អន្តរជាតិ
នយោបាយអន្តរជាតិ
ចិនឌឺអាមេរិក៖ មិនត្រូវយកច្បាប់ខ្លួនឯង ធំជាងច្បាប់អន្តរជាតិឡើយ អ្នកនាំពាក្យក្រសួងការបរទេសចិន Geng Shuang
×
រដ្ឋាភិបាលក្រុងប៉េកាំង បានបង្ហាញជំហរមិនគាំទ្រលើច្បាប់ថ្មីរបស់អាមេរិក ដែលបើកផ្លូវឲ្យសាច់ញាតិជនរងគ្រោះភេរវកម្មថ្ងៃទី ១១ ខែកញ្ញា ប្ដឹងអារ៉ាប៊ីសាអូឌីត ដែលត្រូវបានចាត់ទុកជាប្រទេសគាំទ្រភេរវកម្មនោះ។ ក្រុងប៉េកាំង ក៏ប្រកាសជំហរក្នុងការប្រយុទ្ធប្រឆាំងភេរវកម្មនៅជុំវិញពិភពលោក តែយុទ្ធនាការនោះ ត្រូវធ្វើតាមច្បាប់អន្តរជាតិ ដោយរួមទាំងអភ័យឯកសិទ្ធិអន្តរជាតិដែរ។
«ច្បាប់ស្ដីពីយុត្តិធម៌ប្រឆាំងនឹងអ្នកគាំទ្រភេរវកម្ម» របស់អាមេរិក នឹងចូលក្លាយជាច្បាប់ផ្លូវការ បន្ទាប់ពីសភាអាមេរិកទាត់ចោលសិទ្ធិវ៉េតូរបស់ប្រធានាធិបតីអាមេរិករួចមក។ ច្បាប់ថ្មីនេះ អនុញ្ញាតឲ្យគ្រួសារជនរងគ្រោះភេរវកម្មថ្ងៃទី ១១ ខែកញ្ញា ប្ដឹងប្រទេសផ្សេងដែលនៅពីក្រោយសកម្មភាពភេរវកម្ម។ យ៉ាងណាក្ដី ប្រទេសជាច្រើនបានបង្ហាញក្ដីបារម្ភចំពោះច្បាប់ថ្មីនេះ ព្រោះវាដូចជារំលោភច្បាប់អន្តរជាតិហើយ។
ចិន ដែលជាគូប្រជែងរបស់អាមេរិកនោះ ក៏បានបង្ហាញការមិនពេញចិត្តនឹងច្បាប់ថ្មីនោះដែរ។ អ្នកនាំពាក្យក្រសួងការបរទេសចិន លោក Geng Shuang និយាយថា ប្រទេសណាមួយ មិនគួរយកច្បាប់ក្នុងស្រុកខ្លួនឯង ប្រើជំនួសច្បាប់អន្តរជាតិ ដើម្បីដោះស្រាយភេរវកម្មឡើយ។ ហើយចិនគាំទ្រកិច្ចខិតខំប្រឹងប្រែងរបស់សហគមន៍អន្តរជាតិដើម្បីប្រឆាំងភេរវកម្ម តែអ្វីៗគួរធ្វើតាមបទដ្ឋានអន្តរជាតិ។
ក្នុងការសង្ខេបព័ត៌មានប្រចាំថ្ងៃ នៅថ្ងៃទី១០ ខែតុលា អ្នកនាំពាក្យខាងលើបន្តថា ចិនមានជំនឿថា កិច្ចសហប្រតិបត្តិការប្រឆាំងភេរវកម្មអន្តរជាតិ គួរគោរពច្បាប់ និងគោលការណ៍នៃទំនាក់ទំនងអន្តរជាតិ ដោយរួមទាំងគោលការណ៍ស្មើភាពនៃអធិបតេយ្យភាពដែរ។ លោក Geng Shuang បញ្ជាក់ថា ប្រទេសណាក៏ដោយ មិនអាចយកច្បាប់ខ្លួនឯង ដាក់លើច្បាប់អន្តរជាតិឡើយ ហើយក៏មិនអាចភ្ជាប់ប្រទេសផ្សេងទៅនឹងភេរវកម្មដែរ។
ជាមួយនឹងការប្រឆាំងច្បាប់ថ្មីរបស់អាមេរិក ចិនក៏និយាយដែរថា ជនជាតិខ្លួននៅក្នុងស្រុក ក៏ដូចជានៅបរទេសនោះ ក៏ប្រឈមមុខនឹងការគំរាមកំហែងពីសកម្មភាពភេរវកម្មដែរ។ ប៉ុន្តែខ្លួននៅបន្តអនុវត្តតាមគោលនយោបាយមិនជ្រៀតជ្រែកកិច្ចការផ្ទៃក្នុងរបស់ប្រទេសដទៃឡើយ និងទុកលទ្ធភាពឲ្យប្រទេសនោះ ធ្វើតាមសិទ្ធិអំណាចរបស់ខ្លួនជុំវិញការប្រយុទ្ធប្រឆាំងភេវរកម្ម។
តាមពិតទៅ លោក បារ៉ាក់ អូបាម៉ា ក៏បានប្រើអំណាចវ៉េតូលើច្បាប់ខាងលើដែរ។ លោក អូបាម៉ា និយាយថា ច្បាប់ថ្មីនេះ នឹងប៉ះពាល់ដល់សន្តិសុខអាមេរិក ក៏ដូចជាប៉ះពាល់ដល់ទំនាក់ទំនងជាមួយសម្ព័ន្ធមិត្តដែរ ជាពិសេសអារ៉ាប៊ីសាអូឌីតតែម្ដង។ នេះក៏ដោយសារតែភាគច្រើននៃភេរវជនដែលវាយប្រហារភេរវកម្មថ្ងៃទី១១ ខែកញ្ញា គឺជាជនជាតិអារ៉ាប៊ីសាអូឌីត។ ប៉ុន្តែសភាអាមេរិក ក៏បានបដិសេធសិទ្ធិវ៉េតូរបស់អាមេរិកវិញដែរ ហើយនោះជាលើកដំបូងដែលសភាអាមេរិកទាត់ចោលការប្រើសិទ្ធិពិសេសរបស់ប្រធានាធិបតី៕
Tag:
ចិន
អាមេរិក
ភេរវកម្ម
© រក្សាសិទ្ធិដោយ thmeythmey.com