ជាតិ
ឃុំជង្រុក ស្រុកគងពិសីខេត្តកំពង់ស្ពឺ រងគ្រោះខ្លាំង ព្រោះបាក់ទំនប់ស្វាយ
× ភ្នំពេញ៖ បន្ទាប់ពីបាក់ទំនប់ស្វាយ ពលរដ្ឋនៅឃុំជង្រុក កំពុងរស់នៅជាមួយទឹកជំនន់ ព្រោះទឹកបានកាត់ផ្តាច់ផ្លូវ និងហេដ្ឋារចនាសម្ព័ន្ធមួយចំនួនទៀត ព្រមទាំងលិចផ្ទះកម្ពស់ពីកន្លះម៉ែត្រ ទៅមួយម៉ែត្រ។ នេះបើយោងតាម លោក ថោង ថាត មេឃុំជង្រុក ស្រុកគងពិសី ខេត្តកំពង់ស្ពឺ។
ថ្លែងប្រាប់សារព័ត៌មានថ្មីៗតាមរយៈខ្សែទូរសព្ទនៅថ្ងៃទី១៨ ខែតុលានេះ លោក ថោង ថាត បានឲ្យដឹងថា ពលរដ្ឋនៅឃុំជង្រុក បានរស់នៅជាមួយស្ថានភាពទឹកជំនន់នេះ រយពេល២ថ្ងៃហើយ បន្ទាប់ពីទំនប់ស្វាយស្ថិតក្នុងឃុំស្រង់ បានបាក់ កាលពីថ្ងៃម្សិលមិញ។ លោកបញ្ជាក់ថា ទឹកបានលិចផ្ទះតៀម និងលិចសសរផ្ទះខ្ពស់ៗ ប្រហែលពីកន្លះម៉ែត្រ ទៅមួយម៉ែត្រ។ លោក ថោង ថាត បញ្ជាក់យ៉ាងដូច្នេះ៖«ទឹកជំនន់នេះ បានកាត់ផ្តាច់ផ្លូវក្នុងឃុំចំនួន១៥កន្លែង និងផ្តាច់ប្រព័ន្ធស្ទាក់ទឹករបស់ឃុំជាច្រើនទៀត។ ពលរដ្ឋខ្លះ រស់នៅលើផ្ទះ តែអ្នករស់នៅផ្ទះតៀម ទឹកបានលិចគ្រែរបស់ពួកគេបាត់»។ លោកបន្តថា នៅថ្ងៃនេះ មិនមានភ្លៀងឡើយ ប៉ុន្តែ ទឹកហាក់មិនសូវស្រកប៉ុន្មានទេ។ យ៉ាងណាក៏ដោយ លោកមេឃុំខាងលើ អះអាងថា មិនមានពលរដ្ឋ រើទីលំនៅ ទៅរកទីទួលសុវត្ថិភាពឡើយ។
ចំណែក លោក ញ៉ាញ់ ជៀបហ៊ង ប្រធានមន្ទីរធនធានទឹក និងឧតុនិយមខេត្តកំពង់ស្ពឺ បានប្រាប់សារព័ត៌មានថ្មីៗនៅមុនបន្តិចថា ក្នុងចំណោម៤ឃុំ ដែលរងគ្រោះព្រោះទឹកជំនន់នេះ មានគ្រួសារមួយចំនួន បានស្វែងរកទីទួលសុវត្ថិភាពកាលពីថ្ងៃម្សិលមិញ ប៉ុន្តែ នៅថ្ងៃនេះ ពួកគេបានវិលមកផ្ទះវិញខ្លះហើយ។
គួរបញ្ជាក់ថា មិនមែនតែឃុំជង្រុកនោះទេ ដែលកំពុងរងគ្រោះ ដោយសារទឹកជំនន់នោះ ប៉ុន្តែឃុំបីទៀត រួមមាន ឃុំព្រៃញាតិ ឃុំទឹកល្អក់ និងឃុំស្រង់ ត្រូវបានលិចលង់ បន្ទាប់ពីទំនប់ស្វាយ បានបាក់ កាលពីថ្ងៃទី១៧ ខែតុលា ម្សិលមិញនេះ៕
Tag:
ទឹកជំនន់
កំពង់ស្ពឺ
© រក្សាសិទ្ធិដោយ thmeythmey.com