ជាតិ
ចិនលុបបំណុលចំនួន ៦០០លានយ័ន ដែលកម្ពុជាជំពាក់ក្នុងឆ្នាំ២០១៥ រូបភាពពីហ្វេសប៊ុកសម្តេច ហ៊ុន សែន
× ភ្នំពេញ៖ រដ្ឋាភិបាលចិនបានលុបចោលបំណុលចំនួន ៦០០លានយ័ន ដែលកម្ពុជាបានខ្ចីអភិវឌ្ឍប្រទេសកាលពីក្នុងឆ្នាំ២០១៥។ លើសពីនេះ ចិនបានបន្ថែមប្រាក់ជំនួយ ១០០លានយ័នថែមទៀត សម្រាប់ជួយវិស័យយោធាកម្ពុជា។ នេះបើតាមលោក អ៊ាង សុផល្លែត ជំនួយការផ្ទាល់នាយករដ្ឋមន្ត្រីសម្តេច ហ៊ុន សែន។
លោក អ៊ាង សុផល្លែត បានថ្លែងប្រាប់ក្រុមអ្នកសារព័ត៌មាន ក្រោយជំនួបពិភាក្សាការងាររវាងសម្តេច ហ៊ុន សែន និងប្រធានាធិបតីចិន លោក ស៊ី ជិនពីង ថា ចិនសម្រេចលុបចោលបំណុលចំនួន៦០០លានយ័ន នៅឆ្នាំ២០១៥ និងផ្តល់ជំនួយលើវិស័យការពារចំនួន ១០០លានយ័នថែមទៀត ដល់កម្ពុជា។
ក្នុងជំនួបការងារនៅវិមានសន្តិភាព នាល្ងាចថ្ងៃទី១៣ ខែតុលា ឆ្នាំ២០១៦នេះ លោក អ៊ាង សុផល្លែត ដែលមានវត្តមានក្នុងជំនួបនោះ បានបន្ថែមថា ប្រធានាធិបតីចិនបានប្រកាសបង្កើនអាហារូបករណ៍៥០០កន្លែង និង១០០កន្លែងទៀត សម្រាប់យុវជន។
លើសពីនេះទៀត ចិននឹងបង្កើនការហោះហើរផ្ទាល់ មកកម្ពុជា ដើម្បីជំរុញកំណើនភ្ញៀវទេសចរពី៧០ម៉ឺននាក់ ទៅ២លាននាក់ ក្នុងឆ្នាំ២០២០។ នេះបើតាម លោក អ៊ាង សុផល្លែត ដដែល ហើយលោក ក៏បានបន្តទៀតថា ចិនសម្រេចជួយជួសជុលប្រាសាទព្រះវិហារ។
ជាការឆ្លើយតបរបស់កម្ពុជាក្នុងជំនួបនេះ លោក អ៊ាង សុផល្លែត បានបន្ថែមទៀតថា សម្តេច ហ៊ុន សែន បាន អរគុណេភាគីចិន ដែលជួយកម្ពុជា រហូតមក រួមទាំងបង្កើនការទិញអង្ករពីកម្ពុជាពី១០ម៉ឺនតោន ទៅ ២០ម៉ឺនតោនសម្រាប់ឆ្នាំ២០១៦នេះ។ សម្តេច បន្តស្នើឲ្យចិន ជួយជំរុញទាក់ទាញភ្ញៀវទេសចរចិន ការផ្តួចផ្តើមកិច្ចសហប្រតិបត្តិការនយោបាយ ការពារជាតិ ហិរញ្ញវត្ថុ សេដ្ឋកិច្ច វិនិយោគ ធនធានមនុស្សភាគីទាំងពីរបន្ថែមទៀត។
បើតាមលោក អ៊ាង សុផល្លែត សម្តេច ហ៊ុន សែន ចាត់ទុកថា ចិនបានចូលរួមយ៉ាងសំខាន់ ក្នុងការជំរុញកម្ពុជាពីប្រទេសមានចំណូលទាប ឲ្យក្លាយជាប្រទេសមានចំណូលមធ្យមកម្រិតទាប។
សូមស្ដាប់សំឡេង៖
គួរជម្រាបជូនថា ក្នុងដំណើរទស្សនកិច្ចផ្លូវរដ្ឋ លោកប្រធានាធិបតីចិន ស៊ី ជិនពីង រយៈពេល ពីរថ្ងៃ នៅកម្ពុជា ចិននិងកម្ពុជាបានចុះកិច្ចព្រមព្រៀង និងពិធីសារចំនួន ៣១ ផងដែរ។ កិច្ចព្រមព្រៀង និងពិធីសារទាំងនោះ រួមមាន៖
១, កិច្ចព្រមព្រៀងស្ដីពីការពង្រឹងកិច្ចសហប្រតិបត្តិការក្នុងដំណាក់កាលថ្មី។ ២, អនុស្សារណៈយោគយល់គ្នា ស្ដីពីការរៀបចំចំណុចនៃផែនការកិច្ចសហប្រតិបត្តិការទ្វេភាគី ដើម្បីរួមគ្នាបង្កើត កិច្ចសហប្រតិបត្តិការសេដ្ឋកិច្ចផ្លូវសូត្រ និងកិច្ចសហប្រតិបត្តិការផ្លូវសូត្រសមុទ្រ សតវត្សទី២១។ ៣, កិច្ចព្រមព្រៀងស្ដីពី កិច្ចសហប្រតិបត្តិការសេដ្ឋកិច្ច និងបច្ចេកទេសស្ដីពី ការផ្ដល់ហិរញ្ញប្បទានឥតសំណងចំនួន ១,២០០លានយ័នចិន។ ៤ អនុស្សារណៈនៃការយោគយល់គ្នា ស្ដីពីកិច្ចសហប្រតិបត្តិការសមុទ្រ។ ៥, កិច្ចព្រមព្រៀងស្ដីពី កិច្ចសហប្រតិបត្តិការលើវិស័យវិទ្យុ និងទូរទស្សន៍។ ៦, អនុស្សារណៈនៃការយោគយល់គ្នា ស្ដីពីកិច្ចសហប្រតិបត្តិការលើវិស័យអធិការកិច្ច។ ៧, អនុស្សារណៈនៃការយោគយល់គ្នា ស្ដីពីកម្មវិធីផ្លាស់ប្ដូរទស្សនកិច្ចអ្នកវិទ្យាសាស្ដ្រ។ ៨, កិច្ចព្រមព្រៀងស្ដីពី ការចៀសវាងការយកពន្ធត្រួតគ្នា។ ៩, លិខិតប្តូរសារស្តីពីគម្រោង សាងសង់អាគារពេទ្យមិត្តភាពកម្ពុជា-ចិន។
១០, ពិធីសារស្តីពីការលុបឥណទានឥតការប្រាក់។ ១១, កិច្ចព្រមព្រៀងក្របខណ្ឌស្តីបីការសន្យាផ្តល់ឥណទាន សម្បទានជាប្រាក់យ័នចិន សម្រាប់គម្រោងអភិវឌ្ឍន៍ប្រព័ន្ធធារាសាស្ត្រជំហានទី២ ។ ១២, កិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ច និងបច្ចេកទេស ជាឥណទានឥតការប្រាក់ សម្រាប់គម្រោងអភិវឌ្ឍន៍ប្រព័ន្ធធារ៉ាសាស្ត្រវៃកូ ជំហានទី២ ។ ១៣, កិច្ចព្រមព្រៀងក្របខណ្ឌស្តីពីការសន្យាផ្តល់ឥណទាន ជាប្រាក់យ័ន ចិនសម្រាប់គម្រោងសាងសង់ផ្លូវជាតិលេខ៥១ ។ ១៤, កិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ច និងបច្ចេកទេស ជាឥណទានការប្រាក់សម្រាប់សាងសង់ផ្លូវជាតិលេខ៥១ ។ ១៥, កិច្ចព្រមព្រៀងក្របខណ្ឌស្តីពីការសន្យាផ្តល់ឥណទានសម្បទាន ជាប្រាក់យ័នចិន សម្រាប់គម្រោងសាងសង់ផ្លូវក្រវ៉ាត់ក្រុងទី២ ។ ១៦, អនុស្សារណៈ នៃការយោគយល់គ្នា សម្រាប់សិក្សាប្លង់មេស្តីពីផែនការសម្រោង ធនធានទឹកនៅកម្ពុជា និងគម្រោងរៀបចំ និងគាំទ្រសម្ភារៈគម្រោងវិទ្យាស្ថានធនធានទឹក។ ១៧, លិខិតប្តូរសារស្តីពីប្រព្រឹត្តកម្ម មិនជាប់ពន្ធចំនួន៩៧ភាគរយ នៃមុខទំនិញសរុប។ ១៨, អនុស្សារណៈនៃការយោគយល់ គ្នាស្តីពីការជំរុញគម្រោងកិច្ចសហប្រតិបត្តិការ វិនិយោគឧស្សហកម្មគន្លឹះ។ ១៩, អនុស្សារណៈនៃការយោគយល់គ្នា ស្តីពីដំណើរការកិច្ចសហប្រតិបត្តិការផ្លាស់ប្តូរ ព័ត៌មានចារកម្មពាក់ព័ន្ធលើវិស័យអនុវត្តច្បាប់សន្តិសុខផ្ទៃប្រទេស។
២០, កិច្ចព្រមព្រៀងស្តីពីការពង្រឹងកិច្ចសហប្រតិបត្តិការក្នុងការប្រយុទ្ធប្រឆាំងអំពើជួញដូរមនុស្ស។ ២១, កិច្ចព្រមព្រៀងសម្បទានសម្រាប់ការអភិវឌ្ឍអាកាសយានដ្ឋានអន្តរជាតិសៀមរាប-អង្គរ។ ២២, កិច្ចព្រមព្រៀងឥណទានសម្បទានជាប្រាក់យ័នចិន សម្រាប់គម្រោងអភិវឌ្ឍន៍ប្រពន្ធធារាសាស្ត្រវ៉ៃកូ ជំហានទី២ ។២៣, កិច្ចព្រមព្រៀងឥណទានសម្បទានជាប្រាក់យ័នចិន សម្រាប់គម្រោងសាងសង់ផ្លូវជាតិលេខ៥១ ។ ២៤, កិច្ចព្រមព្រៀងឥណទានសម្បទានជាប្រាក់យ័នចិន សម្រាប់គម្រោងសាងសង់ផ្លូវក្រវ៉ាត់ក្រុងទី២ ។ ២៥, កិច្ចព្រមព្រៀងឥណទានសម្បទានជាប្រាក់ដុល្លារអាមេរិក សម្រាប់គម្រោងសាងសង់ខ្សែបញ្ជូនអគ្គិសនីជនបទជំហានទី៥ និងទី៦ ។ ២៦, កិច្ចសន្យាសាងសង់ផ្លូវជាតិលេខ១១ អ្នកលឿង ថ្នល់ទទឹង ។ ២៧, អនុស្សារណៈយោគយល់គ្នារវាងក្រុមហ៊ុន Green Trade កម្ពុជា និងក្រុមហ៊ុន COFCO ចិន ស្តីពីការនាំអង្ករ ២សែនតោន ទៅប្រទេសចិន។ ២៨, កិច្ចសន្យាសាងសង់នៃគម្រោងសាងសង់ខ្សែបញ្ជូនអគ្គិសនីតង់ស្យុងខ្ពស់ ២៣០ KV ជំហានទី២ ២៩, អនុស្សារណៈយោគយល់គ្នាស្តីពីការវិនិយោគ និង អភិវឌ្ឍខ្សែបណ្តាញអគ្គិសនីជាតិ។
៣០, កិច្ចព្រមព្រៀងពិធីសារ សម្រាប់គម្រោងរោងចក្រអគ្គិសនីដើរដោយធ្យូវថ្ម ៤៥០MV នៅក្រុងព្រះសីហនុ និងទី៣១, កិច្ចព្រមព្រៀងផ្តល់ប្រាក់កម្ចី ៤០០លានយ័ន៕
Tag:
ហ៊ុន សែន
ស៊ី ជិនពីង
ជំនួយ
© រក្សាសិទ្ធិដោយ thmeythmey.com