ពីនេះ ពីនោះ
ពាក្យខ្មែរដែលត្រូវបានគេសរសេរខុស៖ «វីរះបុរស, វីរះជន, វីរះភាព, ទំរង់ និង ឧបស័គ្គ»
× ភ្នំពេញ៖ កំហុស អ្នកណាក៏ធ្លាប់មានចំពោះការសរសេរពាក្យក្នុង សំណេរអត្ថបទ ក៏ប៉ុន្តែកំហុសខ្លះកើតឡើងដោយអចេតនា ចំណែកកំហុសខ្លះគឺមិនបានដឹងតែម្ដង។ ជាក់ស្ដែងដូចជាពាក្យ «វីរះបុរស, វីរះជន, វីរះភាព, ទំរង់ និង ឧបស័គ្គ» ដែលជាពាក្យខុស ប៉ុន្តែត្រូវបានគេសរសេរស្ទើរជាទូទៅ។ វចនានុក្រមខ្មែររបស់សម្ដេចព្រះសង្ឃរាជ ជួន ណាត ពាក្យទាំងនេះត្រូវសរសេរដូចខាងក្រោម៖
ពាក្យ «វីរបុរស, វីរជន, វីរភាព» ត្រូវបានគេសរសេរខុសទៅជា «វីរៈបុរស, វីរៈជន, វីរៈភាព» ឬ«វីរះបុរស, វីរះជន, វីរះភាព»ទៅវិញ។ វចនានុក្រមខ្មែរ របស់សម្ដេចព្រះសង្ឃរាជ ជូន ណាត ពាក្យទាំងបីនេះ សរសេរដោយមិនមានយុគលពិន្ទុ (ៈ) ឬហៅថា (ចុចពីរ) នោះទេ ពោលគឺ សរសេរជា «វីរបុរស, វីរជន, វីរភាព» ទើបត្រឹមត្រូវ។ ពាក្យ«វីរភាព» ភាពដែលអង់អាច, ដំណើរអង់អាច។ «វីរជន» ជនអង់អាច...។ «វីរបុរស» បុរសអង់អាច...។ ដោយពាក្យ «វីរ» មានថ្នាក់ពាក្យជានាម មានន័យថា អ្នកអង់អាច, ក្លៀវក្លា ដូចជាអ្នកចម្បាំង អ្នកប្រាជ្ញ ។
ចំពោះពាក្យ «ទម្រង់» ជាញឹកញាប់ ត្រូវបានគេសរសេរខុសទៅជា «ទំរង់»វិញ។ ពាក្យ«ទម្រង់» នេះមានថ្នាក់ពាក្យជានាម មានន័យថា សណ្ឋាន, ទ្រង់, ទ្រង់ទ្រាយ, លំនាំ។ ឧទាហរណ៍ របស់នេះមានទម្រង់សមរម្យ, ទម្រង់វែងពុំសូវសម។
ចំណែកពាក្យ «ឧបសគ្គ» ក៏ត្រូវបានគេសរសេរខុសទៅជា«ឧបស័គ្គ» ដែលវចនានុក្រមខ្មែរសម្ដេចព្រះសង្ឃរាជ ជួន ណាត ពាក្យត្រូវសរសេរគឺគ្មានសញ្ញា «័» ឡើយ។ ពាក្យ «ឧបសគ្គ» មានថ្នាក់ពាក្យជានាម មានន័យថា ឧបទ្រព, ចង្រៃ, គ្រឿងទើសទាក់, គ្រឿងជំទាស់, គ្រឿងរារាំងដំណើរ។ នៅក្នុងពាក្យកាព្យៈ ឧបសគ្គជាថ្នាក់នាំជំទាស់ រារាំងឲ្យងាស់ស្ទោកកិច្ចការ ទោះជនកំពុងកាន់ធម៌អាថ៌ អាចារ្យក៏ដោយដូចជាគ្នា។ ជា ព.វ ឈ្មោះសព្ទពួកមួយសម្រាប់ប្រើចំពោះតែជាបុព្វបទរៀងភ្ជាប់ពីខាងដើមនាមសព្ទ និងកិរិយាសព្ទតាមគូរដល់ការប្រកប, ដូចជា អតិ,អនុ, អភិ, ជាដើមៈ អតិកល្យាណ, អតិជាតបុត្ត, អនុគ្រោះ, អនុជ, អនុជាតបុត្ត, អភិរោធ, អភិរោធ, អភិវន្ទ, អភិវាទ។ល។ ឧបសគ្គការណ៍ឬការ មានន័យថា ហេតុជាគ្រឿងជំទាស់។ ឧបសគ្គនិបាត មានន័យថា និបាតសព្ទជាឧបសគ្គៈ។ ឧបសគ្គសព្ទ មានន័យថា សព្ទជាឧបសគ្គៈ។ល។ អាចសរសេរ ជាឧបសគ្គៈ ក៏បាន៕
ដកស្រង់ពីវចនានុក្រមខ្មែររបស់សម្ដេច ព្រះសង្ឃរាជ ជួន ណាត
© រក្សាសិទ្ធិដោយ thmeythmey.com