ជាតិ
នយោបាយជាតិ
ឯកឧត្តម កឹម សុខា ៖«បើលោក សម រង្ស៊ី មកនៅជាមួយខ្ញុំ ល្អជាងខ្ញុំនៅម្នាក់ឯង»
×
ភ្នំពេញ៖ អនុប្រធានគណបក្សសង្គ្រោះជាតិ ឯកឧត្តម កឹម សុខា នៅតែប្រកាសថា រូបលោកនិងឯកឧត្តម សម រង្ស៊ី គឺមិនបែកបាក់គ្នានោះទេ បើទោះជាប្រធានគណបក្សសង្គ្រោះជាតិរូបនេះ កំពុងគេចខ្លួននៅក្រៅប្រទេសក្តី។ ហើយការដឹកនាំបក្សក៏មិនមានបញ្ហាអ្វីចោទនោះដែរ។ តែសម្រាប់ឯកឧត្តម កឹម សុខា បើសិនជារូបលោកនិងឯកឧត្តម សម រង្ស៊ី ស្ថិតនៅរួមគ្នាក្នុងកាលៈទេសៈនេះ គឺល្អជាងលោកនៅម្នាក់ឯង ។ នេះបើតាមការចុះផ្សាយChannel NewsAsia។
ឆ្លើយនឹងសំនួរសារព័ត៌មានសិង្ហបុរី Channel NewsAsia ទាក់ទងនឹងបញ្ហាដឹកនាំបក្សនេះ ឯកឧត្តម កឹម សុខា បានបន្ថែមថា ទាំងរូបលោកនិងលោក សម រង្ស៊ី កំណត់យកគោលនយោបាយដឹកនាំលក្ខណៈជាប្រព័ន្ធ ពោលគឺមិនមែនដឹកនាំជាបុគ្គលផ្ដាច់ការនោះឡើយ។ បើតាមឯកឧត្តម កឹម សុខា ការគ្រប់គ្រងគណបក្ស គឺលោកតែងតែពិគ្រោះយោបល់ជាមួយឯកឧត្តម សម រង្ស៊ី តាមបណ្ដាញសង្គមហ្វេសប៊ុក (Facebook) និង (Whatsapp) ជាដើម។
តែការដឹកនាំបក្សដែលមានមន្ត្រីពីរគណបក្សចូលគ្នា ក៏ទំនងជាការពិបាកសម្រាប់ឯកឧត្តម កឹម សុខា ដែលកំពុងឃុំខ្លួនឯងទីស្នាក់ការគណបក្សនេះដែរ ដោយលោកបានព្រលយទស្សនផ្ទាល់ខ្លួនថា «បើលោក សម រង្ស៊ី មកនៅជាមួយខ្ញុំ ល្អជាងខ្ញុំនៅម្នាក់ឯង»។ ថ្លែងក្នុងកិច្ចសម្ភាសន៍ជាមួយ Channel NewsAsia អនុប្រធានគណបក្សប្រឆាំងរូបនេះ បានបញ្ជាក់ដូច្នេះថា៖«បើដឹកនាំជាបុគ្គលយើងអាចបែកបាក់គ្នាមែន ប៉ុន្តែយើងដឹកនាំជាប្រព័ន្ធ យន្តការបក្សដូច្នេះអត់មានបែកបាក់គ្នាទេ។ ប៉ុន្តែជាយោបល់ខ្ញុំបើលោក សម រង្ស៊ី មកនៅជាមួយខ្ញុំ ជាការល្អជាងដែលខ្ញុំនៅម្នាក់ឯង។ ប៉ុន្តែបើគាត់សម្រេចចិត្តមិនមក នៅតែយើងដឹកនាំបក្សទៅមុខបានព្រោះដឹកនាំតាមប្រព័ន្ធយន្តការគណបក្ស»។
ងាកមកនិយាយរឿងក្តីក្ដាំវិញ ឯកឧត្តម កឹម សុខា ដែលកំពុងឃុំខ្លួនឯងនៅទីស្នាក់ការបក្ស បានបញ្ជាក់ថា ទោះបីជាលោកមានការលំបាក បាត់បង់សេរីភាពក៏ដោយ តែវាជាការលើកទឹកចិត្តអ្នកគាំទ្រខ្លួន ដែលប្រសើរជាងលោករត់ទៅក្រៅប្រទេស។ «ខ្ញុំនៅទីនេះ បើតាមការពិសោធន៍ខ្ញុំ គឺថាប្រជាពលរដ្ឋនៅរឹងមាំជាមួយខ្ញុំ បើសិនខ្ញុំទៅបាត់ ប្រជាពលរដ្ឋបាក់ទឹកចិត្ត»។ នេះជាការបញ្ជាក់របស់ប្រធានស្តីទីគណបក្សសង្គ្រោះជាតិ។
ឯកឧត្តម កឹម សុខា សម្រេចចិត្តធ្វើកូដកម្មឃុំខ្លួននៅបក្ស ដើម្បីប្រឆាំងនឹងប្រព័ន្ធតុលាការ ដែលលោកចាត់ទុកថា ប្រព័ន្ធតុលាការត្រូវបានប្រើប្រាស់ មកគាបសង្កត់មតិរបស់គណបក្សប្រឆាំង។ រយៈពេលជាង៤ខែហើយ ដែលប្រធានស្តីទីគណបក្សសង្គ្រោះជាតិ ឯកឧត្តម កឹម សុខា ឃុំខ្លួននៅទីស្នាក់ការគណបក្ស ក្រោយពីមានការតាមឃាត់ខ្លួនពីសំណាក់អាជ្ញាធរ កាលពីថ្ងៃទី២៦ ឧសភាកន្លងមក។
ឯកឧត្តម កឹម សុខា ត្រូវបានតុលាការកាត់ទោសឲ្យជាប់ពន្ធនាគារ៦ ខែ និងពិន័យប្រាក់៨ សែនរៀល ពីបទ«បដិសេធក្នុងការចូលខ្លួន»ក្នុងនាមសាក្សីក្នុងសំណុំរឿងសញ្ចារកម្ម ។ ក្រុមមេធាវីលោក បានដឹកពាក្យប្ដឹងទៅឧទ្ធរណ៍ ដើម្បីជំទាស់នឹងការសម្រេចរបស់តុលាការក្រុងភ្នំពេញនេះ៕
Tag:
កឹម សុខា
សម រង្ស៊ី
© រក្សាសិទ្ធិដោយ thmeythmey.com