ចិន បើកទីផ្សារឲ្យហ្វីលីពីននាំចេញ«ចេក និងម្នាស់»ទៅចិនវិញបាន ក្រោយហ្វីលីពីនបន្ទន់ជំហរ

សេដ្ឋកិច្ចអន្តរជាតិ

អន្តរជាតិ

នយោបាយអន្តរជាតិ

ចិន បើកទីផ្សារឲ្យហ្វីលីពីននាំចេញ«ចេក និងម្នាស់»ទៅចិនវិញបាន ក្រោយហ្វីលីពីនបន្ទន់ជំហរ

10, Oct 2016 , 10:52 am

រូបភាព

រូបភាព ចេក ដែលនាំចេញពីហ្វីលីពីនត្រូវបានកម្ទេចនៅឆ្នាំ២០១២ ដោយចិន

ដោយ:

ចាប់ពីពេលនេះតទៅ ហ្វីលីពីន លែងមានការព្រួយបារម្ភពីចំនួនច្រើនលើសលប់នៃផលិតផលកសិកម្ម «ចេក និងម្នាស់» ទៀតហើយ។ ហើយនោះក៏ព្រោះតែ ចិន ដែលជាប្រភពទីផ្សារដ៏ធំ បានអនុញ្ញាតឲ្យហ្វីលីពីន អាចនាំចេញផលិតផលទាំងនោះទៅកាន់ប្រទេសខ្លួន ក្រោយពីបានហាមឃាត់ អស់រយៈពេលជិតបួនឆ្នាំហើយនោះ។

រដ្ឋមន្ត្រីកសិកម្មហ្វីលីពីន Emmanuel Piñol នៅថ្ងៃទី០៧ ខែតុលាកន្លងទៅ បានអះអាងថា ចិន បានដកការរិតត្បិតលើការនាំចេញ«ចេក និងម្នាស់»ពីហ្វីលីពីន ដែលធ្លាប់ដាក់តាំងពីប្រទេសទាំងពីរបានមានភាពតានតឹងជាមួយនឹងគ្នានៅបីឬបួនឆ្នាំមុនមកម្ល៉េះ។ ការបន្ធូរបន្ថយនេះ ត្រូវបានធ្វើឡើង ខណៈពេល លោកប្រធានាធិបតីហ្វីលីពីន ក៏គ្រោងនឹងបំពេញទស្សនកិច្ចទៅកាន់ចិនក្នុងខែនេះផងដែរនោះ។ នេះបើយោងតាមសារព័ត៌មានហ្វីលីពីន ABS-CBN ។

លោករដ្ឋមន្ត្រីកសិកម្មរូបនោះ ក៏បានបន្ថែមដែរថា ក្រៅពីចេក និងម្នាស់ ដែលជាផលិតផលកសិកម្មចម្បងមកពីខេត្តកំណើតរបស់លោកប្រធានាធិបតីហ្វីលីពីន ចិន ក៏នឹងបើកទីផ្សារសម្រាប់ហ្វីលីពីនលើទំនិញកសិកម្មផ្សេងទៀតដូចជា ស្វាយ ដូង និងស្រកានាគផងដែរ។ នេះបើយោងតាមប្រភពព័ត៌មានដដែល ដែលបានដកស្រង់សម្តីលោករដ្ឋមន្ត្រីកសិកម្មដែលបានសរសេរក្នុងទំព័រហ្វេសប៊ុកថា «មុនពីរសប្តាហ៍ នៃដំណើរទស្សនកិច្ចផ្លូវរដ្ឋរបស់ប្រធានាធិបតីហ្វីលីពីនទៅកាន់ចិន រដ្ឋាភិបាលចិន បានប្រកាសថា ចិន នឹងដកការរឹតត្បិតលើក្រុមហ៊ុននាំចេញចេក និងម្នាស់ពីហ្វីលីពីនហើយ»។

សូមរម្លឹកផងដែរថា ចិន បានបិទទីផ្សារនៃការនាំចេញចេក និងម្នាស់លើហ្វីលីពីនតាំងពីមានភាពតានតឹងនៅឆ្នាំ២០១២មកម្ល៉េះ។ ពេលនោះ ហ្វីលីពីន និងចិន បានមានការប៉ះទង្គិចផ្នែកការទូតជាមួយគ្នាលើបញ្ហាសមុទ្រចិនខាងត្បូងខ្លាំង ដែលពេលនោះដែរ ផ្លែឈើហ្វីលីពីនរាប់ពាន់តោន ត្រូវបានបំផ្លាញនៅកំពង់ផែរបស់ចិន។

អ្វីគួរកត់សម្គាល់នោះ ការប្រកាសដករបាំងពាណិជ្ជកម្មដ៏ធំរបស់ចិនលើហ្វីលីពីន ក៏ស្របពេលដែលលោកប្រធានាធិបតីហ្វីលីពីន Rodrigo Duterte បានបង្ហាញគោលនយោបាយការបរទេសថ្មីក្នុងការងាកទៅចាប់ដៃជាមួយនឹងចិន និងដើរចេញពីអាមេរិកនោះឯង៕