Chelsea ចុះកិច្ចសន្យាជាមួយ Nike ក្នុងតម្លៃជាង១ពាន់លានដុល្លារ

កីឡាអន្តរជាតិ

អន្តរជាតិ

Chelsea ចុះកិច្ចសន្យាជាមួយ Nike ក្នុងតម្លៃជាង១ពាន់លានដុល្លារ

14, Oct 2016 , 7:39 pm

រូបភាព

ដោយ: ទេព ពិទូរ្យ

ក្លិបតោខៀវChelsea និងក្រុមហ៊ុនផលិតសំលៀកបំពាក់កីឡា Nike បានប្រកាសពីកិច្ចព្រមព្រៀងមួយដើម្បីឧបត្ថម្ភឯកសណ្ឋានថ្មី ក្នុងតម្លៃ៩០០លានផោន ប្រហែលជាង១១០០លានដុល្លារអាមេរិក ដែលជាតម្លៃថ្លៃជាងគេនៅ Premier League ជាមួយនឹងកិច្ចសន្យារយៈពេល១៥ឆ្នាំ។

Nike នឹងចូលមកជំនួស Adidas វិញនៅរដូលកាលក្រោយ ២០១៧-២០១៨ បន្ទាប់ពីម្ចាស់ក្លិប Chelsea ដែលជាមហាសេដ្ឋីជនជាតិរុស្ស៊ី លោកRoman Abramovich បានយល់ព្រមចុះកុងត្រាថ្មីជាមួយក្រុមហ៊ុន Nike កាលពីថ្ងៃព្រហស្បិ៍ម្សិលមិញនេះ។

សម្រាប់កិច្ចព្រមព្រៀងថ្មីនេះChelsea អាចទទួលបានប្រាក់៦០លានផោន ជាង៧៣លានដុល្លារអាមេរិកក្នុងមួយឆ្នាំពីក្រុមហ៊ុន Nike និងច្រើនជាងការឧបត្ថម្ភរបស់ក្រុមហ៊ុនបច្ចុប្បន្ន Adidas ពាក់កណ្តាល ដោយទទួលបានត្រឹមតែ ៣០លានផោនក្នុងមួយឆ្នាំប៉ុណ្ណោះ។

បើទោះបីជា ក្លិបតោខៀវបានចុះកុងត្រាជាមួយក្រុមហ៊ុន Nike ក្នុងតម្លៃ ៩០០លានផោន រយៈពេល១៥ឆ្នាំដែលមានតម្លៃថ្លៃជាងគេនៅ Premier League ក៏ដោយ តែបើគិតជាឆ្នាំវិញ ក្រុមបិសាចក្រហម Manchester United ដែលទទួលបាន៧៥០លានផោនពី Adidas រយៈពេល១០ឆ្នាំ នៅតែទទួលបានការឧបត្ថម្ភ ពីក្រុមហ៊ុនផលិតសំលៀកបំពាក់កីឡា Adidas ច្រើនជាង Chelsea ដែលទទួលបានពី ក្រុមហ៊ុន Nike ដដែល ដោយ Man Utd ទទួលបាន ៧៥លានផោនក្នុងមួយឆ្នាំ ហើយ Chelsea ទទួលបាន ៦០លានផោនក្នុងមួយឆ្នាំ។

សូមបញ្ជាក់ថា ទាំងក្រុមស្ត្រី និងបុរសនៃក្លិបបាល់ទាត់ Chelsea នឹងប្រើប្រាស់សំលៀកបំពាក់ម៉ាក Nike ជាផ្លូវការ ចាប់ពីរដូវកាលក្រោយតទៅ រហូតដល់ឆ្នាំ២០៣២៕