ទះដៃម្ខាងមិនលឺ៖ រុស្សីនិងណាតូ នាំគ្នាបង្កើនទ័ពដាក់មុខផ្ទះរៀងៗខ្លួន

អន្តរជាតិ

ទះដៃម្ខាងមិនលឺ៖ រុស្សីនិងណាតូ នាំគ្នាបង្កើនទ័ពដាក់មុខផ្ទះរៀងៗខ្លួន

28, Oct 2016 , 7:39 pm

រូបភាព

ដោយ: ថ្មីៗ

រយៈពេលចុងក្រោយនេះ ទាំងរុស្សី និងសម្ព័ន្ធយោធាណាតូ កំពុងខិតខំបង្កើនវត្តមានយោធារបស់ខ្លួននៅតាមបណ្ដោយព្រំដែនទាំងសង ជាពិសេសតំបន់អឺរ៉ុបខាងកើតដែលទល់គ្នាព្រំដែនភាគខាងលិចរបស់រុស្សី។ មិនត្រឹមតែមានរណសិរ្សជើងគោកឡើយ សូម្បីតំបន់សមុទ្រខ្មៅ ក៏ត្រូវបានរុស្សី និងណាតូ ប្រឹងបង្កើនកម្លាំងទ័ពកាន់តែច្រើនដែរ។ ការបង្កើនកងកម្លាំងទ័ពជាបន្តបន្ទាប់បែបនេះកំពុងធ្វើឲ្យគេឯងបារម្ភថា រុស្សី និងអឺរ៉ុប អាចធ្លាក់ចូលសង្គ្រាមត្រជាក់សម័យថ្មី។

សូមស្ដាប់ព័ត៌មានលម្អិត៖

បក្សសម្ព័ន្ធយោធាណាតូ បានបង្កើនវត្តមានកងកម្លាំងរបស់ខ្លួនយ៉ាងខ្លាំងនាពេលថ្មីៗនេះ។ សមាជិកណាតូជាច្រើនបានបង្ហាញជំហរបញ្ជូនទ័ពទៅកាន់តំបន់អឺរ៉ុបខាងកើត និងតំបន់ផ្សេងទៀតដែលមានការប្រឈមមុខគ្នាខ្លាំងជាមួយរុស្ស៊ី។ ចក្រភពអង់គ្លេសសន្យាបញ្ជូនយន្តហោះចម្បាំង រថក្រោះ និងទ័ពជិត ១០០០នាក់ ទៅកាន់អឺរ៉ុបខាងកើតនិងតំបន់បាល់ទិកនៅឆ្នាំក្រោយ។ ចំណែកអាមេរិកវិញ ក៏បានបញ្ជូនកងទ័ព រថក្រោះ និងកាំភ្លើងធំទៅកាន់ប៉ូឡូញ ដែលនៅជាប់ព្រំដែនរុស្សីតែម្ដង។

មួយវិញទៀត ឆ្លៀតពេលកិច្ចប្រជុំរដ្ឋមន្ត្រីការពារជាតិណាតូនៅថ្ងៃទី២៦ ខែតុលា សមាជិកផ្សេងទៀតដូចជាអាល្លឺម៉ង់ និងកាណាដាជាដើមនោះ ក៏ប្រកាសបញ្ជូនទ័ពទៅទប់ទល់ឥទ្ធិពលរុស្សីផងដែរ។ ការប្រកាសបង្កើនកងកម្លាំងទ័ពក្បែររុស្សី គឺជាសញ្ញាដែលណាតូប្រាប់រុស្សីថា ខ្លួនត្រៀមលក្ខណៈរួចរាល់ដើម្បីការពារសមាជិករបស់ខ្លួន ហើយនេះក៏ជាការបង្កើនកម្លាំងធំជាងគេរបស់អឺរ៉ុបចាប់តាំងពីសង្គ្រាមត្រជាក់មកនោះ។

តាមពិតទៅ បើទះដៃតែម្ខាងក៏មិនលឺដែរ។ ការបង្កើនកម្លាំងយោធារបស់ណាតូ ក៏ព្រោះតែរុស្សីបានពង្រាយកម្លាំងទ័ពរបស់ខ្លួនជាច្រើនកន្លែង និងបន្ថែមសព្វាវុធរបស់ខ្លួនផងដែរ។ នៅដើមខែតុលា ក្រុងមូស្គូនិយាយថា ខ្លួនបានពង្រាយមីស៊ីលដែលអាចបំពាក់ក្បាលនុយក្លេអ៊ែរទៅកាន់ក្រុង Kaliningrad ដែលជាតំបន់ជួរមុខទល់នឹងសមុទ្របាល់ទិក។ ហើយសប្ដាហ៍នេះ រុស្សីក៏បន្ថែមនាវាចម្បាំងពីរគ្រឿង និងនាវាល្បាតបំពាក់មីស៊ីលទៅតំបន់បាល់ទិកដែរ។

អាចនិយាយបានថា ការប្រឈមមុខគ្នារវាងអឺរ៉ុប ដែលមានអាមេរិកជួយពីក្រោយជាមួយរុស្ស៊ី ក៏ដូចជាការបង្កើនកម្លាំងយោធាដាក់គ្នា ជារឿងគ្រោះថ្នាក់ តែទោះជាក្នុងកាលៈទេសៈណាក៏ដោយការផ្ទុះអាវុធរវាងភាគី ពិបាកនឹងកើតមានឡើងណាស់។ ជាការពិត ការព្រួយបារម្ភកើតមាន នៅពេលដែលមហាអំណាចរុស្ស៊ីបន្តពង្រឹងអំណាចយោធារបស់ខ្លួនរយៈពេលចុងក្រោយ ក៏ដូចជាពង្រាយសព្វាវុធមានទាំងអាវុធនុយក្លេអ៊ែរផងទៅតំបន់ដែលជាប់អឺរ៉ុបថែមទៀតនោះ។

១. ណាតូផ្ញើសារឲ្យរុស្សី៖ ការពង្រាយទ័ពទាំងប៉ុន្មាន ដើម្បីកំញើញរុស្សី
ការបង្កើនទ័ពរបស់ណាតូនៅពេលនេះ ហាក់ដូចជាយឺតពេលបន្តិច ប៉ុន្តែអ្វីៗក៏មិនទាន់ហួសពេលដែរ ហើយសម្ព័ន្ធយោធានេះ ក៏បានផ្ញើសារខ្លាំងៗឲ្យក្រុងមូស្គូហើយផងដែរ។ គោលដៅរបស់សម្ព័ន្ធយោធាណាតូ គឺដើម្បីកំញើញសកម្មភាពហិង្សារបស់រុស្សីមកលើទឹកដីអឺរ៉ុប។ ទាំងនេះមានន័យថា ណាតូកំពុងបង្ហាញសាច់ដុំរបស់ខ្លួនឲ្យរុស្សីឃើញ ខណៈរុស្សីព្យាយាមដំឡើងឫទ្ធិរបស់ខ្លួនដែរនោះ។

សម្ព័ន្ធណាតូដែលមានអាមេរិកជាខ្នងបង្អែកនោះ បានពញ្ញាក់អារម្មណ៍ក្រុងមូស្គូ ដោយត្រៀមខ្លួនការពាររដ្ឋសមុទ្របាល់ទិកដូចជាអេស្តូនី ឡាត់វី និងលីទុយអានី។ សមាជិកធំៗរបស់ណាតូដូចជាអង់គ្លេស បារាំង និងអាល្លឺម៉ង់ នឹងបញ្ជូនទ័ពរបស់ខ្លួនទៅជួយដែរ។ ប្រទេសសមុទ្របាល់ទិក រដ្ឋអឺរ៉ុបខាងកើត និងសមុទ្រខ្មៅ សុទ្ធសឹងជាទីតាំងដែលទាំងណាតូ និងរុស្សី ខិតខំពង្រីកចំនួនទ័ពទាំងអស់។

បើគម្រោងនេះមិនប្រែប្រួលនោះ នៅត្រឹមរដូវកៅឆ្នាំ២០១៧ កងកម្លាំងណាតូបួនពាន់នាក់ ដែលអាមេរិកផ្ដួចផ្ដើមនោះ នឹងត្រូវប្រឈមមុខជាមួយកងកម្លាំងរុស្សីជាងបីសែននាក់នៅសមរភូមិព្រំដែនខាងលិចរបស់រុស្សី។ យ៉ាងណាក្ដី កងកម្លាំងណាតូទាំងបួនពាន់នាក់ គ្រាន់តែជាកម្លាំងបន្ទាន់ប៉ុណ្ណោះ ដោយមិនទាន់គិតពីកម្លាំងចល័តជាច្រើនពាន់នាក់នៅទូទាំងតំបន់អឺរ៉ុបនៅឡើយដែរ។

២. ណាតូបង្កើនទ័ពដើម្បីទប់ទល់រុស្សី តែរុស្សីថា នឹងនាំគ្រោះថ្នាក់ដល់អឺរ៉ុបវិញ
ក្រុងមូស្គូ បានរិះគន់សកម្មភាពបង្កើនទ័ពរបស់ណាតូនៅសមុទ្រខ្មៅ និងតំបន់អឺរ៉ុប ដែលត្រូវបានអះអាងថា ដើម្បីរក្សាសន្តិសុខតំបន់នោះ។ ច្បាស់ណាស់ថា ការរិះគន់នេះ បណ្ដាលមកពីក្រុងមូស្គូមិនពេញចិត្តនឹងសកម្មភាពនេះ ហើយក៏បានប្រកាសឆ្លើយតបនឹងការបង្កើនកម្លាំងទ័ពនេះ។ ទន្ទឹមនឹងការរិះគន់នេះ រុស្សីក៏បានបង្ហាញកម្លាំងទ័ពរបស់ខ្លួនជាបន្តបន្ទាប់ហើយដែរ។

អគ្គរដ្ឋទូតរុស្សីប្រចាំណាតូ លោក Aleksandr Grushko និយាយក្រោយកិច្ចប្រជុំរដ្ឋមន្ត្រីការពារជាតិណាតូ ថា ការបង្កើនទ័ពទ្រង់ទ្រាយធំបំផុតរបស់ណាតូចាប់តាំងពីបញ្ចប់សង្គ្រាមត្រជាក់មកនោះ មិនបានជួយអ្វីដល់សន្តិសុខអឺរ៉ុបឡើយ។ ប៉ុន្តែវានឹងបង្កើត «គ្រោះថ្នាក់» បន្ថែមទៀតដល់អឺរ៉ុបទៅវិញ ហើយវាក៏នឹងប៉ះពាល់ដល់ស្ថិរភាពរបស់ច្បាប់ស្ដីពីទំនាក់ទំនងរុស្សី និងអឺរ៉ុប ដែលជាស្ពានភ្ជាប់គូប្រជែងទាំងពីរនោះ។

អគ្គរដ្ឋទូតរូបនេះបាននិយាយការពារការបញ្ជូននាវាច្បាំងរុស្សី ទៅកាន់សមុទ្រម៉េឌីទែរ៉ានេ ថាគឺដើម្បីការពារសុវត្ថិភាពនាវាចរណ៍លើដែនសមុទ្រ និងសកម្មភាពពាណិជ្ជកម្មរបស់រុស្សីប៉ុណ្ណោះ។ ម្យ៉ាងទៀតនោះ នាវាចម្បាំងរុស្សី ក៏នឹងចូលរួមប្រតិបត្តិការកម្ទេចការគំរាមកំហែងផ្សេងៗដូចជាចោរសមុទ្រ និងភេរវកម្មជាដើម។ ប៉ុន្តែវត្តមានកងកម្លាំងណាតូនៅសមុទ្រខ្មៅ គឺជាការបង្ហាញសាច់ដុំសុទ្ធសាធ ហើយក៏មិនបានធ្វើប្រតិបត្តិការប្រឆាំងភេរវកម្មអ្វីដែរ។

បើតាមសារព័ត៌មាន RT លោក Grushko បញ្ជាក់ថា ក្រៅពីបង្កើនទ័ពនៅសមុទ្រខ្មៅ ណាតូក៏បង្កើនកម្លាំងនៅអឺរ៉ុបខាងកើតដោយបង្កើតឃ្លាំងអាវុធនៅតំបន់នោះ ធ្វើទំនើបកម្មហេដ្ឋារចនាសម្ព័ន្ធសម្រាប់ពង្រាយអាវុធ និងធ្វើសមយុទ្ធយោធាមិនចេះចប់ទាំងជើងគោក ជើងទឹក និងជើងអាកាស។ អ្វីដែលបារម្ភនោះ គឺសមយុទ្ធទាំងនោះ ធ្វើឡើងនៅនឹងព្រំដែនជាមួយរុស្សីតែម្ដង៕