ត្រាំ គំរាមចាប់ ហ៊ីឡារី ដាក់ពន្ធនាគាររឿងប្រើអ៊ីម៉ែលឯកជន បើលោកជាប់ឆ្នោត

អន្តរជាតិ

នយោបាយអន្តរជាតិ

ត្រាំ គំរាមចាប់ ហ៊ីឡារី ដាក់ពន្ធនាគាររឿងប្រើអ៊ីម៉ែលឯកជន បើលោកជាប់ឆ្នោត

10, Oct 2016 , 11:54 am

រូបភាព

ដោយ: សៅ ផលនិស្ស័យ (Sao Phal Niseiy)

បេក្ខជនប្រធានាធិបតីលោក ដូណាល់ ត្រាំ បានសន្យាថាលោកនឹងចាប់លោកស្រី ហ៊ីឡារី គ្លីនតុន ដាក់ពន្ធនាគារជុំវិញការប្រើប្រាស់អ៊ីម៉ែលឯកជនរបស់ខ្លួនពេលបំពេញការងារជារដ្ឋមន្ត្រីការបរទេស បើសិនជាលោកជាប់ឆ្នោត។ លោកបានលើកឡើងដូច្នេះក្នុងពេលជជែកដេញដោលគ្នាលើទី២ ដែលរៀបចំឡើងនៅថ្ងៃ ៩ខែតុលានេះ។

ក្នុងការជជែកដេញដោលគ្នាលើកទី ២នាថ្ងៃ អាទិត្យទី ៩តុលា បញ្ហាអ៊ីម៉ែលលោកស្រី ហ៊ីឡារី គ្លីនតុន នេះនៅតែជារឿងចម្រូងចម្រាស។ រឿងដែលគួរឲ្យចាប់អារម្មណ៍ លោក ដូណាល់ ត្រាំ បានសន្យាថា លោកនឹងចាប់ខ្លួនលោកស្រី ហ៊ីឡារី គ្លីនតុន ដាក់ពន្ធនាគារ បើសិនលោកជាប់ឆ្នោតនៅខែក្រោយនេះ ព្រោះលោកស្រី ហ៊ីឡារី គ្លីនតុនប្រើប្រាស់អ៊ីម៉ែលផ្ទាល់ខ្លួនដើម្បីបំពេញភារកិច្ចជារដ្ឋមន្ត្រីការបរទេស។

យោងតាមវីដេអូជជែកដេញដោលមានរយៈពេលប្រហែល៩០ នាទីចុះផ្សាយនៅសារព័ត៌មាន CNBC ដែលលោក ដូណាល់ ត្រាំ បានប្រកាសថា លោកនឹងតែងតាំងរដ្ឋអាជ្ញាមួយដើម្បីស៊ើបអង្កេតរឿងអ៊ីម៉ែលលោកស្រី ព្រោះវាអាចធ្វើឲ្យប៉ះពាល់ខ្លាំងដល់សន្តិសុខជាតិអាមេរិក ក្នុងពេលលោកស្រី បំពេញការងារជារដ្ឋមន្ត្រីការបរទេសរបស់រដ្ឋបាលលោក បារ៉ាក់ អូបាម៉ា ពីឆ្នាំ ២០០៩ ដល់ឆ្នាំ ២០១៣។

ក្នុងពេលជជែកដេញដោលគ្នារឿងអ៊ីម៉ែល លោក ដូណាល់ ត្រាំ បានថ្លែងទៅកាន់លោកស្រី ហ៊ីឡារី ថា៖ «អ្នកគួរតែខ្មាសខ្លួនឯង»។ លោកស្រី គ្លីនតុន បានតបវិញថា វាជារឿងល្អដែលលោក ដូណាល់ ត្រាំ មិនក្លាយជាប្រធានាធិបតី ព្រោះលោកជាមនុស្សដែលឆេវឆាវ ។ តែលោក ដូណាល់ ត្រាំ ឆ្លើយតបវិញភ្លាមថា៖« ព្រោះតែខ្ញុំនឹងចាប់លោកស្រី ដាក់ពន្ធនាគារ»។ ក្រោយលោកនិយាយចប់ អ្នកចូលរួមនាំគ្នាហ៊ោកញ្ជៀវ ។

យ៉ាងណាក៏ដោយចុះ លោក ដូណាល់ ត្រាំ បានបន្តទៅលើកឡើងពីព័ត៌មានដែលបង្ហាញថា លោកបាននិយាយពាក្យសម្តីចំអូងចំអាសដាក់ស្ត្រីភេទកាលពីឆ្នាំ ២០០៥។ លោកថា លោកអាម៉ាសដោយសាររឿងនេះ ប៉ុន្តែលោកសង្កត់ធ្ងន់ថា វាមិនឆ្លុះបញ្ចាំងពីរូបលក្ខណៈសម្បត្តិពិតប្រាកដរបស់លោកឡើយ។ មិនត្រឹមតែប៉ុណ្ណោះ បេក្ខជនរូបនេះ ទាញយកសំណុំរឿងផ្លូវភេទរបស់លោក ប៊ីល គ្លីនតុន ដើម្បីវាយប្រហារលោកស្រី ហ៊ីឡារី គ្លីនតុនផងដែរ។

តែលោកស្រី ហ៊ីឡារី គ្លីនតុន បានអះអាងថា សម្តីអាសគ្រាមគ្មានសីលធម៌របស់លោក ដូណាល់ ត្រាំ វាបង្ហាញពីការខ្វះខាតលក្ខណៈសម្បត្តិក្នុងការក្លាយជាប្រធានាធិបតីរួចទៅហើយ។ លោកស្រី បន្តថា ទោះជាលោក ដូណាល់ ត្រាំ អះអាងថា វីដេអូដែលបង្ហាញថាលោកនិយាយពាក្យអាសគ្រាមដាក់ស្ត្រីភេទមិនឆ្លុះបញ្ចាំងពីរូបលោកក៏ដោយ ប្រជាជនអាមេរិកអាចដឹងរួចទៅហើយថា លោក ដូណាល់ ត្រាំ ជាមនុស្សបែបម៉េចនោះ។

សូមបញ្ជាក់ថារឿងអាស្រូវរបស់លោក ដូណាល់ ត្រាំ រឿងនិយាយពាក្យចំអូងចំអាស បានក្លាយជារឿងចម្រូងចម្រាសខ្លាំង ហើយវាបានបង្ខំឲ្យបណ្តាមេដឹកនាំបក្សសាធារណរដ្ឋជាច្រើននាក់សម្រេចចិត្តដកការគាំទ្រនិងឈប់បោះឆ្នោតឲ្យលោក ដូណាល់ ត្រាំ ទៀត៕