អន្តរជាតិ
មេដឹកនាំបក្សសាធារណរដ្ឋកាន់តែច្រើនស្នើឲ្យ ដូណាល់ ត្រាំ ចោលការប្រកួត
× មេដឹកនាំបក្សសាធារណរដ្ឋជាច្រើនជាង ៣០នាក់បានសម្រេចចិត្តដកសេចក្តីទុកចិត្តពីលោក ដូណាល់ ត្រាំ ក្រោយលេចធ្លាយព័ត៌មានដែលបង្ហាញថាបេក្ខជនប្រធានាធិបតីរូបនេះប្រើប្រាស់ពាក្យអាសគ្រាមដាក់ស្ត្រីភេទកាលពីឆ្នាំ ២០០៥ ។ សមាជិកបក្សទាំងនេះបានទាមទារឲ្យលោក ដូណាល់ ត្រាំ ចាកចេញពីការបន្តប្រជែងយកតំណែងប្រធានាធិបតីផងដែរ។
សូមស្ដាប់ព័ត៌មានលម្អិត៖
រឿងអាស្រូវច្រើនរបស់លោក ដូណាល់ ត្រាំ ត្រូវបានគេទម្លាយចេញ ស្របពេលដែលការជជែកដេញដោលលើកទីពីរចាប់ផ្តើមឡើង និងប៉ុន្មានសប្តាហ៍ប៉ុណ្ណោះមុនការបោះឆ្នោតប្រធានាធិបតីមកដល់។ តែរឿងអាស្រូវថ្មីនេះ បានធ្វើឲ្យលោក ដូណាល់ ត្រាំ ប្រឈមសម្ពាធធំ និងអាចធ្លាក់ចូលក្នុងវិបត្តិផង។
រឿងអាស្រូវថ្មីបន្ទាប់ពីមិនបង់ពន្ធគឺ ការប្រើប្រាស់ពាក្យសម្តីចំអាសចំអូងគ្មានមាយាទ ដាក់ស្ត្រីភេទកាលពីឆ្នាំ ២០០៥។ ព័ត៌មានស្តីពីរឿងអាស្រូវរបស់លោក ដូណាល់ ត្រាំនេះត្រូវបានគេទម្លាយចេញកាលពីថ្ងៃសុក្រទី ៧ តុលា ហើយវាបានបង្កឲ្យមានការខឹងសម្បារខ្លាំងក្នុងចំណោមសាធារណជនអាមេរិកជាពិសេសសមាជិកបក្សសាធាណរដ្ឋ។
មកទល់ពេលនេះ បណ្តាមេដឹកនាំសំខាន់ៗក្នុងបក្សសាធាណរដ្ឋយ៉ាងតិចណាស់ ៣០នាក់បានប្រកាសថ្កោលទោសនិង រិះគន់បេក្ខជនប្រធានាធិបតី ដូណាល់ ត្រាំ ហើយពួកគេបានទាមទារឲ្យលោក ដូណាល់ ត្រាំ ដកខ្លួនចេញពីសង្វៀននយោបាយក្នុងការបោះឆ្នោតប្រធានាធិបតីថែមទៀត។
សមាជិកព្រឹទ្ធសភាលោក John McCain បានក្លាយជាមេដឹកនាំបក្សសាធារណរដ្ឋដ៏សំខាន់ម្នាក់ដែលបោះបង់ការគាំទ្រលោក ដូណាល់ ត្រាំ ក្នុងការបោះឆ្នោតខាងមុខ។ លោកបានប្រកាសថា លោកលែងគាំទ្រលោក ដូណាល់ ត្រាំ ក្នុងការបោះឆ្នោត ហើយលោកក៏នឹងមិនបោះឆ្នោតឲ្យលោកស្រី ហ៊ីលឡារី គ្លីនតុនដែរ។ លោកនឹងជ្រើសរើសបេក្ខជនបក្សផ្សេងទៀតដែលមានលក្ខណសម្បត្តិជាប្រធានាធិបតីអាមេរិកវិញ។
សូម្បីតែ បេក្ខជនអនុប្រធានាធិបតីដែលចេញពីបក្សតែមួយលោក Mike Pence ក៏បានព្យាយាមដកខ្លួនឲ្យឆ្ងាយពីលោក ដូណាល់ ត្រាំដែរ។ លោកក៏បានអះអាងប្រាប់ប្រជាជនអាមេរិកថា លោកក៏ភ្ញាក់ផ្អើលនិងទាស់ចិត្តជាខ្លាំងដោយសារសម្តីចំអូងចំអាសមាក់ងាយស្ត្រីភេទរបស់លោក ដូណាល់ ត្រាំ នេះ។
ចំណែកអតីតរដ្ឋមន្ត្រីការបរទេសលោកស្រី Condoleezza Rice ក៏សម្រេចចិត្តដកសេក្តីទុកចិត្តចំពោះលោកដូណាល់ត្រាំដែរព្រោះលោកស្រីខឹងសម្បារដោយសារសម្តីគ្មានសីលធម៌របស់សេដ្ឋីអចលទ្រព្យនិងជាបេក្ខជនប្រធានាធិបតីរូបនេះ។
មួយវិញទៀត អតីតអភិបាលរដ្ឋកាលីហ្វ័រនីញ៉ាលោក Arnold Schwarzenegger បានចេញសេចក្តីថ្លែងការណ៍មួយរិះគន់លោក ដូណាល់ ត្រាំ ហើយលោកបានប្រកាសថា លោកនឹងមិនបោះឆ្នោតឲ្យលោកដូណាល់ត្រាំ ឡើយ។ វាក្លាយជារឿងលើកដំបូងបំផុតរាប់ចាប់ពីឆ្នាំ ១៩៨៣ ដែលលោកសម្រេចចិត្តមិនបោះឆ្នោតឲ្យបេក្ខជនប្រធានាធិបតីបក្សសាធារណរដ្ឋនោះ៕
Tag:
ដូណាល់ ត្រាំ
John McCain
© រក្សាសិទ្ធិដោយ thmeythmey.com