ជាងធ្វើប្រទីបមមាញឹក ដ្បិតថ្ងៃបុណ្យអុំទូកកាន់តែខិតជិតមកដល់

ជាតិ

ពីនេះ ពីនោះ

ជាងធ្វើប្រទីបមមាញឹក ដ្បិតថ្ងៃបុណ្យអុំទូកកាន់តែខិតជិតមកដល់

30, Oct 2016 , 7:39 pm

រូបភាព

ដោយ:

ភ្នំពេញ៖ បុណ្យអុំទូក បណ្តែតប្រទីប អកអំបុក និងសំពះព្រខែ នឹងព្រឹត្តទៅនៅថ្ងៃទី១៣ ១៤ និង១៥ ខែវិច្ឆិកា ឆ្នាំ២០១៦។ ខណៈបុណ្យជាតិដ៏មួយនេះ កាន់តែខិតជិតមកដល់នោះ ជាងធ្វើប្រទីបក៏មមាញឹកផងដែរ។ លោក អី ឆវីរ៉ា វិស្វករ និងជាអ្នកទទួលខុសត្រូវចំពោះការសាង់សង់ប្រទីប បានអះអាងថា ប្រទីបចំនួន៧ ដែលលោកសាងសង់នេះ បានធ្វើរួចរាល់ចំនួន៣ និងប្រឹងប្រែងឲ្យរួចរាល់ នៅមុនពិធីបុណ្យអុំទូកចូលមកដល់។



ពលរដ្ឋខ្មែរជាច្រើន ប្រាកដបានស្គាល់ប្រទីប ដែលបានបណ្តែតលើផ្ទៃគង្គា ដោយមានភ្លើងភ្លឺចែងចាំងចម្រុះពណ៌ រៀងរាល់ពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នៅខាងមុខព្រះបរមរាជវាំង និងអមមាត់ទន្លេនៅរាជធានីភ្នំពេញ ប៉ុន្តែ មិនមានពលរដ្ឋខ្មែរច្រើនឡើយ ដែលស្គាល់អ្នកធ្វើប្រទីបនោះទេ។

លោក អី ឆវីរ៉ា វិស្វករទទួលសាងសង់ប្រទីបនៅឆ្នាំនេះ បានប្រាប់សារព័ត៌មានថ្មីៗ ខណៈលោកកំពុងត្រួតពិនិត្យការសាងសង់ប្រទីបនៅមាត់ទន្លេ ថា ប្រទីបនៅឆ្នាំនេះ គឺមានចំនួន១៤ តែប្រទីបចំនួន៧ គឺលោកជាអ្នកទទួលខុសត្រូវក្នុងការសាងសង់។ លោកបញ្ជាក់ថា ប្រទីបដែលលោកទទួលសាង់សង់ រួមមាន៖ ប្រទីបព្រឹទ្ធសភា ក្រសួងពាណិជ្ជកម្ម ក្រសួងទេសចរណ៍ ក្រសួងយុត្តិធម៌ ក្រសួងសេដ្ឋកិច្ច និងហិរញ្ញវត្ថុ ក្រសួងឧស្សាហកម្ម និងសិប្បកម្ម និងប្រទីបរាជរដ្ឋាភិបាល។ លោកបញ្ជាក់បន្ថែមថា ថវិកាសាងសង់ប្រទីបទាំងអស់ គឺជាការចាត់ចែងរបស់ គណៈកម្មាធិការជាតិរៀបចំបុណ្យជាតិ អន្តរជាតិ។

ភ្នែកសំឡឹងមើលប្រទីប ដែលកំពុងសាងសង់នៅមាត់ទន្លេត្រើយខាងកើតទន្លេចតុមុខ លោក អី ឆវីរ៉ា ដែលបានធ្វើប្រទីបតាំងពីអំឡុងទសវត្សរ៍៩០នោះ បានលម្អិតថា ប្រទីបនីមួយៗ គឺមានកម្ពស់១៧ម៉ែត្រ និងមានបណ្តោយពី៣៥ម៉ែត្រ ទៅ៥០ម៉ែត្រ ទៅតាមប្រទីបតូចឬធំ។ ពាក់អាវយឺតស សម្បុរស បុរសមាឌដំបងរូបនេះ បន្តថា ប្រទីបទាំង៧នេះ គឺបានចាប់ផ្តើមសាងសង់តាំងពីថ្ងៃទី១៨ ខែតុលាមកម្ល៉េះ ដោយមានជាង អ្នកបើកកប៉ាល់ និងកម្មករសរុប១១០នាក់។

សូមអញ្ជើញទស្សនារូបភាពខាងក្រោមនេះ៖