកទាំងអស់គ្នានឹងទទួលយកការសុំអភ័យទោសរបស់គាត់ ដោយសារយើងត្រូវគិតគូពីបញ្ហាសំខាន់ៗដែលប្រទេសយើងកំពុងប្រឈមវិញ»។
កាលពីថ្ងៃសុក្រ សារព័ត៌មាន Washington Post បានបញ្ចេញវីដេអូឆ្នាំ ២០០៥ ដែលលោក ដូណាល់ ត្រាំ បានបរិយាយពីការបំពានស្ត្រីភេទភេទ ដោយជាថើបស្ត្រីភេទដោយគ្មានការអនុញ្ញាត និងការប៉ុនប៉ងរបស់លោកក្នុងការរួមភេទជាមួយស្ត្រីរៀបការហើយជាដើម។ ហើយការលេចធ្លាយនេះបានក្លាយជារឿងចម្រូងចម្រាសខ្លាំង និងជំរុញឲ្យមានការខឹងសម្បារក្នុងចំណោមអ្នកសាធារណរដ្ឋ ហើយមេដឹកនាំបក្សនេះជាច្រើននាក់បានបង្ខំឲ្យលោក ដូណាល់ ត្រាំចាកចេញពីការប្រកួតថែមទៀតផង៕
Tag:
Melania Trump
ដូណាល់ ត្រាំ
© រក្សាសិទ្ធិដោយ thmeythmey.com